بۇعان دەيىن قاتارىنان ءۇش اي بويى ءار ايدا كەمىندە 100 ءتۇرلى ادامنان اقشا تۇسكەن بانك شوتتارى سالىق ورگاندارىنىڭ نازارىن اۋدارۋى مۇمكىن ەدى. ول ءۇشىن وسى ءۇش ايدا تۇسكەن اقشانىڭ جالپى سوماسى ەڭ تومەنگى جالاقىنىڭ 12 ەسەلەنگەن مولشەرىنەن اسۋى كەرەك بولاتىن.
ەندى بۇل شەك 360 ايلىق ەسەپتىك كورسەتكىشكە (ا ە ك) دەيىن كوتەرىلدى. ياعني 2026 -جىلى ءۇش ايدا تۇسكەن اقشانىڭ جالپى سوماسى 1557000 تەڭگەدەن اسسا، سالىق ورگاندارى مۇنداي اۋدارىمدارعا نازار اۋدارۋى مۇمكىن. ال اقشا جىبەرۋشىلەردىڭ سانى مەن ءۇش ايلىق مەرزىمگە قاتىستى تالاپ وزگەرگەن جوق.
شەكتى سوما ءار جىلدىڭ 1-قاڭتارىندا بەلگىلەنگەن ا ە ك مولشەرىنە قاراي ەسەپتەلەدى.
سونىمەن قاتار قارجى مينيسترلىگى ينتەرنەت ارقىلى تاۋار ساتاتىن كاسىپكەرلەر تۋرالى مالىمەتتەردى بەرۋ ءتارتىبىن ناقتىلادى. بانكتەر بۇل اقپاراتتى Smart Data Finance (SDF) سيفرلىق جۇيەسى ارقىلى جولدايدى.
جۇيەدە تەحنيكالىق اقاۋ بولسا، مالىمەتتەردى ىلەسپە حاتپەن بىرگە CD- ديسكىدە تاپسىرۋعا بولادى. مۇنداي جاعدايدا اقپاراتتى بەرۋ مەرزىمى بەس جۇمىس كۇنىنە ۇزارتىلادى. ءبىراق اقاۋ بولعانىن مەملەكەتتىك كىرىستەر كوميتەتىنىڭ سول كۇنى جاريالاعان باسپا ءسوز حابارلاماسى راستاۋعا ءتيىس.
جەكە تۇلعالاردىڭ بانك شوتتارىنا تۇسكەن اقشانىڭ جالپى سوماسى تۋرالى مالىمەتتەردى بەرۋ كەزىندە دە وسى ءتارتىپ قولدانىلادى.
ەسكە سالايىق، 2026 -جىلعى 1-قاڭتاردان باستاپ قازاقستان بانكتەرى جەكە تۇلعالاردىڭ موبيلدى اۋدارىمدارى تۋرالى مالىمەتتەردى مەملەكەتتىك كىرىستەر كوميتەتىنە توقسان سايىن جولداي باستادى.
ال مامىر ايىندا ازاماتتارعا سالىق ورگاندارىنان حابارلامالار كەلە باستادى. بۇل رەتتە حابارلاما العانى ءۇشىن سالىق تولەۋشىلەرگە بىردەن ايىپپۇل سالىنبايدى. قازاقستاندىقتار انىقتالعان سايكەسسىزدىكتەردىڭ سەبەبىن ءتۇسىندىرىپ، ءتيىستى مالىمەتتەردى الداعى دەكلاراتسيالارىندا كورسەتە الادى.