ول 24 ساعات جۇمىس ىستەيدى - يلون ماسكتىڭ اناسى ۇلى تۋرالى ايتتى

الماتى. KAZINFORM - ورتالىق ازيا ايەلدەرىنىڭ فورۋمىندا مەي ماسك تابىستى بالا تاربيەلەۋدىڭ قۇپياسىن ءبولىستى.

مەي ماسك رەسپۋبليكا سارايىندا وتىرعان 3 مىڭ كورەرمەننىڭ كوكەيىندەگى ساۋالعا جاۋاپ بەردى. ايتا كەتەيىك، مارتەبەلى مەيماننىڭ ەكى ۇلى، ءبىر قىزى بار. ولار - يلون ماسك، كيمبال ماسك جانە قىزى توسكا ماسك.

يلون ماسك - كاسىپكەر (SpaceX, Tesla). كيمبال ماسك - رەستوراتور. توسكا ماسك - كينورەجيسسەر جانە Passionflix نەگىزىن قالاۋشى.

«مەن بالالارىمدى ماقتان تۇتامىن جانە ولاردىڭ تاڭداۋىنا ارالاسپاۋعا تىرىسامىن. ولاردىڭ ءارقايسىسى ومىردە ءوز جولىن تاپتى. كيمبال بيزنەس سالاسى بويىنشا ءبىلىم الدى. توسكا كينونى جاقسى كوردى جانە كينويندۋستريادا بولۋدى ارماندادى. ءبىز ونىڭ زاڭگەر بولعانىن قالادىق، ءبىراق ول رومانتيك ايەلدەر تۋرالى فيلم تۇسىرگىسى كەلەتىنىن ايتتى. ءبىز يلوندى ماقتان تۇتامىز. ول الەمگە كوپ جاقسىلىق جاسايتىن تۇلعا. ونى ءاردايىم قولدايمىز، ءبىراق ونىڭ ورنىندا بولعىمىز كەلمەيدى. ويتكەنى، قاۋىپ كوپ. تۇنگى ساعات 12 دە بارلىق ارىپتەستەرىن جيناپ، جينالىس وتكىزەدى. 24 ساعات جۇمىس ىستەيدى. ەڭبەگىنىڭ ناتيجەسىن كورىپ جۇرسىزدەر»، - دەدى مەي ماسك.

سونىمەن قاتار، مەي ماسك يلونعا قاتىستى ءبىر وقيعانى ايتىپ بەردى.

«PayPal-دى ساتقاننان كەيىن، يلون مەنەن ەندى نەمەن اينالىسايىن دەپ سۇرادى. زىمىراندار، ەلەكتروموبيلدەر نەمەسە كۇن ەنەرگياسى. اناسى رەتىندە وعان بىرەۋىن تاڭداپ، ازداپ دەمالۋعا كەڭەس بەردىم، ويتكەنى ول كوپ جۇمىس ىستەيدى. ءبىراق، كورىپ وتىرعاندارىڭىزداي، ول مەنى تىڭدامادى جانە وسى ءۇش باعىتتى دا تاڭدادى»، - دەپ ءبولىستى مەي ماسك.

وسىعان دەيىن 76 جاستاعى كانادالىق- وڭتۇستىك افريكالىق مودەل قازاقستانعا كەلگەنىنە وتە قۋانىشتى ەكەنىن جەتكىزگەن ەدى.

اۆتور
الما مۇقانوۆا