ولجاس بەكتەنوۆ مەملەكەت باسشىسىن ەلدەگى سۋ تاسقىنى جاعدايى جونىنەن ۇنەمى حاباردار ەتىپ وتىر
استانا. KAZINFORM - پرەمەر-مينيستر، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى زارداپتارىن جويۋ جونىندەگى رەسپۋبليكالىق شتاب جەتەكشىسى ولجاس بەكتەنوۆ مەملەكەت باسشىسى قاسىم-جومارت توقايەۆتى ەلدەگى سۋ تاسقىنى جاعدايى مەن احۋالدى تۇراقتاندىرۋ بويىنشا قابىلدانىپ جاتقان شارالار تۋرالى ۇنەمى حاباردار ەتىپ وتىر.
ق ر ۇكىمەتى باسپا ءسوز قىزمەتىنىڭ حابارلاۋىنشا، پرەزيدەنت تاپسىرماسى بويىنشا، ولجاس بەكتەنوۆ بۇگىن اقتوبە جانە شىعىس قازاقستان وبلىستارىنا باردى. سونداي-اق وڭىرلىك شتاب جەتەكشىلەرىنىڭ قاتىسۋىمەن سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى زارداپتارىن جويۋ جونىندەگى رەسپۋبليكالىق شتاب وتىرىسىن وتكىزدى.
پرەمەر-ءمينيستردىڭ تاپسىرماسى بويىنشا ۆيتسە-پرەمەر، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى زارداپتارىن جويۋ جونىندەگى رەسپۋبليكالىق شتاب جەتەكشىسىنىڭ ورىنباسارى قانات بوزىمبايەۆ اتىراۋ وبلىسىنا، توتەنشە جاعدايلار ءمينيسترى شىڭعىس ءارىنوۆ قوستاناي وبلىسىنا جىبەرىلدى. مىندەت - سۋ تاسقىنى جاعدايىن تۇراقتاندىرۋ بويىنشا جەرگىلىكتى جۇمىستاردى ۇيلەستىرۋ.