گولان جوتاسىنا باراتىن قازاقستاندىق اسكەريلەردىڭ سانى ارتۋى مۇمكىن بە - مينيسترلىك جاۋابى

  استانا. KAZINFORM -قازاقستاننىڭ دەربەس بىتىمگەرلىك كونتينگەنتىنىڭ پارلامەنت بەكىتكەن سانى وزگەرتىلۋى مۇمكىن.

بۇل تۋرالى قورعانىس ءمينيسترىنىڭ ورىنباسارى دارحان احمەديەۆ Kazinform ساۋالىنا جولداعان جاۋابىندا جازدى.

«430 دەگەن سان ق ر پارلامەنتىنىڭ ق ر قارۋلى كۇشتەرىنە بەرگەن بىتىمگەرلەردىڭ شەكتى سانى. الايدا، قازاقستان قارۋلى كۇشتەرى قازىرگى ۋاقىتتا بىردەن 430 اسكەري قىزمەتشىنى جولدامايدى. بۇل ورتا جانە ۇزاق مەرزىمدى كەزەڭگە قويىلعان جوسپار. گولان بيىكتىكتەرىنە 139 اسكەري بىتىمگەر جولداناتىن بولادى. ەگەر دە ب ۇ ۇ- نىڭ قاجەتتىلىگى بۇل ساننان اساتىن بولسا، قازاقستان رەسپۋبليكاسى زاڭناماسىندا كورسەتىلگەن سايكەسىنشە پروتسەستەن قايتادان ءوتىپ، ق ر پارلامەنتىنىڭ جاڭا قاۋلىسى قاجەت بولادى»، - دەلىنگەن جاۋاپتا.

ءمينيستردىڭ ورىنباسارى گولان جوتاسىنا باراتىن 139 اسكەريدىڭ بىتىمگەرلىك قىزمەتىنىڭ مەرزىمى تۋرالى دا مالىمەت بەردى.

«العاشقى كونتينگەنتتىڭ ميسسيادا بولۋ مەرزىمى 12 اي بولادى. كەلەسى كونتينگەنتتەر دە ميسسيادا 12 اي بولادى دەپ جوسپارلانۋدا. بۇل مەرزىم ب ۇ ۇ- نىڭ باسقا ەلدەردىڭ كونتينگەنتتەرىنە بەرەتىن ۇسىنىسى (رەكومەنداتسيا) بولىپ تابىلادى» - دەپ جازىلعان رەسمي جاۋاپتا.

اۆتور

ەسىمجان ناقتىباي