شىنجاڭداعى تۇڭعىش زاماناۋي جىلقى اۋرۋحاناسى پايدالانۋعا بەرىلدى — Harajorga
شىنجاڭداعى موڭعولكۇرە جىلقى شارۋاشىلىعى فەرماسىنىڭ جىلقى اۋرۋحاناسىندا سيفرلىق باسقارۋ جانە باقىلاۋ جۇيەسى تولىق ىسكە قوسىلدى، دەپ حابارلايدى Harajorga باسىلىمى.
قىتايلىق ب ا ق- تىڭ دەرەگىنشە، وڭىردەگى جىلقىلارعا ارنالعان العاشقى زاماناۋي مامانداندىرىلعان اۋرۋحانا 2025 -جىلعى شىلدەدە سالىنىپ بىتكەن. ءبىر جىلدان استام ۋاقىت بويى جابدىقتاردى سىناقتان وتكىزۋ، ماماندار دايارلاۋ جانە تەحنيكالىق دايىندىق جۇمىستارىن جۇرگىزۋ ناتيجەسىندە مەكەمە باستاپقى ۆەتەريناريالىق قىزمەت كورسەتۋدەن باستاپ ەمدەۋ، ءوسىرۋ جانە سيفرلىق باسقارۋ مەن باقىلاۋدى بىرىكتىرەتىن كەشەندى قىزمەت كورسەتۋ دەڭگەيىنە كوتەرىلدى. بۇل ىلە قازاق اۆتونوميالى وبلىسىنداعى جىلقى شارۋاشىلىعىنىڭ ساپاسىن ارتتىرىپ، ونىمدىلىگىن جاقسارتۋعا عىلىمي- تەحنيكالىق قولداۋ كورسەتەدى.
موڭعولكۇرە جىلقى اۋرۋحاناسىندا وپەراتسيالىق بولمە، ناركوزدان وياتۋ بولمەسى، ستاتسيونارلىق ات قورا، كلينيكالىق زەرتحانا جانە مۇزداتىلعان ۇرىق ءوندىرۋ ورتالىعى بار. مۇندا رەنتگەن، ۋلترادىبىستىق زەرتتەۋ، كومپيۋتەرلىك توموگرافيا (ك ت)، زەرتحانالىق دياگنوستيكا جانە حيرۋرگيالىق ەمدەۋ سەكىلدى مامانداندىرىلعان ۆەتەريناريالىق قىزمەتتەر كورسەتىلەدى.
قازاقستان گانسۋ ولكەسىنىڭ ەڭ ءىرى ساۋدا سەرىكتەسىنە اينالدى — حالىق گازەتى
2026 -جىلدىڭ العاشقى توعىز ايىندا قازاقستان قىتايدىڭ گانسۋ ولكەسىنىڭ ەڭ ءىرى ساۋدا سەرىكتەسى اتاندى. ەكى تاراپ اراسىنداعى يمپورت پەن ەكسپورتتىڭ جالپى كولەمى 12,26 ميلليارد يۋانعا جەتىپ، وتكەن جىلدىڭ سايكەس كەزەڭىمەن سالىستىرعاندا 10,6 پايىزعا ءوستى. سوڭعى جىلدارى گانسۋ ولكەسى ورتالىق ازيا ەلدەرىمەن ساۋدا- ەكونوميكالىق بايلانىستارىن نىعايتىپ، وڭىرلىك ىنتىماقتاستىقتى كەڭەيتىپ كەلەدى، دەپ حابارلايدى قىتايلىق حالىق گازەتى.
اتالعان ب ا ق- تىڭ مالىمەتىنشە، گانسۋ ولكەسى ورتالىق ازيا ەلدەرىنەن مىس كونتسەنتراتى مەن زىعىر تۇقىمدارىن يمپورتتاسا، قازاقستان جانە باسقا دا ءوڭىر نارىقتارىنا ماقتا- ماتا ونىمدەرى مەن جولاۋشىلار كولىگىن ەكسپورتتايدى. سونىمەن قاتار ولكەنىڭ اۋىل شارۋاشىلىعى ونىمدەرى دە سىرتقى نارىقتارعا جەتكىزىلىپ جاتىر. قازىرگى ۋاقىتتا الما، كارتوپ، قىزاناق، كيۆي جانە ماندارين سەكىلدى ازىق- تۇلىك ونىمدەرىنىڭ ونداعان ءتۇرى جۇك پويىزدارى ارقىلى قازاقستان مەن وزبەكستانعا تىكەلەي جونەلتىلەدى.
سونداي-اق وسى اپتادا حالىق گازەتىندە «بيىلعى توعىز ايدا قورعاس پورتى ارقىلى 405 مىڭ كولىك ەكسپورتتالدى» دەگەن تاقىرىپتاعى اقپارات جارىق كوردى.
كەلتىرىلگەن دەرەكتەرگە سۇيەنسەك، قىتايدىڭ قورعاس كەدەنى ستاتيستيكاسىنا سايكەس، 2026 -جىلدىڭ قاڭتار- قىركۇيەك ايلارى ارالىعىندا شىڭجاڭداعى قورعاس پورتى ارقىلى 405 مىڭ كولىك ەكسپورتتالدى. بۇل وتكەن جىلدىڭ سايكەس كەزەڭىمەن سالىستىرعاندا 36,8 پايىزعا كوپ. ونىڭ ىشىندە 158 مىڭىن ەلەكتر كولىكتەرى قۇراپ، ولاردىڭ ەكسپورتى ءبىر جىلدا 31,5 پايىزعا ءوستى. ەلەكتر كولىكتەرىنىڭ ۇلەسى جالپى ەكسپورت كولەمىنىڭ شامامەن 40 پايىزىنا جەتتى.
قازىرگى ۋاقىتتا قورعاس پورتى ارقىلى شىعارىلاتىن قىتايدا وندىرىلگەن كولىكتەر نەگىزىنەن قازاقستان مەن وزبەكستان سياقتى ورتالىق ازيا ەلدەرىنە جونەلتىلەدى. سونىمەن قاتار اۆتوكولىكتەر «ءبىر بەلدەۋ، ءبىر جول» باستاماسىنا قاتىساتىن باتىس ازيا مەن شىعىس ەۋروپانىڭ وننان استام ەلى مەن ايماعىنا جەتكىزىلىپ جاتىر. بۇل قورعاس پورتىنىڭ حالىقارالىق ساۋدا مەن كولىك- لوگيستيكا بايلانىستارىنداعى ماڭىزىن ارتتىرىپ وتىر.
ءال-فارابي اتىنداعى قازۇۋ- دا پارسى ءتىلى كۋرسى اشىلدى — ParsToday
Parstoday اقپارات اگەنتتىگىنىڭ حابارلاۋىنشا، 21- قازاندا ءال-فارابي اتىنداعى قازاق ۇلتتىق ۋنيۆەرسيتەتىنىڭ شىعىستانۋ فاكۋلتەتىندە پارسى ءتىلى كۋرسىنىڭ اشىلۋ سالتاناتى ءوتتى، دەپ جازدى ParsToday اقپارات اگەنتتىگى.
يراندىق ب ا ق- تىڭ دەرەگىنشە، وقۋ كۋرسى الماتى قالاسىنداعى يران يسلام رەسپۋبليكاسىنىڭ باس كونسۋلدىعىنىڭ تىكەلەي قولداۋىمەن ۇيىمداستىرىلدى. ءىس-شاراعا يران باس كونسۋلدىعىنىڭ مادەني ىستەر جونىندەگى اتتاشەسى موحامماد ماسۋد سادەعي، شىعىستانۋ فاكۋلتەتىنىڭ دەكانى مىرزاحان ەگامبەرديەۆ، حالىقارالىق قاتىناستار فاكۋلتەتىنىڭ دەكانى جۇلدىز سايرامبايەۆا، سونداي-اق وقىتۋشىلار، دوكتورانتتار مەن كۋرس قاتىسۋشىلارى قاتىستى.
شارا بارىسىندا مىرزاحان ەگامبەرديەۆ يرانتانۋ باعىتىن دامىتۋدىڭ ماڭىزدىلىعىن اتاپ ءوتتى. ال موحامماد ماسۋد سادەعي قازاقستان مەن يران حالىقتارىنىڭ ورتاق رۋحاني جانە مادەني قۇندىلىقتارىنا توقتالىپ، پارسى ءتىلىن ۇيرەنۋ ءداستۇرىن جاڭعىرتۋ قاجەتتىگىن ايتتى. كۋرستىڭ نەگىزگى ماقساتى — قازۇۋ وقىتۋشىلارى مەن دوكتورانتتارىنا پارسى تىلىنەن باستاپقى ءبىلىم بەرىپ، تىلدىك داعدىلارىن دامىتۋعا مۇمكىندىك جاساۋ.
موڭعوليادا «كەمەلەك» اۋرۋىنان 8 مىڭعا جۋىق ەشكى قىرىلدى — Janadauir.com
موڭعوليادا «كەمەلەك» اۋرۋىنىڭ سالدارىنان شامامەن 8 مىڭ ەشكى شىعىنعا ۇشىرادى. وسىعان بايلانىستى 8 -قازاندا ايماقتىق توتەنشە كوميسسيا وتىرىسى ءوتىپ، باسقا ايماقتاردان ەشكى تاسىمالداۋعا شەكتەۋ قويۋ تۋرالى اكىمنىڭ ا/774-وكىمى قابىلداندى، دەپ جازادى موڭعوليالىق Janadauir باسىلىمى.
اتالعان ب ا ق- تىڭ دەرەگىنشە، بۇعان دەيىن جويىلدى دەپ ەسەپتەلگەن كەمەلەك اۋرۋىنا قارسى ۆاكسينانى «ەم» كومبيناتى وندىرمەيتىن بولعاندىقتان، قازىر ۆاكسينانى قايتا ازىرلەۋ جانە ەلدىڭ 21-ايماعىنداعى ەشكىلەرگە ەگۋ جۇمىستارىن ۇيىمداستىرۋ ماسەلەسى قولعا الىنۋدا.
ماماندار مال باسىن ەسەپكە الۋ مەن ۆاكسيناتسيالاۋ دەرەكتەرىنىڭ اراسىندا ايتارلىقتاي ايىرماشىلىق بار ەكەنىن اتاپ ءوتتى. 2025 -جىلعى ساناق بويىنشا التاي سۇمىنىندا 60521 ەشكى تىركەلىپ، ونىڭ 41074-ىنە، تۇلبا سۇمىنىندا 71529 ەشكى تىركەلىپ، ونىڭ 47272-سىنە ۆاكسينا ەگىلگەن. ال سەنگەل سۇمىنىندا شامامەن 150 مىڭ ەشكى ەسەپكە الىنىپ، 109 مىڭى ۆاكسيناتسيالانعان. ماماندار بۇل ايىرماشىلىقتار مال باسىن ەسەپكە الۋداعى سايكەسسىزدىكتەرگە بايلانىستى بولۋى مۇمكىن ەكەنىن ايتىپ، اۋرۋدىڭ الدىن الۋ شارالارىن ءتيىمدى جۇرگىزۋ ءۇشىن بيىلعى ساناقتى ناقتى ءارى دۇرىس جۇرگىزۋدىڭ ماڭىزدىلىعىن ەسكەرتتى.
شاي جۇرەك ساۋلىعىنا پايدالى بولۋى مۇمكىن - TRT
«Journal of ىnternal Medicinە» جۋرنالىندا جاريالانعان زەرتتەۋدە قىتايدا تۇراتىن 30- 79 جاس ارالىعىنداعى 485 مىڭنان استام ادامنىڭ دەرەكتەرى تالدانعان. توعىز جىلعا جۋىق باقىلاۋ ناتيجەسىندە اپتاسىنا كەمىندە ءۇش كۇن شاي ىشەتىن ادامداردا جۇرەك-قان تامىرلارى اۋرۋلارىنىڭ قاۋپى شايدى سيرەك تۇتىناتىندارعا قاراعاندا شامامەن 11 پايىزعا تومەن ەكەنى انىقتالدى، دەپ جازادى تۇركيا راديو تەلەۆيزيا پورتالى.
اتالعان ب ا ق- تىڭ كەلتىرگەن مالىمەتتەرىنە سۇيەنسەك، زەرتتەۋشىلەر قارا شاي مەن ورتاشا قويۋلىقتا دەمدەلگەن شايدىڭ پايداسى ايقىنىراق بايقالعانىن اتاپ ءوتتى. الايدا بۇل ناتيجەلەر شايدىڭ اۋرۋ قاۋپىن تىكەلەي تومەندەتەتىنىن تولىق دالەلدەمەيدى.
«TRT» - نىڭ دەرەگىنشە، ماماندار شايدى وتە ىستىق كۇيىندە ىشپەۋگە كەڭەس بەرەدى، ويتكەنى مۇنداي تەمپەراتۋرا قان تامىرلارى اۋرۋلارىنىڭ جوعارى قاۋپىمەن بايلانىستى بولۋى مۇمكىن. زەرتتەۋ بارىسىندا كۇنىنە 6- 8 ستاقان شاي ىشەتىن ادامداردا اۋرۋ قاۋپىنىڭ تومەندىگى بايقالعانىمەن، بۇل مولشەردى بارلىعىنا ورتاق كۇندەلىكتى نورما رەتىندە قابىلداۋعا بولمايدى. ساراپشىلار شايعا قانتتى مۇمكىندىگىنشە از قوسۋدى، كوفەين مولشەرىن باقىلاۋدى جانە جۇرەك ساۋلىعىن ساقتاۋ ءۇشىن دۇرىس تاماقتانۋدى، تۇراقتى دەنە بەلسەندىلىگىن ۇستانۋدى ءارى تەمەكىدەن باس تارتۋدى ۇسىنادى.
سونداي-اق وسى اپتادا «TRT» - دا «وڭدەلگەن تاعامدار مي دەنساۋلىعىنا كەرى اسەر ەتۋى مۇمكىن» دەگەن تاقىرىپتاعى اقپارات جارىق كوردى.
تۇركيالىق باسىلىمنىڭ دەرەگىنشە، «JAMA Network Open» جۋرنالىندا جاريالانعان زەرتتەۋدە كاناداداعى 35- 69 جاس ارالىعىنداعى 9 مىڭعا جۋىق ادامنىڭ تاماقتانۋ ادەتتەرى، ميىنىڭ ماگنيتتىك- رەزونانستىق توموگرافيا ناتيجەلەرى جانە كوگنيتيۆتىك قابىلەتتەرى زەرتتەلدى. ناتيجەسىندە وڭدەلگەن تاعامداردى كوپ تۇتىناتىن توپتاعى ءاربىر توعىز ادامنىڭ بىرىنەن مي قان تامىرلارىنىڭ زاقىمدانۋ بەلگىلەرى انىقتالعان. ال مۇنداي تاعامداردى از تۇتىناتىن توپتا بۇل كورسەتكىش ءار 12 ادامنىڭ بىرىنە تەڭ بولدى. ماماندار ميدىڭ اق زاتىنداعى وزگەرىستەر مەن قان اينالىمىنىڭ بۇزىلۋىنان بولاتىن زاقىمدار ەگدە جاستا ينسۋلت، كوگنيتيۆتىك قابىلەتتىڭ تومەندەۋى جانە دەمەنتسيا قاۋپىمەن بايلانىستى بولۋى مۇمكىن ەكەنىن اتاپ ءوتتى.
زەرتتەۋ بارىسىندا جاس، تەمەكى شەگۋ، دەنە بەلسەندىلىگى، قان قىسىمى جانە قانت ديابەتى سياقتى فاكتورلار ەسكەرىلگەنىمەن، وڭدەلگەن تاعامداردى تۇتىنۋ مەن ميداعى وزگەرىستەر اراسىنداعى بايلانىس ساقتالعان. دەگەنمەن زەرتتەۋ باقىلاۋ دەرەكتەرىنە نەگىزدەلگەندىكتەن، وڭدەلگەن تاعامداردىڭ ميعا تىكەلەي زيان كەلتىرەتىنىن ناقتى دالەلدەمەيدى. عالىمدار تاعامنىڭ وڭدەلۋ دەڭگەيى مەن ونىڭ تاعامدىق قۇندىلىعىنىڭ اسەرىن اجىراتۋ ءۇشىن قوسىمشا زەرتتەۋلەر قاجەت ەكەنىن ەسكەرتەدى.
وزبەكستاننىڭ ءبىرىنشى حانىمى جاھاندىق دەنساۋلىق ساقتاۋ سالاسىنا قوسقان ۇلەسى ءۇشىن بەدەلدى ماراپاتقا يە بولدى - ءوزا
«بالالاردىڭ ءال-اۋقاتىنا ينۆەستيتسيا: كەلەشەك ۇرپاق ءۇشىن تۇراقتى ءارى ادىلەتتى دامۋ جولىندا» اتتى حالىقارالىق سامميت پەن بالالار ونكولوگياسى جانە گەماتولوگياسى جونىندەگى 2- حالىقارالىق كونگرەسس اياسىندا دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋس وزبەكستاننىڭ ءبىرىنشى حانىمى زيروات ميرزيەۆاعا بەدەلدى حالىقارالىق ماراپات تابىستادى. بۇل تۋرالى وسى اپتادا «ءوزا» اقپارات اگەنتتىگى حابارلادى.
وزبەكستاندىق باسىلىمنىڭ مالىمەتىنشە، ول بالالار ونكولوگياسىن دامىتۋداعى كوشباسشىلىعى جانە ءاربىر بالانىڭ سالاۋاتتى ءومىر ءسۇرۋ قۇقىعىن قورعاۋعا قوسقان ۇلەسى ءۇشىن ماراپاتتالدى.
2019 -جىلى تاعايىندالعان بۇل ماراپات حالىق دەنساۋلىعىن قورعاۋ سالاسىندا ەلەۋلى ناتيجەلەرگە قول جەتكىزگەن تۇلعالارعا بەرىلەدى. بۇعان دەيىن وعان مەملەكەت جانە حالىقارالىق ۇيىم باسشىلارى، نوبەل سىيلىعىنىڭ لاۋرەاتتارى، عالىمدار مەن قوعام قايراتكەرلەرى جاھاندىق ۆاكسيناتسيانى دامىتۋ، جۇقپالى اۋرۋلارمەن كۇرەسۋ جانە مەديتسينالىق كومەكتىڭ قولجەتىمدىلىگىن ارتتىرۋعا قوسقان ۇلەسى ءۇشىن يە بولعان.
ايتا كەتەيىك، «ءوزا» - دا وزبەكستان حالقىنىڭ سانى 39,5 ميلليوننان اسقانى تۋرالى اقپارات جاريالاندى.
حابارلامادا ايتىلۋىنشا، وزبەكستان ۇلتتىق ستاتيستيكا كوميتەتىنىڭ مالىمەتىنشە، 2026 -جىلعى 1- قازاندا ەلدىڭ تۇراقتى حالقى 39 ميلليون 535 مىڭ 225 ادامعا جەتتى. بۇل وتكەن جىلدىڭ سايكەس كەزەڭىمەن سالىستىرعاندا 692,2 مىڭ ادامعا نەمەسە 1,8 پايىزعا كوپ. وڭىرلەر اراسىندا حالىق سانى بويىنشا سامارقاند وبلىسى (4,46 ميلليون ادام) كوش باستاپ تۇر. ودان كەيىن فەرعانا (4,29 ميلليون) جانە تاشكەنت وبلىستارى (3,8 ميلليون) ورنالاسقان. ال حالقى ەڭ از وڭىرلەر قاتارىندا سىرداريا (965,4 مىڭ) ، ناۋاي (1,2 ميلليون) جانە جىزاق وبلىستارى (1,55 ميلليون) بار. وسىلايشا، ەلدە حالىق سانىنىڭ تۇراقتى ءوسۋ ءۇردىسى جالعاسىپ كەلەدى.
ءۇرىمجى اۋە كومپانياسى مەرزىمى وتكەن تاعام تاراتقانى ءۇشىن كەشىرىم سۇرادى — جەنمين جيباو
20 -قازاندا ءۇرىمجى اۋە كومپانياسى (Urumqi Air) رەيس كەشىككەن كەزدە جولاۋشىلارعا جارامدىلىق مەرزىمى ءوتىپ كەتكەن تەز دايىندالاتىن كەسپە تاراتىلۋىنا بايلانىستى رەسمي كەشىرىم سۇرادى، دەپ جازدى جەنمين جيباو باسىلىمى.
قىتايلىق ب ا ق- تىڭ مالىمەتىنشە، 2026 -جىلعى 1 -تامىزدا اۋا رايىنا بايلانىستى «شيانپەن» اۋە كومپانياسىنىڭ ءۇرىمجى — تيانفۋ باعىتىنداعى 8L9664 رەيسى ۇزاق ۋاقىتقا كەشىككەن. ءۇرىمجى اۋە كومپانياسى وسى رەيسكە ءۇرىمجى تيانشان حالىقارالىق اۋەجايىندا جەر ءۇستى قىزمەتىن كورسەتكەن كەزدە جولاۋشىلارعا جارامدىلىق مەرزىمى وتكەن تاعام ۇسىنعان. اۋە كومپانياسىنىڭ حابارلاۋىنشا، وقيعادان كەيىن تەكسەرۋ جۇرگىزىلىپ، جاۋاپتى قىزمەتكەرلەرگە تارتىپتىك شارا قولدانىلعان.
كومپانيا تەكسەرۋ ناتيجەسىندە انىقتالعان كەمشىلىكتەردى جويۋ شارالارى تولىق ورىندالعانىن حابارلادى.
سونداي-اق قىتايلىق ب ا ق- تىڭ مالىمەتىنشە، جارامدىلىق مەرزىمى وتكەن كەسپەنى العاش انىقتاپ، قىزمەتكەرلەرگە حابارلاعان جولاۋشىعا 2 مىڭ يۋان كولەمىندە سىياقى بەرىلگەن. بۇدان بىلاي كومپانيا جولاۋشىلاردىڭ مەرزىمى وتكەن تاعام تۋرالى حابارلامالارىن قابىلداپ، راستالعان ءاربىر جاعداي ءۇشىن 2 مىڭ يۋانعا دەيىن سىياقى بەرەتىن تۇراقتى باقىلاۋ جۇيەسىن ەنگىزۋدى جوسپارلاپ وتىر.
اۆتورلار
بەيسەن سۇلتان