گولوۆكيندى جاتتىقتىرعان امەريكالىق باپكەرلەر قازاقستانعا كەلدى

استانا. KAZINFORM - قازاقستاندىق تانىمال كاسىپقوي بوكسشى، قازىرگى ۇ و ك باسشىسى گەننادي گولوۆكيننىڭ فيزيكالىق دايارلىعىنا كومەكتەسكەن ماماندار كريستوفەر مەن داريو كاماچولار قازاقستانعا كەلدى.

امەريكالىق بىلىكتى ماماندار الماتى تاۋلارىندا جۇرگەن سۋرەتتەرىن الەۋمەتتىك جەلىدە ءبولىستى. ودان قالدى گەنناديدىڭ ەگىزى ماكسيممەن دە كەزدەسىپ ۇلگەرگەن.

سپورت كوممەنتاتورى ءۋاليحان قوسانبايدىڭ ايتۋىنشا، ولار بۇدان بىلاي بوكستان قازاقستان قۇراماسىنىڭ فيزيكالىق دايىندىعىنا جاۋاپتى.

كاماچو گولوۆكيننەن بولەك وتاندىق ءبىرقاتار بوكسشىمەن جۇمىس ىستەگەن. ولاردىڭ قاتارىندا الي احمەدوۆ، سادريددين احمەدوۆ سەكىلدى ساڭلاقتارىمىز بار.

سونىمەن قاتار UFC سپورتشىلارى حابيب نۋرماگومەدوۆ، كەين ۆەلاسكەس، دانيەل كورمە، ليۋك روكحولد پەن برەندون ادامس سەكىلدى مىقتىلارعا كومەكتەسكەن.

ەستەرىڭىزدە بولسا، پاريج وليمپياداسىنان كەيىن بوكستان ۇلتتىق قۇرامانىڭ باپكەرلەر شتابىندا تۇبەگەيلى وزگەرىس بولىپ، ەندى كومەككە ا ق ش پەن كۋبادان ماماندار شاقىرتىلاتىنى ايتىلعان. ال فەدەراتسيا پرەزيدەنتىنىڭ كەڭەسشىسى تۇرسىنعالي ەدىلوۆ جاتتىعۋ پروتسەسىندە جاڭا كوزقاراستىڭ قاجەت ەكەندىگىن العا تارتىپ ەدى.

«شەتەلدىك بىلىكتى مامانداردىڭ كومەگى مىندەتتى تۇردە تيەدى. باپكەرلەر ءبىر ورىندا تۇرىپ قالدى. باسقا كوزقاراس، كوپتەگەن وزگەرىس قاجەت. قاراعاندى، قوستاناي مەكتەپتەرى قايدا كەتتى؟ تالاي ساڭلاقتى تاربيەلەپ شىعارعان وڭىرلەردەن قازىر نەگە بوكسشى جوق؟ «سىرت كوز سىنشى» دەيدى. باس باپكەرگە سىرتتان كەلگەن مامانداردىڭ كەڭەسى قاجەت بولادى»، - دەگەن ەدىلوۆ.