ولجاس بەكتەنوۆ يننوۆاتسيالىق جوبالارعا قولداۋ كورسەتەتىن پلاتفورمانى ىسكە قوسۋدى تاپسىردى
استانا. KAZINFORM - بارلىق ءوندىرىس ورىندارىنىڭ يننوۆاتسيالىق قىزمەتى مەن تەحنولوگيالىق دامۋ جاعدايىنا كەشەندى تۇگەندەۋ جۇرگىزىلەدى. بۇل تۋرالى ۇكىمەت وتىرىسىندا پرەمەر- مينيستر ولجاس بەكتەنوۆ ايتتى.
- عىلىم مينيسترلىگى مۇددەلى مەملەكەتتىك ورگاندارمەن بىرلەسىپ، 3 كۇندىك مەرزىمدە سالانى ۆەدومستۆوارالىق ۇيلەستىرۋ جانە تەحنولوگيالىق باسىمدىقتاردى ازىرلەۋ ءۇشىن ۇكىمەت جانىنان يننوۆاتسيالىق شتاب قۇرۋى قاجەت. پرەمەر- ءمينيستردىڭ ورىنباسارى ءتوراعالىق ەتەتىن شتاب باستاپقى يدەيادان ءونىم شىعارۋعا دەيىنگى وندىرىستىك كەزەڭ بويىنا يننوۆاتسيالىق ەكوجۇيەنىڭ بارلىق قاتىسۋشىلارىنىڭ كۇشىن جۇمىلدىرۋدى قاماماسىز ەتۋگە ءتيىس. شتابقا ايدا عالىم قىزى بالايەۆا (پرەمەر- ءمينيستردىڭ ورىنباسارى - مادەنيەت جانە اقپارات ءمينيسترى) باسشىلىق ەتەتىن بولادى. كاسىپورىنداردىڭ يننوۆاتسيالىق بەلسەندىلىگىن ىنتالاندىرۋ ءۇشىن وسى جىلدىڭ 1- ماۋسىمىنا دەيىن بارلىق ءوندىرىس ورنىنىڭ يننوۆاتسيالىق قىزمەتى مەن تەحنولوگيالىق دامۋ جاعدايىنا كەشەندى تۇردە تۇگەندەۋ جۇرگىزۋ كەرەك، - دەدى ولجاس بەكتەنوۆ.
سونىمەن قاتار ۇكىمەت باسشىسى عىلىم مينيسترلىگىنە مۇددەلى مەملەكەتتىك ورگاندارمەن بىرلەسىپ، وسى جىلدىڭ 1-ماۋسىمىنا دەيىن ناقتى باسىم سالالار مەن تەحنولوگيالارعا نازار اۋدارا وتىرىپ، يننوۆاتسيالاردى دامىتۋ تۇجىرىمداماسىن ازىرلەۋدى تاپسىردى.
- عىلىم جانە جاساندى ينتەللەكت مينيسترلىكتەرى سالالىق مينيسترلىكتەرمەن جانە اكىمدىكتەرمەن بىرلەسىپ، 1- شىلدەگە دەيىن يننوۆاتسيالىق جوبالاردى تىركەپ، قولداۋ كورسەتۋگە جانە مونيتورينگ جۇرگىزۋگە ارنالعان «ءبىرىڭعاي تەرەزە» جۇمىسىن قامتاماسىز ەتەتىن سيفرلىق پلاتفورمانى ىسكە قوسسىن. سونىمەن قاتار ازىرلەۋشىلەر، تەحنولوگيالار جانە الەۋەتتى ينۆەستورلار تۋرالى مالىمەتتەردى قامتيتىن يننوۆاتسيالىق جوبالاردىڭ جالپىعا قولجەتىمدى ۇلتتىق ءتىزىلىمىن قۇرۋ قاجەت، - دەدى پرەمەر- مينيستر.
بۇعان دەيىن ۇكىمەت وتىرىسىندا يننوۆاتسيچلاردى دامىتۋ ماسەلەسى تالقىلاناتىنىن جازعان ەدىك.