ۇكىمەت باسشىسىنىڭ ايتۋىنشا، ەل تاريحىنداعى ەڭ ءىرى ينفراقۇرىلىمدىق جوبالاردىڭ ءبىرى بولاتىن باعدارلامانىڭ ناتيجەسى ۇكىمەت پەن اكىمدىكتەردىڭ ۇيلەسىمدى جۇمىسىنا بايلانىستى.
- ونەركاسىپ جانە قۇرىلىس، كولىك، ەنەرگەتيكا، دەنساۋلىق ساقتاۋ جانە وقۋ-اعارتۋ مينيسترلىكتەرى اكىمدىكتەرمەن بىرلەسىپ، جىلدىڭ سوڭىنا دەيىن وڭىرلەردىڭ ينفراقۇرىلىمدىق جانە الەۋمەتتىك نىساندارعا دەگەن قاجەتتىلىگىنە تالداۋ جاساپ، ناقتى جوبالار تىزبەسىن قالىپتاستىرۋى قاجەت. بۇل جەرگىلىكتى جولدارعا، تۇرعىن ءۇي-كوممۋنالدىق شارۋاشىلىق جەلىلەرىنە، سونداي-اق ءبىلىم بەرۋ، مادەنيەت جانە مەديسينا مەكەمەلەرىنە دە قاتىستى، - دەدى ولجاس بەكتەنوۆ.
پرەمەر-مينيستر قۇرىلىس جۇمىستارىن وتاندىق ماتەريالدارمەن جانە جابدىقتارمەن قامتاماسىز ەتۋدىڭ ماڭىزدىلىعىنا دا توقتالدى. وسىعان بايلانىستى ونەركاسىپ جانە قۇرىلىس مينيسترلىگىنە سالالىق مەملەكەتتىك ورگاندارمەن بىرلەسىپ، جوبالاردى ىسكە اسىرۋعا قازاقستاندىق وندىرۋشىلەردى كەڭىنەن تارتۋ جونىندە شارالار قابىلداۋ تاپسىرىلدى.
ولجاس بەكتەنوۆ مەملەكەت باسشىسىنىڭ جولداۋىندا اگروونەركاسىپ كەشەنىن تەحنولوگيالىق جاڭعىرتۋعا، وتاندىق تراكتورلار مەن كومبايندار ءوندىرىسىن ۇلعايتۋعا ەرەكشە نازار اۋدارىلعانىن اتاپ ءوتتى.
- وسىعان بايلانىستى ونەركاسىپ جانە اۋىل شارۋاشىلىعى مينيسترلىكتەرىنە ءبىر اي ىشىندە فەرمەرلەر ءۇشىن اۋىل شارۋاشىلىعى تەحنيكاسىن شىعارۋدى ارتتىرۋ جونىندە ناقتى ۇسىنىستار ەنگىزۋدى تاپسىرامىن، - دەدى ۇكىمەت باسشىسى.
سونىمەن قاتار پرەمەر-مينيستر گەولوگيالىق بارلاۋ تاسىلدەرىن جەتىلدىرۋ جانە ستراتەگيالىق ماڭىزى بار مەتالداردىڭ قورىن ءتيىمدى باسقارۋ ماسەلەلەرىنە دە توقتالدى.
- ونەركاسىپ مينيسترلىگى ءبىرىڭعاي جەر قويناۋىن پايدالانۋ پلاتفورماسىنىڭ جۇيەلەرىن ينتەگراتسيالاۋ مەن قۇرىلىمداۋدى، ونىڭ ىشىندە جاساندى ينتەللەكتىنى پايدالانا وتىرىپ قامتاماسىز ەتۋى قاجەت، - دەدى ول.
ۇكىمەت باسشىسىنىڭ ايتۋىنشا، سيفرلىق جانە «جاسىل» تەحنولوگيالاردىڭ دامۋى، سونداي-اق اۆتوموبيل جاساۋ سالاسىنداعى سۇرانىستىڭ ارتۋى سيرەك كەزدەسەتىن مەتالداردىڭ ماڭىزىن كۇشەيتىپ وتىر. وسىعان بايلانىستى ونەركاسىپ مينيسترلىگى مۇنداي مەتالداردىڭ قورلارىن ءتيىمدى باسقارۋدىڭ ۇلتتىق جۇيەسىن قۇرۋى قاجەت.
سونىمەن قاتار 15 -جەلتوقسانعا دەيىن بيزنەس-قوعامداستىقپەن بىرلەسىپ، تاۋ-كەن مەتاللۋرگيا سالاسىن ودان ءارى دامىتۋ جونىندەگى ناقتى شارالار ازىرلەنۋگە ءتيىس. ونىڭ ىشىندە ونىمدەرگە كەپىلدىك بەرىلگەن سۇرانىستى قامتاماسىز ەتەتىن وففتەيك-كەلىسىمشارتتار تەتىگىن قولدانۋ كوزدەلگەن.
بۇدان بولەك، ونەركاسىپ جانە قۇرىلىس مينيسترلىگى ءوڭىر اكىمدىكتەرىمەن بىرلەسىپ، بۇرىن قابىلدانعان زاڭنامالىق نورمالاردى ىسكە اسىرۋ جونىندە شارالار قابىلداپ، وڭىرلەردىڭ كلاستەرلىك دامۋى بويىنشا كەلىسىلگەن شەشىمدەر ازىرلەۋى قاجەت.
ايتا كەتەيىك، ولجاس بەكتەنوۆ پەزيدەنت جاريالاعان «حالىقتىق قۇرىلىس» ازاماتتاردىڭ ءال- اۋقاتىنىڭ ارتۋىنا سەرپىن بەرەدى.