ولجاس بەكتەنوۆ باعانى تۇراقتاندىرا الماعان اكىمدەردىڭ ماسەلەسىن جەكە قارايتىنىن ايتتى
استانا. KAZINFORM - پرەمەر-مينيستر ولجاس بەكتەنوۆ ۇكىمەت وتىرىسىندا ورىنباسارى سەرىك جۇمانعارينگە ينفلياتسيانى تومەندەتە الماعان وڭىرلەردىڭ ماسەلەسىن دەرەۋ بايانداپ وتىرۋدى تاپسىردى.
«سەرىك ماقاش ۇلى، اتالعان ماسەلەنىڭ الەۋمەتتىك ماڭىزى زور، سوندىقتان ونى قاتاڭ باقىلاۋدا ۇستاڭىز. ەگەر وڭىرلەر جەرگىلىكتى جەردە ينفلياتسيانى تومەندەتۋ بويىنشا قاجەتتى شارالار قابىلداماسا، ءتيىستى شەشىم قابىلداۋ ءۇشىن ماعان دەرەۋ بايانداۋىڭىزدى سۇرايمىن. وسى باعىتتاعى جۇمىستا تۇراقتاندىرۋ قورلارى، فورۆاردتىق جانە وففتەيك- كەلىسىمشارتتار، ءونىم قۇنىن ارزانداتۋدى سۋبسيديالاۋ، باعا تۇراقتىلىعىن قامتاماسىز ەتۋ بويىنشا ساۋدا سۋبەكتىلەرىمەن كەلىسىمدەر جاساۋ سياقتى پارمەندى تەتىكتەردى بەلسەندى پايدالانۋ كەرەك»، - دەدى ۇكىمەت باسشىسى.
سونداي-اق، ول ازىق- تۇلىك تاۋارلارىن وندىرۋگە ارنالعان باسىم داقىلداردىڭ ەگىس القاپتارىن ۇلعايتۋ قاجەتتىگىن ەسكە سالدى.
«اكىمدەر دەلدالدىق سحەمالاردى انىقتاۋ جونىندەگى وڭىرلىك كوميسسيالار جۇمىسىنىڭ تيىمدىلىگىن ارتتىرۋعا ءتيىس. ورتالىق جانە جەرگىلىكتى اتقارۋشى ورگاندارعا باقىلاۋدى كۇشەيتىپ، ينفلياتسيانى باقىلاۋ جانە تومەندەتۋ جونىندەگى شارالار كەشەنىن ساپالى ورىنداۋ بويىنشا شارالار قابىلداۋدى تاپسىرامىن. جوسپارلانعان جانە قولدانىستاعى بارلىق جوبالار بەلگىلەنگەن مەرزىمدەردە ىسكە اسىرىلۋعا ءتيىس»، - دەدى ول.