ولجاس بەكتەنوۆ مەملەكەت باسشىسىنىڭ تاپسىرمالارىن ورىنداۋ بويىنشا كەڭەس وتكىزدى

استانا. KAZINFORM - پرەمەر-مينيستر ولجاس بەكتەنوۆ مەملەكەت باسشىسىنىڭ قاۋىپسىزدىك كەڭەسى وتىرىسىندا بەرگەن تاپسىرمالارىن ورىنداۋ بويىنشا كولىك، قارجى مينيسترلىكتەرى باسشىلىعىنىڭ، «سامۇرىق-قازىنا» قورى، «قازاقستان تەمىر جولى» ۇلتتىق كومپانياسى، ۇلتتىق قاۋىپسىزدىك كوميتەتى شەكارا قىزمەتى وكىلدەرىنىڭ قاتىسۋىمەن كەڭەس وتكىزدى. بۇل تۋرالى ۇكىمەتتىڭ باسپا ءسوز قىزمەتى حابارلادى.

پرەزيدەنت تاراپىنان ايتىلعان سىندى ەسكەرە وتىرىپ، نەگىزگى ينفراقۇرىلىمدىق جوبالاردى جۇزەگە اسىرۋ مەرزىمدەرىن قىسقارتۋ ماسەلەلەرى قارالدى. قازاقستان اۋماعىندا ورنالاسقان وتكىزۋ پۋنكتتەرىن جاڭعىرتۋ بويىنشا كورشى ەلدەرمەن ۋاعدالاستىقتاردى ساپالى ءارى ۋاقىتىلى ىسكە اسىرۋعا نازار اۋدارىلدى.

ەلىمىزدىڭ نارىعىن قولجەتىمدى باعاداعى اۆياتسيالىق وتىنمەن قامتاماسىز ەتۋ ءۇشىن وتاندىق مۇناي وڭدەۋ زاۋىتتارىن جاڭعىرتۋدى جەدەلدەتۋ تۋرالى شەشىم قابىلداندى.

پرەمەر-مينيستر «جاسىل دالىزدەردى» ۇيىمداستىرۋ جانە تيىمدىلىگىن ارتتىرۋ جونىندەگى جۇمىستاردىڭ ناتيجەلەرى ازاماتتار مەن بيزنەس ءۇشىن ايقىن بولۋى ءتيىس ەكەنىن اتاپ ءوتتى. ءتيىستى ورگاندارعا ترانزيتتىك جۇكتەر ءۇشىن كەدەندىك تەكسەرۋسىز تەتىكتى ەنگىزۋ تاپسىرىلدى.

سىرتقى قازاقستاندىق تەرمينالداردى قالىپتاستىرۋ بويىنشا جۇمىستار جۇرگىزىلىپ جاتىر.

پرەزيدەنتتىڭ تاپسىرمالارىن ەسكەرە وتىرىپ، تەمىرجول (20,5 پايىز) جانە قۇبىر كولىگىمەن (19,5 پايىز) جۇك تاسىمالداۋ كولەمىنىڭ ۇلعايۋى اياسىندا كولىك، قارجى مينيسترلىكتەرىنە مۇددەلى ۇيىمدارمەن بىرلەسىپ ءبىر اپتا مەرزىمدە ساۋدا جانە ترانزيت اعىنىنا اسەر ەتەتىن باسىم جوبالاردى قارجىلاندىرۋدى قامتاماسىز ەتۋ تاپسىرىلدى.

پرەمەر-ءمينيستردىڭ ءبىرىنشى ورىنباسارى رومان سكليارعا ەكى كۇن مەرزىمدە جەرگىلىكتى جەرلەردەگى جۇمىستاردى باقىلاۋ ماقساتىندا وڭىرلەرگە بارىپ، مەملەكەت باسشىسىنىڭ تاپسىرمالارىن ورىنداۋ جونىندەگى ءىس-شارالاردىڭ ەگجەي-تەگجەيلى جوسپارىن دايىنداۋ تاپسىرىلدى.

ايتا كەتەيىك، پرەزيدەنت كولىك سالاسىنداعى كەمشىلىكتەر ءۇشىن مارات قارابايەۆقا سوگىس جاريالادى.

اۆتور

ەلميرا ورالبايەۆا