بۇل تريبۋنالدىڭ 15 سۋدياسىنىڭ ءبىرى اننا كورۆين-پيوتروۆسكا تريبۋنالدىڭ ءتوراعاسى بوگدان سۆەنچكوۆسكي مەن ءتوراعانىڭ ورىنباسارى بارتولومەي سوحانسكيدى ءبىر ايعا مىندەتتەرىنەن شەتتەتۋ تۋرالى شەشىم قابىلداعاننان كەيىن ەلدەگى ساياسي جاعداي ۋشىعىپ كەتكەن.
30-قازاندا جاريالانعان قۇجاتتا ەكى باسشى دا 2026-جىلى سەيم (پارلامەنت) تاعايىنداعان سۋديالاردىڭ ىستەردى قاراۋىنا كەدەرگى كەلتىرگەنى ايتىلعان. اننا كورۆين-پيوتروۆسكا بۇل شەشىمدى قابىلداۋ قۇقىعىن 2016-جىلعى تريبۋنالدىڭ ۇيىمداستىرىلۋى مەن جۇمىس ىستەۋ ءتارتىبى تۋرالى زاڭعا سۇيەنە وتىرىپ قولدانعانىن، 3-قاراشادا تريبۋنال سۋديالارىنىڭ جالپى جينالىسى وتەتىنىن جاريالادى.
سول ۋاقىتتا مەملەكەتتىك ورگاننىڭ X الەۋمەتتىك جەلىسىندەگى پاراقشاسىندا ورگان سايتىنىڭ «زاڭسىز باسىپ الىنعانى» تۋرالى حابارلاندى.
- تريبۋنالدىڭ ءتوراعاسى بوگدان سۆەنچكوۆسكي بولىپ قالا بەرەدى، ال ونىڭ ورىنباسارى - بارتولومەي سوحانسكي. اننا كورۆين-پيوتروۆسكا كونستيتۋتسيالىق تريبۋنالدىڭ سۋدياسى ەمەس. بۇل ارەكەتتەرگە قاتىسقان بارلىق ادامدار قىلمىسقا بارىپ مەملەكەتتىك توڭكەرىس جاساپ وتىر، - دەلىنگەن حابارلامادا.
تريبۋنالدىڭ سايتىندا جوعارىدا اتالعان X جەلىسىندەگى پاراقشانىڭ ورگانعا ەشقانداي قاتىسى جوق ەكەنى ايتىلعان.
«مەملەكەتتىك توڭكەرىس» تۋرالى سوحانسكي دەايتتى
- نە بولىپ جاتقانىن بىلمەيمىن. اننا كورۆين-پيوتروۆسكا حانىم ماعان قوڭىراۋ شالىپ، ەندى تريبۋنالعا باسشىلىق ەتەتىنىن ايتتى. مەن باسقا ەشتەڭە بىلمەيمىن، - دەدى ول Rzeczpospolita گازەتىنە پىكىر بىلدىرە وتىرىپ.
سوحانسكي «كوز كورىپ، قۇلاق ەستىمەگەن وقيعا» بولىپ جاتقانىن ايتتى.
- مەن ەشقاشان ماعان قارسى شاعىمدار ەستىگەن ەمەسپىن. مەنى قىزمەتتەن الۋعا وكىلەتتىگى بار ەشكىمدى تانىمايمىن. تريبۋنالدىڭ نەمەسە جەكە سۋديانىڭ تاۋەلسىزدىگىنە مۇنداي ارالاسۋعا مۇمكىندىك بەرەتىن ەشقانداي زاڭدى ەرەجەنى بىلمەيمىن. مەملەكەتتىك توڭكەرىس ءجۇرىپ جاتىر، - دەپ اتاپ ءوتتى سوحانسكي.
تۋسك وسى وقيعالاردى قولدادى
قازىرگى پرەزيدەنت كارول ناۆروتسكيگە سەيممەن بىرگە وپپوزيتسيالىق ۇستانىمداعى پولشا پرەمەر-ءمينيسترى دونالد تۋسك كونستيتۋتسيالىق تريبۋنال باسشىلىعىنىڭ ۋاقىتشا قىزمەتىنەن شەتتەتىلۋىن قولدادى.
- زاڭ ۇستەمدىگىن قالپىنا كەلتىرۋ - ءبىزدىڭ مىندەتىمىز. بيلىكتەگى زاڭ جانە ادىلەتتىلىك (PiS) پارتياسىنىڭ كوپجىلدىق زاڭسىز ارەكەتتەرىنەن كەيىن شەشۋشى شارالاردى قاجەت ەتەتىن قيىن، كەيدە اۋىر پروتسەستى باستاۋعا ءماجبۇرمىز. باسقا جول جوق، - دەپ جازدى ول X پاراقشاسىندا.
پولشا پرەزيدەنتى سەنەگالعا ساپارىن توقتاتتى
پولشا پرەزيدەنتى كارول ناۆروتسكي كونستيتۋتسيالىق سوت اۋماعىنا پوليتسيا كەلگەنىن جانە سوت ءتوراعاسى بوگدان سۆەنچكوۆسكي قىزمەتىنەن شەتتەتىلگەنىن بىلگەن سوڭ، سەنەگالعا باعىت العان ۇشاعىن كەرى بۇرىپ، ەلىنە ورالدى.
- مۇنداي ساتتە پرەزيدەنت پولشادا بولۋى كەرەك. سەنەگالعا بارا جاتقان ساپارىمدى توقتاتىپ، ەلگە قايتىپ جاتىرمىن، - دەپ جازدى ول X الەۋمەتتىك جەلىسىندە.
ۆارشاۆا پوليتسياسىنىڭ تۇسىنىكتەمەسى
ۆارشاۆا پوليتسياسى باس پروكۋرور جانە ادىلەت ءمينيسترى ۆالدەمار جۋرەكتەن عيماراتتىڭ اينالاسىندا ءوتىپ جاتقان نارازىلىق اكسيالارى كەزىندە كونستيتۋتسيالىق تريبۋنالدىڭ قاۋىپسىزدىگىن قامتاماسىز ەتۋگە ەرەكشە نازار اۋدارۋدى سۇراعان ءوتىنىش العانىن مالىمدەدى. سونىمەن قاتار، قۇقىق قورعاۋ ورگاندارىنىڭ قىزمەتكەرلەرىنە تريبۋنال سۋديالارىنىڭ ءبىرىنىڭ «ءومىرى مەن دەنساۋلىعىنا تونەتىن ىقتيمال ءقاۋىپ» تۋرالى حات كەلىپ ءتۇستى.
جاۋاپ رەتىندە پوليتسيا عيماراتتى قورشاۋعا الدى. قۇقىق قورعاۋ ورگاندارى قىزمەتكەرلەرىنىڭ عيمارات ىشىنە كىرمەگەنى ايرىقشا ايتىلدى. پوليتسيا نارازىلىق بىلدىرۋشىلەر ولارعا «قاۋىپتى زاتتاردى» لاقتىرعانىن مالىمدەدى. قورشاۋدان اسىپ ءتۇسىپ، تريبۋنال اۋماعىنا كىرگەن ءۇش شەرۋشى ۇستالدى.
پولشاداعى تريبۋنالعا قاتىستى قاقتىعىس بىرنەشە ايدان بەرى ءورشىپ كەلەدى.
كەيىنگى اپتالاردا كونستيتۋتسيالىق سوت عيماراتىنىڭ الدىندا وپپوزيتسيا وكىلدەرى نارازىلىق اكسيالارىن وتكىزىپ جاتىر. بۇعان پرەمەر-مينيستر دونالد تۋسكتىڭ ءوز ۇكىمەتىندە بۇرىن مينيستر بولعان مارچين بەرەكتى وسى سوتتىڭ سۋدياسى ەتىپ تاعايىنداۋ تۋرالى شەشىمى سەبەپ بولعان.
بۇعان دەيىن پولشادا پرەمەر-مينيسترگە شابۋىل جاساماق بولعان كۇدىكتى ۇستالعانىن حابارلاعان ەدىك.