پولشا پرەزيدەنتى ازاماتتاردى قورلاعانى ءۇشىن سوتقا شاقىرىلدى

استانا. KAZINFORM - پولشا پرەزيدەنتى اندجەي دۋدا ازاماتتارعا ءتىل تيگىزۋ ءىسى بويىنشا پرەزيدەنتتىك مەرزىمى اياقتالعان سوڭ سوتقا شاقىرىلادى.

بۇل تۋرالى پولشانىڭ كسەنوفوبيا مەن ناسىلشىلدىك مىنەز-قۇلىقتى باقىلاۋ ورتالىعى حابارلادى، دەپ جازادى بەلتا اگەنتتىگى.

بۇعان دەيىن ورتالىق پرەزيدەنت كوشى-قون داعدارىسى تاقىرىبىن كوتەرگەن «جاسىل شەكارا» فيلمىنە قاتىستى مالىمدەمەسىنە بايلانىستى شاعىم تۇسىرگەن بولاتىن. تەلەديداردا دۋدا كينوعا كەلۋشىلەردىڭ «شوشقا» ەكەنىن مەڭزەگەن.

ناقتىراق ايتاتىن بولساق، اندجەي دۋدا پولشانىڭ TVP ارناسىندا فيلمدى سىناپ، «پولشا شەكاراشىلاردى قورلاپ جاتىر» دەدى. سونداي-اق، پرەزيدەنت فيلمدى تاماشالاعان شەكاراشىلاردىڭ «كينوتەاتردا تەك شوشقالار وتىرادى» دەگەن ءسوزدى قولدانعانىنا تاڭقالماعانىن ايتتى. وسى مالىمدەمەدەن كەيىن كوپ ۇزاماي ورتالىق پرەزيدەنتتىڭ ۇستىنەن سوتقا شاعىم تۇسىرگەنىن حابارلادى.

ۆارشاۆا اۋداندىق سوتىندا ورتالىقتىڭ پرەزيدەنتكە قارسى ارىزى بويىنشا تىڭداۋ 2025 -جىلدىڭ 24-قازانىندا جەرگىلىكتى ۋاقىت بويىنشا ساعات 10:00 گە بەلگىلەندى. ءىس اشىق جانە كەز كەلگەن ادام سوت زالىنان ترانسلياتسيانى كورە الادى.

فيلم تۋرالى: رەجيسسەر اگنەسكي گوللاند تۇسىرگەن «جاسىل شەكارا» فيلمىنىڭ پرەمەراسى 2023 -جىلدىڭ قىركۇيەگىندە ۆەنەتسيا كينوفەستيۆالىندە ءوتتى. فيلمدە 2020 -جىلداردىڭ باسىنداعى بەلارۋس-پولشا شەكاراسىندا بولعان وقيعالار سۋرەتتەلەدى. باستى كەيىپكەرلەر - بوسقىندار، اۋعانستاننان كەلگەن اعىلشىن مۇعالىمى جانە سيريالىق وتباسى. ولار ە و ەلدەرىنە كىرۋگە تىرىسىپ، شەكارادا تۇرىپ قالادى.