ولجاس بەكتەنوۆ تاۋارلاردىڭ ەلەكتروندىق كاتالوگىن جاپپاي ەنگىزۋدى تاپسىردى
استانا. KAZINFORM - قارجى مينيسترلىگى تاۋارلاردىڭ ەلەكتروندىق كاتالوگىن جاپپاي ەنگىزۋدى قامتاماسىز ەتۋى كەرەك. بۇل تۋرالى ۇكىمەت وتىرىسىندا پرەمەر- مينيستر ولجاس بەكتەنوۆ ايتتى.
«تاۋارلاردى قاداعالاۋدى قامتاماسىز ەتۋ ماقساتىندا جالپى سىنىپتاما بەكىتىلدى. ول شيكىزات پەن ءونىمدى سايكەستەندىرۋدىڭ حالىقارالىق ستاندارتتارىن قولدانۋعا، سونداي- اق بىزدەگى بارلىق كاتالوگتەردى بىرىكتىرۋگە باعىتتالعان. سوندىقتان قارجى مينيسترلىگى تاۋارلاردىڭ ەلەكتروندىق كاتالوگىن جاپپاي ەنگىزۋدى قامتاماسىز ەتۋى كەرەك»، - دەدى پرەمەر- مينيستر.
ۇكىمەت باسشىسىنىڭ اتاپ وتۋىنشە، جوعارى وقۋ ورىندارىنىڭ جانىندا عىلىمي زەرتتەۋلەر مەن زەرتحانالىق سىناقتاردىڭ كەڭ سپەكترىن جۇرگىزە الاتىن عىلىمي- زەرتتەۋ زەرتحانالارى جۇمىس ىستەيدى. ولاردىڭ الەۋەتىن پايدالانۋ قاجەت. سوندىقتان ولجاس بەكتەنوۆ عىلىم مينيسترلىگى ولاردىڭ بيزنەسپەن قارىم- قاتىناس جاساۋ تاسىلدەرىن دايىنداۋى كەرەكتىگىن باسا ايتتى.
«بيىل تەحنيكالىق رەتتەۋدىڭ اقپاراتتىق جۇيەسى ىسكە قوسىلدى. بۇل الاڭ بارىنشا اشىق بولىپ، مەملەكەتتىك ورگاندار، بيزنەس- قوعامداستىق پەن حالىق ءۇشىن ءبىرىڭعاي قول جەتكىزۋ نۇكتەسىنە اينالۋعا ءتيىس. ساۋدا مينيسترلىگى وسى اقپاراتتىق جۇيەنىڭ فۋنكتسيونالىن كەڭەيتكەنى ءجون»، - دەدى ول.