ونلاين ويىندار مەن ماركەتپلەيستەرگە جاڭا تالاپ: بالالاردىڭ سيفرلىق قاۋىپسىزدىگى قالاي قورعالادى

استانا. قازاقپارات - قازاقستاندا بالالاردىڭ سيفرلىق ورتاداعى قاۋىپسىزدىگىن كۇشەيتۋ ءۇشىن ونلاين ويىندار مەن ماركەتپلەيستەرگە جاڭا ەرەجەلەر ەنگىزىلمەك. بۇل تۋرالى قۇرىلتايداعى ۇكىمەت ساعاتىندا ۆيتسە-سپيكەر دينارا زاكيەۆا مالىمدەدى.

Фото: Midjourney

 «بالالاردىڭ سيفرلىق جانە اقپاراتتىق قاۋىپسىزدىگى تۋرالى» جاڭا زاڭ جوباسى كامەلەتكە تولماعانداردى قورعاۋدى كۇشەيتۋ ءۇشىن سيفرلىق جانە اقپاراتتىق ورتانى كەشەندى رەتتەۋگە باعىتتالعان.

 نەگىزگى جاڭاشىلدىقتار: ويىندارعا تاڭبالاۋ ەنگىزىلەدى

ونلاين ويىنداردى قوسا العاندا، بارلىق سيفرلىق ونىمدەردىڭ مازمۇنىن مىندەتتى تۇردە تاڭبالاۋ تالابى ەنگىزىلەدى. وندا ويىن ىشىندەگى ساتىپ الۋلار، پايدالانۋشىلار اراسىنداعى بايلانىس جانە حات الماسۋ مۇمكىندىكتەرى سياقتى ىقتيمال سيفرلىق قاتەرلەر تۋرالى مالىمەت بولۋى كەرەك. ۋاكىلەتتى مەملەكەتتىك ورگان مۇنداي ونىمدەردى مىندەتتى تەكسەرۋدەن وتكىزىپ، مونيتورينگ جۇرگىزەدى. تالاپ بۇزىلسا، ونىمگە، قوسىمشاعا نەمەسە ويىنعا كىرۋدى شەكتەۋ، جويۋ جانە بۇعاتتاۋ تەتىكتەرى ىسكە قوسىلادى.

 ماركەتپلەيستەردەگى ساۋدا باقىلانادى

 ءدال وسىنداي ءتاسىل كامەلەتكە تولماعانداردىڭ ەلەكتروندىق ساۋدا الاڭدارىندا تاۋار ساتىپ الۋىن رەتتەۋگە دە قولدانىلماق. بارلىق پلاتفورماعا «اتا-انا باقىلاۋى» زاڭ جوباسىندا بارلىق سيفرلىق پلاتفورمالاردا «اتا- انا باقىلاۋى» تەتىگىن ەنگىزۋ كوزدەلگەن. ياعني تاڭبالانباعان جانە تەكسەرىلمەگەن قوسىمشالار مەن ويىندار بالاعا قولجەتىمسىز بولادى.

 بالالار ID- كارتاسى

 زاڭ جوباسىندا بالانىڭ جەكە باسىن سەنىمدى تۇردە انىقتاۋعا مۇمكىندىك بەرەتىن فوتوسۋرەتى بار بالالار ID- كارتاسىن ەنگىزۋ ۇسىنىلدى. ول 18 جاسقا دەيىنگى كامەلەتكە تولماعانداردى قولداۋدىڭ ءبىرىڭعاي سيفرلىق مارشرۋتىنىڭ نەگىزى بولادى جانە مەملەكەتتىك قولداۋ شارالارىن ۇيلەستىرۋگە مۇمكىندىك بەرەدى.

ايتا كەتەيىك، بۇل - AI- Quryltai زياتكەرلىك ورتاسىندا ازىرلەنگەن العاشقى زاڭ جوباسى. پلاتفورماعا زاڭنامالىق ويلاۋ قابىلەتى بار جاساندى ينتەللەكت مودەلى كىرىكتىرىلگەن. دينارا زاكيەۆا اتاپ وتكەندەي، ج ي ۇسىنعان بارلىق ۇسىنىستار دەپۋتاتتار مەن ساراپشىلاردىڭ قوسىمشا تەكسەرۋىنەن ءوتتى.