ولگەن قىزى ءتىرىلىپ كەلدى... امەريكالىقتار اسىراپ العان قازاق قىزى تۋعان اناسىمەن قاۋىشتى
25 جىل بۇرىن امەريكالىقتار اسىراپ العان قازاق قىزى تۋعان اناسىمەن قاۋىشتى. بۇل تۋرالى Jibek Joly تەلەارناسىنداعى «شەتەلدەگى قازاق بالالارى» باعدارلاماسىندا ايتىلدى.
گۇلميرا سەيدج سماعۇلوۆا 1997 -جىلى استانادا دۇنيەگە كەلگەن.
«مەن شالا تۋعان بالا ەكەنمىن. 9 اي بويى اۋرۋحانادا جاتىپپىن. سوسىن بالالار ۇيىنە اۋىستىرىلىپپىن. شامامەن 3 جاسىمدا مەنى اسىراپ الدى. مەنى اسىراپ العان ادامداردىڭ حيكاسى قىزىق. اسىراپ العان انام ءتۇس كورىپتى. وندا 3 جاسار قىز ءوزىنىڭ بالالارىمەن ويناپ ءجۇر. ءسويتىپ مەنى قازاقستاننان تاۋىپ الىپتى. تۋرا تۇسىندەگى قىزدى تاپقان. تاڭعاجايىپ وقيعا. مەن - 5 بالانىڭ كەنجەسىمىن. وزىمنەن ۇلكەن اعا-اپكەلەرىممەن جاقسى قارىم-قاتىناستامىز. ولاردى قاتتى جاقسى كورەمىن»، - دەيدى قىز.
ونىڭ سۇيىكتى كىتابى - كىشكەنتاي حانزادا. مەن ءوزىمدى ىزدەدىم. ءار قىرىمدى، ءار بولىگىمدى ىزدەدىم.
«بالا كەزىمنەن ءوز بەتىممەن شىققان جەرىمدى، تاريحىمدى بىلۋگە تىرىستىم. ءوزىمدى قازاقپىن دەپ ايتۋعا حاقىم بار-جوعىن بىلمەيمىن. ءبىراق ءارقاشان قازاق ەكەنىمدى ماقتانىشپەن ايتامىن».
ونىڭ ايتۋىنشا، العاش رەت قازاقتارمەن كەزدەسكەندە كەرەمەت سەزىمدە بولعان.
«تۋعان اكە-شەشەمە اشۋ-ىزا جوق. ولاردىڭ كىم ەكەنىن بىلمەيمىن. جۇرەگىمدە قۇرمەت پەن العىس قانا بار. اسىراپ العان اتا-انام تۋعان انامنىڭ جەڭىل ءجۇرىستى بولعانىن، مەنى تۋعاننان كەيىن قايتىس بولعانىن ايتتى. ولار مەنەن بىرنارسەنى جاسىرعانىن سەزدىم. وسىدان كەيىن ءبىزدىڭ قارىم-قاتىناسىمىز سۋىپ كەتكەندەي بولدى. ماعان وتىرىك ايتىپ، مەنى الداعانداي سەزىندىم. وسىدان كەيىن ءوزىم تۋرالى كوپ نارسە ءبىلدىم. تۋعان انام تۋرالى دا وتىرىك بولىپ شىقتى».
گۇلميرا سماعۇلوۆانىڭ تۋعان اناسى روزا سماعۇلوۆا 25 جىل بۇرىن ولدىگە سانالعان قىزىن العاش كورگەندە قانداي سەزىمدە بولعانىن ايتتى.
«ەستىگەن كەزدە قاتتى سترەسس بولدى، جۇرە الماي قالدىم. مەنىڭ قىزىم با دەپ قۇشاقتاپ ءسۇيدىم. 25 جىل باسىلىپ قالعان سەزىم عوي»، - دەيدى انا.
اناسىنىڭ ايتۋىنشا، گۇلميرانىڭ ەسىمىن و باستا ايىم دەپ قويعىسى كەلگەن. ول قىزىن كورمەگەن، باۋىرىنا باسىپ ۇلگەرمەگەن. بالانى تۋعاننان كەيىن ول جانساقتاۋ بولىمىنە تۇسكەن، ال 3 كۇننەن كەيىن قىزى شەتىنەپ كەتتى دەگەن حابار العان.