بۇل تۋرالى Kazinform Reuters اگەنتتىگىنە سىلتەمە جاساپ حابارلادى.
- مۇنداي ساتتە پرەزيدەنت پولشادا بولۋى كەرەك. سەنەگالعا بارا جاتقان ساپارىمدى توقتاتىپ، ەلگە قايتىپ جاتىرمىن، - دەپ جازدى ول X الەۋمەتتىك جەلىسىندە.
پوليتسيانىڭ مالىمەتىنشە، قىزمەتكەرلەر كونستيتۋتسيالىق سوت عيماراتىنىڭ ماڭىندا بولعان وقيعالاردان كەيىن ونىڭ اۋماعىنا بارعان. اتاپ ايتقاندا، قۇقىق قورعاۋ ورگاندارىنىڭ قىزمەتكەرلەرىنە قاۋىپتى زاتتار لاقتىرىلعان.
كونستيتۋتسيالىق سوتتىڭ سايتىندا جۇما كۇنى ونىڭ ءتوراعاسى بوگدان سۆەنچكوۆسكيدىڭ مىندەتىن اتقارۋدان شەتتەتىلگەنى تۋرالى اقپارات جاريالاندى.
كونستيتۋتسيالىق سوت توڭىرەگىندەگى ۇزاققا سوزىلعان ساياسي جانجال مەكەمەنىڭ جۇمىسىن ءىس جۇزىندە توقتاتىپ تاستاعان.
كەيىنگى اپتالاردا كونستيتۋتسيالىق سوت عيماراتىنىڭ الدىندا وپپوزيتسيا وكىلدەرى نارازىلىق اكسيالارىن وتكىزىپ جاتىر. بۇعان پرەمەر-مينيستر دونالد تۋسكتىڭ ءوز ۇكىمەتىندە بۇرىن مينيستر بولعان مارچين بەرەكتى وسى سوتتىڭ سۋدياسى ەتىپ تاعايىنداۋ تۋرالى شەشىمى سەبەپ بولعان.
30-قازاندا پولشا ادىلەت ءمينيسترى ۆالدەمار جۋرەك كونستيتۋتسيالىق سوت ءتوراعاسىنىڭ مىندەتىن اتقارۋشى بوگدان سۆەنچكوۆسكيدى قىزمەتىنەن شەتتەتۋ تۋرالى ءوتىنىش جولدادى.
ەسكە سالايىق، بۇعان دەيىن پولشادا پرەمەر-مينيسترگە شابۋىل جاساماق بولعان كۇدىكتى ۇستالعانى جونىندە جازعانبىز.