ولجاس بەكتەنوۆ اقتاۋ، قۇرىق تەڭىز پورتتارىنىڭ دامۋ جوسپارىمەن تانىستى

اقتاۋ. KAZINFORM - پرەمەر-مينيستر ولجاس بەكتەنوۆ ماڭعىستاۋ وبلىسىنا جۇمىس ساپارى اياسىندا ءوڭىردىڭ كولىك- لوگيستيكالىق جانە تۋريستىك الەۋەتىمەن تانىستى. اقتاۋ، قۇرىق تەڭىز پورتتارىندا بولىپ، سونداي-اق كەندىرلى كۋرورتتىق ايماعىن دامىتۋ پەرسپەكتيۆالارى قارالدى.

قۇرىق تەڭىز پورتىن ارالاۋ بارىسىندا پرەمەر-مينيسترگە جىل باسىنان بەرى جۇكتەردى اۋىستىرىپ تيەۋ كولەمى 1,5 ميلليون توننادان اسقانى، جىل سوڭىنا قاراي كولەمى 2,2 ميلليون تونناعا دەيىن جەتكىزىلەتىنى باياندالدى. بيىل تەرەڭدەتۋ جۇمىستارىن اياقتاپ، استىق تەرمينالىن ىسكە قوسۋ جوسپارلانىپ وتىر. لوگيستيكالىق كلاستەر قۇرۋ جانە پاروم فلوتىن جاڭارتۋ جۇمىستارى جۇرگىزىلۋدە. جالپى پەرسپەكتيۆالى جوبالىق قۋاتى جىلىنا 6 ميلليون توننا جۇكتى قۇرايدى. قۇرىق تەڭىز پورتى جىل بويى اۆتوكودىك جانە تەمىرجول پارومدارىن قابىلداي الادى، وسى ماقساتتا مامانداندىرىلعان 4-ايلاق بار.

مۇندا ولجاس بەكتەنوۆكە ەنەرگەتيكادا، مۇناي وڭدەۋ، حيميا ونەركاسىبى جانە باسقا دا سالالاردا پايدالانىلاتىن «جاسىل» سۋتەگىن ءوندىرۋ بويىنشا قازاق- نەمىس ينۆەستيتسيالىق جوباسى تانىستىرىلدى. كاسىپورىننىڭ قۋاتى 2 ميلليون تونناعا جەتەدى. ينۆەستيتسيا كولەمى €50 ميللياردتان اسادى. جوبانى ىسكە اسىرۋ كەزىندە سۋ تۇشىتۋ زاۋىتى مەن قۋاتى 40 گ ۆ ت جەك ستانساسىن سالۋ جانە پايدالانۋ جوسپارلانۋدا. جوبا اياسىندا 1,8 مىڭ جۇمىس ورنىن اشۋعا مۇمكىندىك بەرەدى.

پرەمەر-مينيستر اقتاۋ تەڭىز ساۋدا پورتىنىڭ قۋاتتىلىعىمەن تانىستى. نىسان ترانسكاسپي حالىقارالىق كولىك باعىتىن دامىتۋدا ماڭىزدى ءرول اتقارادى. ءوزىنىڭ تەحنيكالىق پارامەترلەرى مەن قالىپتاسقان بيزنەس- پروتسەستەرى بويىنشا پورت زاماناۋي حالىقارالىق ستاندارتتارعا سايكەس كەلەدى. تەحنيكالىق جابدىق جۇكتەردىڭ كەڭ اۋقىمىن وڭدەۋگە مۇمكىندىك بەرەدى. بۇگىنگى تاڭدا نىساننىڭ وتكىزۋ قابىلەتى 11 ميلليون توننادان اسادى. مۇندا ءۇش مۇناي قۇيۋ جانە ءۇش قۇرعاق جۇك ايلاعى، جىلىنا 800 مىڭ توننا اۋىل شارۋاشىلىعى ءونىمىن وتكىزۋگە قابىلەتتى استىق تەرمينالى، سونداي-اق پاروم كەشەنى بار. بيىلعى 8 ايدا پورت ارقىلى جۇكتەردى اۋىستىرىپ تيەۋ كولەمى 3 ميلليون توننادان استى، نەگىزگى باعىتتارى - يران، تۇرىكمەنستان، ازەربايجان، رەسەي جانە باسقا دا ەلدەر.

مۇندا اقتاۋ پورتى بازاسىندا كونتەينەرلىك حاب سالۋ جوسپارى تۋرالى باياندالدى. ينۆەستور رەتىندە قىتايدىڭ ەڭ ءىرى پورت كومپانيالارىنىڭ ءبىرى «ليانيۋنگان پورت كومپانيالار توبى» ج ش ق تارتىلدى. ينۆەستيتسيالىق جوبا تاسىمالداۋدى ورتا جانە ۇزاق مەرزىمدى جوسپارلاۋعا ىقپال ەتىپ، جۇكتەردى جەتكىزۋگە قولايلى جاعداي جاسايدى دەپ كۇتىلۋدە.

پرەمەر-مينيستر حالىقارالىق كولىك دالىزدەرىنىڭ تۇيىسكەن جەرىندە ورنالاسقان ماڭعىستاۋ وبلىسىنىڭ ستراتەگيالىق ماڭىزدىلىعىن اتاپ ءوتتى.

«مەملەكەت باسشىسى ۇكىمەتكە پورتتارىمىزدى كاسپيي تەڭىزىنىڭ جەتەكشى حابتارىنىڭ بىرىنە اينالدىرا وتىرىپ، ولاردى تۇرلەندىرۋ بويىنشا ستراتەگيالىق مىندەت قويدى. قازاقستاننىڭ گەوگرافيالىق ورنالاسۋى - ءبىزدىڭ ارتىقشىلىعىمىز، ونى بار مۇمكىندىگىنشە پايدالانۋ كەرەك. ماڭعىستاۋ وبلىسىنىڭ قۋاتتى ترانزيتتىك، لوگيستيكالىق جانە ينفراقۇرىلىمدى- سەرۆيستىك الەۋەتى وتە جوعارى، ونى ودان ءارى دامىتۋ قاجەت. سوندىقتان وتاندىق تەڭىز كولىك- لوگيستيكالىق كلاستەرىن كەڭەيتۋگە مۇمكىندىك بەرەتىن جاڭا جوبالاردى ىسكە اسىرۋ وتە ماڭىزدى»، - دەپ اتاپ ءوتتى ولجاس بەكتەنوۆ.

وڭىرگە جۇمىس ساپارى بارىسىندا مەملەكەت باسشىسىنىڭ بيىلعى ماۋسىمدا وتكەن تۋريزمدى دامىتۋ جونىندەگى كەڭەستە بەرگەن تاپسىرمالارىنىڭ ورىندالۋىنا ەرەكشە نازار اۋدارىلدى، ماڭعىستاۋ وبلىسى اكىمدىگىنىڭ دەرەكتەرى بويىنشا بيىل وڭىرگە 215 مىڭعا جۋىق دەمالۋشى كەلىپ، وتكەن جىلدىڭ سايكەس كەزەڭىمەن سالىستىرعاندا كەلۋشىلەر سانى %9,5- عا ارتقان. سالادا كورسەتىلگەن قىزمەت كولەمى 6,5 ميلليارد تەڭگەگە جەتتى. سوڭعى 2 جىلدا وبلىستا قوناق ۇيلەر مەن دەمالىس ورىندارىن سالۋ بويىنشا 4 ءىرى ينۆەستيتسيالىق جوبا ىسكە اسىرىلدى. 2025-2027 -جىلدارى تۋريزم سالاسىندا 500-دەن استام جۇمىس ورنىناشۋ ارقىلى تاعى 12 جوبانى ىسكە قوسۋ جوسپارلانۋدا.

كەندىرلى كۋرورتتىق ايماعى - ماڭعىستاۋ وبلىسىنىڭ تانىمال ورىنداردىڭ ءبىرى. ولجاس بەكتەنوۆكە تۋريستىك اعىندى ارتتىرۋعا باعىتتالعان نەگىزگى ينفراقۇرىلىمدىق جوبالاردى ىسكە اسىرۋ جوسپارلارى تۋرالى باياندالدى. ونىڭ قاتارىندا حالىقارالىق اۋەجاي، قۋاتتىلىعى تاۋلىگىنە 50 مىڭ كۆپ مەتىر سۋ تۇشىتۋ زاۋىتى كىرەدى. سونىمەن قاتار جالپى ۇزىندىعى 156 شاقىرىمدى قۇرايتىن «جاڭاوزەن- كەندىرلى- تۇرىكمەنستان شەكاراسى» جولىنا ورتاشا جوندەۋ جۇمىستارى جۇرگىزىلمەك.

«ماڭعىستاۋ وبلىسىنداعى تۋريستىك الەۋەتتىڭ ودان ءارى دامۋ پەرسپەكتيۆاسى ايتارلىقتاي زور. ول ءۇشىن وڭىردە تەڭىز، تاڭعاجايىپ پەيزاجدار، تاريحي ەسكەرتكىشتەر مەن كيەلى ورىندار بار. ساپالى سەرپىلىس ءۇشىن ينفراقۇرىلىمدى دامىتىپ، ينۆەستيتسيا تارتۋ جانە جاڭا نىساندار سالۋ قاجەت. ءتيىستى مينيسترلىكتەر مەن اكىمدىككە بۇل ماسەلەلەردىڭ بارلىعىن ەرەكشە باقىلاۋدا ۇستاۋدى تاپسىرامىن»، - دەپ اتاپ ءوتتى ولجاس بەكتەنوۆ.

اۆتور

كۇنسۇلتان وتارباي