ولجاس بەكتەنوۆ: قوسىلعان قۇن سالىعىن كوتەرۋ - ءماجبۇرلى قادام
استانا. KAZINFORM - پرەمەر- مينيستر ولجاس بەكتەنوۆ ۇكىمەتتە وتكەن باسپا ءسوز ءماسليحاتىندا كەلەر جىلى قابىلداناتىن سالىق كودەكسى مەن ق ق س كوتەرۋگە ايتىلعان سىني پىكىرلەرگە جاۋاپ بەردى.
− سالىق كودەكسىندە قوسىلعان قۇن سالىعىن 16 پايىزعا دەيىن كوتەرۋ قاراستىرىلعانى راس. ارينە، كەز كەلگەن سالىقتى ارتتىرۋ اۋىر تيەدى. ءبىراق بۇل - ءماجبۇرلى قادام. وسى سالىق رەفورماسى ارقىلى ءبىز دامۋ بيۋدجەتىن اناعۇرلىم ۇلعايتۋدى جوسپارلاپ وتىرمىز. بۇعان دەيىن ەكونوميكالىق ءوسىم تۋرالى ايتىلدى. ەكونوميكالىق ءوسىم تەك قانا مەملەكەت ينفراقۇرىلىمدى جەدەل قارقىنمەن دامىتقان جاعدايدا مۇمكىن بولادى. سەبەبى كەز كەلگەن بيزنەستىڭ دامۋى ءۇشىن ينفراقۇرىلىم قاجەت. ال ينفراقۇرىلىمدى دامىتۋ ءۇشىن دامۋ بيۋدجەتى كەرەك، − دەپ جاۋاپ بەردى پرەمەر- مينيستر ءتىلشى سۇراعىنا.
پرەمەردىڭ ايتۋىنشا، بىزدەگى دامۋ بيۋدجەتىنىڭ دەڭگەيى سىن كوتەرمەيتىندەي تومەن. ول مەملەكەتكە ەكونوميكانىڭ دامۋ قارقىنىنا ىلەسىپ، ينفراقۇرىلىمدى تەز قارقىنمەن دامىتۋعا تولىق مۇمكىندىك بەرمەيدى.
− سوندىقتان ءبىز 2026 -جىلى سالىق كودەكسىن قابىلداۋ ارقىلى قوسىمشا بيۋدجەتتىك كىرىستەر الۋدى، دامۋ بيۋدجەتىن شامامەن 8 پايىزعا ارتتىرۋدى، ونى 18 پايىزعا جەتكىزۋدى كۇتىپ وتىرمىز. بۇل بىزگە تۇراقتى ەكونوميكالىق ءوسىمدى قامتاماسىز ەتۋگە مۇمكىندىك بەرەدى. ارينە، سالىقتاردىڭ ءوسۋى ۇنەمى سىنعا ۇشىرايدى. ءبىراق مۇندا بيزنەستىڭ، مەملەكەتتىڭ جانە قوعام مۇددەلەرى اراسىنداعى تەپە- تەڭدىكتى ساقتاۋ قاجەت. بەندجامين فرانكلين ايتىپتى: «بۇل ومىردە قاشىپ قۇتىلا المايتىن ەكى نارسە بار - ءولىم مەن سالىق». وكىنىشكە قاراي، بۇل - شىندىق. ءبىز ارينە، الداعى سالىق ءوسىمى بيزنەستىڭ بەلسەندىلىگىنە، ىسكەرلىك احۋالعا تەرىس اسەر ەتپەۋى ءۇشىن بارىنشا تىرىسامىز. ءبىزدىڭ باعالاۋىمىزشا، تەرىس ىقپال بولمايدى، − دەپ تولىقتىردى ولجاس بەكتەنوۆ.
ايتا كەتەيىك، بۇگىن ۇكىمەتتە بيىلعى قاڭتار- ماۋسىم ايلارىنداعى الەۋمەتتىك- ەكونوميكالىق دامۋ جانە رەسپۋبليكالىق بيۋدجەتتىڭ اتقارىلۋ قورىتىندىلارى قارالدى.
بۇعان دەيىن پرەمەر- مينيستر 2029 -جىلعا دەيىن جالپى ىشكى ءونىمدى 450 ميلليارد دوللارعا جەتكىزۋ تۋرالى پرەزيدەنت تاپسىرماسىن ورىنداۋ قانشالىقتى مۇمكىن ەكەنى تۋرالى پىكىر ءبىلدىردى.