قازىر ونىڭ جەلىنىڭ ماكسيمالدى تۇراقتى جىلدامدىعى ساعاتىنا 240 شاقىرىمعا دەيىن جەتىپ، داۋىلدىڭ 5-ساناتقا جاقىنداۋى بولجانىپ وتىر. بۇل تۋرالى ا ق ش ۇلتتىق داۋىل ورتالىعى حابارلادى.
ورتالىق مالىمەتىنە سۇيەنسەك، سەيسەنبى كۇنى ساعات 09:00 دەگى جاعداي بويىنشا «پولو» مەكسيكانىڭ سيۋاتانەحو قالاسىنان وڭتۇستىككە قاراي شامامەن 345 شاقىرىم جانە مانسانيلو قالاسىنان وڭتۇستىك-شىعىسقا قاراي 555 شاقىرىم جەردە بولعان. داۋىل شىعىس-وڭتۇستىك-شىعىس باعىتىندا ساعاتىنا 9 شاقىرىم جىلدامدىقپەن قوزعالىپ كەلە جاتقان.
ۇلتتىق داۋىل ورتالىعىنىڭ بولجامىنشا، «پولو» سەيسەنبى كۇنى شىعىس-وڭتۇستىك-شىعىس باعىتىندا قوزعالىسىن جالعاستىرىپ، كەيىن سەيسەنبى مەن سارسەنبى ارالىعىندا باعىتىن كۇرت وزگەرتىپ، سولتۇستىك-باتىس جانە باتىس-سولتۇستىك- باتىس باعىتتارىنا بەت الادى. الداعى بىرنەشە كۇندە داۋىلدىڭ نەگىزگى بولىگى مەكسيكانىڭ وڭتۇستىك-باتىس جاعالاۋىنا جاقىن ماڭدا، تەڭىزدە ساقتالادى دەپ كۇتىلەدى.
تەكپان- دە- گالەانادان مانسانيلوعا دەيىنگى اۋماقتا تروپيكالىق داۋىل تۋرالى ەسكەرتۋ جاريالاندى. بۇل ايماقتا سارسەنبى كۇنى تاڭەرتەڭنەن باستاپ تروپيكالىق داۋىلعا ءتان جاعدايلار بولۋى مۇمكىن.
«پولو» داۋىلى بەيسەنبىگە دەيىن گەررەرو مەن ميچواكان شتاتتارىنىڭ جاعالاۋىنداعى اۋداندارعا 100-200 ميلليمەتر جاۋىن-شاشىن اكەلۋى مۇمكىن. كەي جەرلەردە جاۋىن- شاشىن مولشەرى 300 ميلليمەترگە دەيىن جەتۋى ىقتيمال. بۇل، اسىرەسە، تاۋلى جەرلەردە ادام ومىرىنە قاۋىپ توندىرەتىن سۋ تاسقىنى مەن لاي كوشكىندەرىنە اكەلۋى مۇمكىن.
ۇلتتىق داۋىل ورتالىعى مەكسيكانىڭ وڭتۇستىك-باتىس جاعالاۋىنىڭ كەي بولىكتەرىندە ادام ومىرىنە قاۋىپ توندىرەتىن بيىك تولقىندار مەن كەرى اعىستار بولۋى مۇمكىن ەكەنىن دە ەسكەرتتى.
سونىمەن قاتار كاليفورنيا تۇبەگىنىڭ وڭتۇستىك شەتىنەن باتىس-وڭتۇستىك-باتىسقا قاراي ورنالاسقان «وداليس» تروپيكالىق داۋىلى دا كۇشەيىپ كەلەدى. ول سەيسەنبى كۇنى نەمەسە سەيسەنبىگە قاراعان ءتۇنى داۋىلعا اينالۋى مۇمكىن. قازىر ونىڭ جاعالاۋعا قاتىستى ەشقانداي ەسكەرتۋى جاريالانعان جوق.
ازور ارالدارىنىڭ وڭتۇستىك-باتىسىندا ورنالاسقان «فەي» تروپيكالىق داۋىلى سەيسەنبى كۇنى پوستتروپيكالىق قالدىق تومەن قىسىمدى ايماققا اينالادى دەپ كۇتىلەدى. قازىرگى ۋاقىتتا وعان بايلانىستى جاعالاۋدا ەشقانداي ەسكەرتۋ جاريالانبادى.
ەسكە سالا كەتسەك، بۇعان دەيىن جاپونيادا «دۋجيۋان» تايفۋنى نوسەر جاڭبىر مەن لاي كوشكىنىن تۋىنداتىپ، ادام شىعىنى بولعانىن جازدىق.