وسىعان بايلانىستى «قازپوشتا» ا ق الماتى فيليالى ديرەكتورىنىڭ EMS قىزمەتى جونىندەگى ورىنباسارى تىلەۋگۇل يماشيەۆا جوعالعان جونەلتىلىمدەر بويىنشا كومپانيا قانداي تارتىپپەن جۇمىس ىستەيتىنىن ءتۇسىندىردى.
ونىڭ ايتۋىنشا، ءاربىر سالەمدەمەگە بىرەگەي ترەك-ءنومىر بەرىلەدى جانە ول جونەلتىلگەن ساتتەن باستاپ جەتكىزىلگەنگە دەيىنگى بارلىق كەزەڭدە جۇيە ارقىلى باقىلاۋدا بولادى.
ءار سالەمدەمەگە قاتىستى بارلىق اقپارات جۇيەدە ساقتالادى. قىزمەتكەرلەر كەز كەلگەن ۋاقىتتا ونىڭ قاي جەردە تۇرعانىن ارنايى ەسەپتەر ارقىلى كورە الادى. سوندىقتان ءاربىر جونەلتىلىمنىڭ قوزعالىسى تولىق باقىلانادى، - دەدى ول.
يماشيەۆانىڭ سوزىنشە، ەگەر جونەلتۋشى نەمەسە الۋشى سالەمدەمەنىڭ جوعالعانى تۋرالى حابارلاسا، كومپانيا مىندەتتى تۇردە ءوتىنىش قابىلداپ، جان-جاقتى تەكسەرۋ جۇرگىزەدى.
حالىقارالىق جونەلتىلىمدەر بويىنشا تەرگەۋ جۇمىستارى دۇنيەجۇزىلىك پوشتا وداعىنىڭ ەرەجەلەرىنە سايكەس جۇرگىزىلەدى. بۇل جاعدايدا «قازپوشتا» وكىلدەرى ءتيىستى ەلدىڭ پوشتا قىزمەتىمەن بايلانىسقا شىعىپ، سالەمدەمەنىڭ نە سەبەپتى جەتكىزىلمەگەنىن انىقتايدى.
سونىمەن قاتار كليەنت ۇزاق تەكسەرۋ ناتيجەسىن كۇتكىسى كەلمەسە، كومپانيا تاسىمالداۋ قىزمەتى ءۇشىن تولەنگەن قاراجاتتى قايتارىپ بەرە الادى. كەيىن شىعىندى وتەۋ ماسەلەسى ەكى ەلدىڭ پوشتا وپەراتورلارى اراسىندا شەشىلەدى.
قازاقستان اۋماعىنداعى سالەمدەمەلەر دە بىرنەشە دەڭگەيلى باقىلاۋ جۇيەسى ارقىلى قاداعالانادى. جونەلتىلىم قالاعا، اۋدانعا نەمەسە اۋىلعا جەتكەن سايىن بۇل اقپارات جۇيەدە تىركەلىپ وتىرادى. بارلىق پروتسەسس ىلەسپە قۇجاتتار مەن ەلەكتروندى باقىلاۋ جۇيەسى ارقىلى راسىمدەلەدى.
كومپانيا وكىلىنىڭ ايتۋىنشا، ەگەر سالەمدەمەنىڭ جوعالۋىنا پوشتا قىزمەتىنىڭ كىناسى دالەلدەنسە، كليەنتكە وتەماقى تولەنەدى. ال جونەلتىلىم باعالانباعان بولسا، جەتكىزۋ قۇنى قايتارىلادى. ەگەر سالەمدەمەنىڭ باعاسى الدىن الا كورسەتىلگەن بولسا، ونىڭ تولىق باعالاۋ قۇنى وتەلەدى.
تىلەۋگۇل يماشيەۆا مۇنداي جاعدايلار سيرەك كەزدەسەتىنىن اتاپ ءوتتى. ونىڭ ايتۋىنشا، كەيدە اتاۋى ۇقساس ەلدى مەكەندەرگە قاتە جونەلتۋ سياقتى جاعدايلار بولۋى مۇمكىن. الايدا مۇنداي كەزدە سالەمدەمە ىزدەستىرىلىپ، يەسىنە قايتارىلادى.
ەگەر كەشىگۋ نەمەسە جوعالتۋ فاكتىسى راستالسا، كليەنتتەن كەشىرىم سۇرالىپ، زاڭناماعا سايكەس وتەماقى ماسەلەسى قارالادى، - دەدى ول.