وبلىس اكىمى پەتروپاۆلدىڭ اتىن وزگەرتۋ تۋرالى: قازىر بۇل ماسەلە وزەكتى ەمەس

استانا. KAZINFORM - ۇكىمەت وتىرىسىنان كەيىن جۋرناليستەر سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆتەن پەتروپاۆلدىڭ اتاۋىن وزگەرتۋ تۋرالى سۇراق قويدى.

اكىم وڭىردە وبلىس ورتالىعىن قايتا اتاۋدان باسقا وزەكتى ماسەلەلەر كوپ ەكەنىن ايتىپ، قىسقا قايىردى.

«قازىرگى تاڭدا بۇل ماسەلە وزەكتى دەپ ويلامايمىن. ويتكەنى شەشىلۋى ءتيىس باسقا دا ماسەلەلەر بارشىلىق. قالانى اباتتاندىرۋ، جىلۋ، الەۋمەتتىك جانە ەكونوميكالىق ماسەلەلەر بار»، - دەدى ول.

وبلىس باسشىسى ونداي ماسەلەنىڭ قوعام ىشىندە تالقىلانىپ جۇرگەنىنەن حابارى بار ەكەنىن ايتادى.

«بۇل تاقىرىپ كوتەرىلىپ جاتقان جوق دەپ جوققا شىعارا المايمىن. قالانىڭ اتاۋىن وزگەرتۋ كەرەك دەيتىندەر بار، ءالى ۋاقىتى كەلگەن جوق دەپ سانايتىندار دا بارشىلىق. مەنىڭ جەكە ويىم - ادامداردىڭ پىكىرى ەسكەرىلۋى كەرەك. كوپ ادام وزگەرتۋ كەرەك دەپ شەشسە، ونى قاراستىرامىز، - دەدى عاۋەز نۇرمۇحامبەتوۆ.

اۆتور

ەسىمجان ناقتىباي