وبلىس اكىمى پەتروپاۆل قالاسىنىڭ اتاۋى وزگەرۋى مۇمكىن بە دەگەن سۇراققا جاۋاپ بەردى

فوتو: فوتو: و ك ق

استانا. KAZINFORM - سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ ەسەپتىك بريفينگىدە پەتروپاۆل قالاسىنىڭ اتاۋى وزگەرۋى مۇمكىن بە دەگەن سۇراققا جاۋاپ بەردى.

«قازىر پەتروپاۆل قالاسىنىڭ اتاۋىن وزگەرتۋ كۇن تارتىبىندە تۇرعان جوق. قالا تۇرعىندارى بۇل ماسەلەنى كوتەرمەيدى، سەبەبى ولارعا اباتتاندىرۋ، دامىتۋ ماڭىزدىراق. مىسالى وبلىس ورتالىعىندا 400 شاقىرىم جولدىڭ 40 پايىزىندا اسفالت جابىنى جوق، مۇنى تۇرعىنداردىڭ ءوزى ايتىپ ءجۇر. سپورت الاڭدارىن جاساۋ كەرەك. سوندىقتان، قالا اتاۋىن وزگەرتۋ تاقىرىبى بۇگىنگى كۇنى كوتەرىلىپ وتىرعان جوق»، - دەدى عاۋەز نۇرمۇحامبەتوۆ استانادا ورتالىق كوممۋنيكاتسيالار قىزمەتىندە.

بۇعان دەيىن پەتروپاۆلدا سۋ تاسقىنىنان زارداپ شەككەندەر ءۇشىن جاڭا شاعىناۋدان سالىناتىنىن جازعان ەدىك. ءوز كەزەگىندە سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ تابيعي اپات سالدارى قالاي قالپىنا كەلتىرىلگەنىن ايتىپ بەرگەن بولاتىن.

اۆتور
ايجان سەرىكجان قىزى