مامانداردىڭ الدىن الا باعالاۋىنشا، عيباداتحانا شامامەن 1140 -جىلى سالىنعان. بۇل مەرزىم راستالسا، ول پولشا اۋماعىنان تابىلعان وسى تيپتەگى ەڭ كونە اعاش شىركەۋ بولماق.
ارحەولوگتار شىركەۋدەن بولەك، اعاشتان سالىنعان تۇرعىن ۇيلەردىڭ قالدىقتارى مەن ورتاعاسىرلىق زيراتتى دا تاپقان. زەرتتەۋشىلەردىڭ مالىمەتىنشە، عيماراتتىڭ كەيبىر قۇرىلىمدارى 1,5 مەترگە دەيىنگى بيىكتىكتە ساقتالعان. الايدا نىساننىڭ ەداۋىر بولىگى ءالى دە كورشى كوشەنىڭ استىندا جاتىر.
گدانسك بيلىگى ساقتالعان قۇرىلىمداردى اينالاسىنداعى تاريحي قاباتپەن بىرگە قازىپ الىپ، كونسەرۆاتسيالاۋ مۇمكىندىگىن قاراستىرىپ جاتىر. كەيىن كونە جادىگەردى كوپشىلىك نازارىنا ۇسىنۋ جوسپارلانىپ وتىر. مامانداردىڭ پىكىرىنشە، مۇنداي ءتاسىل ەرتە ورتا عاسىرلارعا تيەسىلى بىرەگەي تاريحي ەسكەرتكىشتى بولاشاق ۇرپاققا ساقتاپ قالۋعا مۇمكىندىك بەرەدى.
بۇرىنعى بالمۇزداق ساتاتىن ءدامحانا ورنالاسقان اۋماقتا ارحەولوگيالىق زەرتتەۋلەر 2023 -جىلدان بەرى جۇرگىزىلىپ كەلەدى. بۇعان دەيىن مۇندا ورتاعاسىرلىق جەرلەۋ ورىندارى مەن XIII عاسىرعا تيەسىلى تاس قۇلپىتاستار تابىلعان. الايدا اعاش شىركەۋدىڭ انىقتالۋى قازبا جۇمىستارى بارىسىندا جاسالعان ەڭ ماڭىزدى جاڭالىقتاردىڭ بىرىنە اينالدى.