گولوۆكين ۇلتتىق وليمپيادا كوميتەتىنە جاڭا باس حاتشى سايلادى

استانا. KAZINFORM - بۇگىن استانادا قازاقستان ۇلتتىق وليمپيادالىق كوميتەتى باس اسسامبلەياسىنىڭ كەزەكتەن تىس جيىنى ءوتتى، دەپ حابارلايدى ۇيىمنىڭ باسپا ءسوز قىزمەتى.

قازاقستان ۇ و ك باسقارۋشى ورگانىنىڭ وتىرىسىنا قازاقستان ۇ و ك پرەزيدەنتى گەننادي گولوۆكين، ق ر سپورت جانە تۋريزم ۆيتسە-ءمينيسترى سەرىك جاراسبايەۆ، سونداي-اق وليمپيادالىق سپورت تۇرلەرى بويىنشا 33 ۇلتتىق سپورتتىق فەدەراتسيالاردىڭ وكىلدەرى قاتىستى.

گەننادي گولوۆكين سپورتشىلاردىڭ پاريج وليمپياداسىنداعى جەتىستىكتەرىنە توقتالىپ، جارىس سيكلىنىڭ ءالى دە جالعاسىپ جاتقانىن اتاپ ءوتتى. سونىمەن قاتار 2028 -جىلى لوس-اندجەلەستە وتەتىن كەلەسى جازعى ويىندارعا دايىندىقتى قازىردەن باستاۋ كەرەكتىگىنە نازار اۋداردى.

باس اسسامبلەيانىڭ كۇن تارتىبىندە قارالعان سۇراقتاردىڭ ءبىرى - جاڭا باس حاتشىنى سايلاۋ. ءوز كەزەگىندە گەننادي گولوۆكين ءالىمجان اقايەۆتىڭ كانديداتۋراسىن ۇسىنىپ، ۇسىنىستى قاتىسۋشىلار ءبىراۋىزدان بەكىتتى.

«باس اسسامبلەيا مۇشەلەرىنە ماعان سەنىم ارتىپ، مەن ۇسىنعان كانديداتتى قولداعانى ءۇشىن العىس ايتامىن. ءالىمجان اقايەۆتى جاڭا قىزمەتكە سايلانۋىمەن قۇتتىقتايمىن. ونىڭ جىلدار بويى جيناعان تاجىريبەسى مەن ءبىلىمى العا قويىلعان ماقساتتارعا جەتۋگە كومەكتەسەرىنە سەنەمىن»، - دەدى گەننادي گولوۆكين.

انىقتاما: ءالىمجان اقايەۆتىڭ مەملەكەتتىك باسقارۋ ماگيسترى دارەجەسى (درەيك ۋنيۆەرسيتەتى، دەس موينەس، ايوۆا شتاتى، ا ق ش) ىسكەرلىك باسقارۋ ماگيسترى دارەجەسى (سولتۇستىك ايوۆا ماگيسترى، سەدار- فوللس، ايوۆا شتاتى، ا ق ش)، سىرتقى ساياسات سالاسىنداعى مەملەكەتتىك باسقارۋ ديپلومى (رەسەي س ءى م ديپلوماتيالىق اكادەمياسى، ماسكەۋ، ر ف) بار.

ءالىمجان اقايەۆ جەتى جىل كولەمىندە قازاقستان ۇلتتىق وليمپيادالىق كوميتەتىنىڭ حالىقارالىق قاتىناستار دەپارتامەنتىن باسقارىپ، حالىقارالىق فورۋمدار مەن كونفەرەنسيالاردا قازاقستان ۇلتتىق ۇ و ك مۇددەسىن قورعادى جانە قازاقستاننىڭ الەمدىك سپورت ارەناسىنداعى بايلانىسى مەن بەدەلىن نىعايتۋ جولىندا قىزمەت ەتتى. 2024 -جىلدىڭ اقپانىنان باستاپ قازاقستان ۇ و ك پرەزيدەنتىنىڭ حالىقارالىق ماسەلەلەر جونىندەگى كەڭەسشىسى قىزمەتىن اتقاردى.

اۆتور

كۇنسۇلتان وتارباي