امەريكا باسشىسى Truth Social الەۋمەتتىك جەلىسىندە جازبا جاريالاپ، بۇل ماراپاتقا وزگەلەردەن گورى ءوزىن لايىق سانايتىنىن ايتتى، - دەپ حابارلايدى Massaget.kz ءتىلشىسى.
ترامپتىڭ ايتۋىنشا، ول نوبەل بەيبىتشىلىك سىيلىعىنىڭ جاڭا يەگەرى تۋرالى ەشتەڭە بىلمەيدى، ءتىپتى ونىڭ قانداي ەڭبەك سىڭىرگەنىنەن دە حابارسىز. ال ءوزى سەگىز سوعىستى توقتاتقانىن ايتىپ، ءبىر ەمەس، سەگىز نوبەل سىيلىعىن الۋعا لايىق ەكەنىن مالىمدەدى.
امەريكا پرەزيدەنتى ءوزىنىڭ پايىمداۋىنشا، ءوزى رەتتەگەن بارلىق 8 سوعىستى ءتىزىپ شىقتى:
كامبودجا مەن تايلاند؛
كوسوۆو مەن سەربيا؛
كونگو دەموكراتيالىق رەسپۋبليكاسى مەن رۋاندا؛
پاكىستان مەن ءۇندىستان؛
يزرايل مەن يران؛
مىسىر مەن ەفيوپيا؛
ارمەنيا مەن ازەربايجان؛
يزرايل مەن حاماس.
«بۇعان قوسا، مەن يراننىڭ يادرولىق قارۋ جاساپ، بۇكىل تاياۋ شىعىستى، ءتىپتى ودان تىس ايماقتاردى دا اپاتقا ۇشىراتۋىنا جول بەرمەدىم! مەن تاريحتا ەشكىم قۇتقارماعان مولشەردە ادام ءومىرىن ساقتاپ قالدىم. بىلتىرعى نوبەل سىيلىعىن ماعان تابىستاعان كەزدە ماريا كورينا ماچادو بۇقارالىق اقپارات قۇرالدارىنا: «دونالد ترامپ كوپتەگەن سوعىستى توقتاتتى. سوندىقتان ول نوبەل بەيبىتشىلىك سىيلىعىن وسى ۋاقىتقا دەيىن العان كەز كەلگەن ادامنان ارتىق لايىق»، - دەپ مالىمدەدى. بەيبىتشىلىكتى ورناتۋ جولىنداعى بۇرىن-سوڭدى ەشكىم قول جەتكىزبەگەن جەتىستىكتەرىمدى ەسكەرسەك، مەن بۇل پىكىرمەن كەلىسەمىن!» - دەپ جازدى ترامپ.
ا ق ش پرەزيدەنتى ءوز جەتىستىكتەرىنىڭ قاتارىندا «الەمدەگى ەڭ زۇلىم ديكتاتور نيكولاس مادۋرونى ۆەنەسۋەلا بيلىگىنەن كەتىرگەنىن جانە قازىر ۆەنەسۋەلانى باي ءارى دەموكراتيالىق ەلگە اينالدىرۋ جولىندا جۇمىس ىستەپ جاتقانىن» دا اتادى.
«مەن وڭتۇستىك كورەيا مەن سولتۇستىك كورەيا، سونداي-اق، جاپونيا مەن سولتۇستىك كورەيا اراسىندا سوعىس باستالۋىنا جول بەرمەي كەلەمىن. بۇعان قىتاي مەن تايۆاندى جانە وزگە دە كوپتەگەن شيەلەنىستى ايماقتى قوسىڭىز. بۇل جەرلەردە سوعىستىڭ تۇتانباۋىنا تەك پرەزيدەنت دونالد دج. ترامپ پەن امەريكا قۇراما شتاتتارى ىقپال ەتتى»، - دەلىنگەن جازبادا.
وسىنداي جانە وزگە دە جەتىستىكتەرىنە قاراماستان، ترامپتىڭ سوزىنشە، نوبەل سىيلىعى «بىرىككەن ۇلتتار ۇيىمىندا قىزمەت ەتكەن، بۇرىن ەشكىم ەستىمەگەن ليبەرال كوزقاراستاعى ايەلگە» بەرىلگەن.
مەن توقتاتقان سوعىستىڭ ەشقايسىندا ب ۇ ۇ- دان كومەك سۇراعان ەمەسپىن. ويتكەنى ولاردان ەش پايدا بولعان جوق. مەن پرەزيدەنت رەتىندە باسقارىپ وتىرعان امەريكا قۇراما شتاتتارى نوبەل بەيبىتشىلىك سىيلىعىن الۋعا ءتيىس ەدى، ءبىراق المادى. بۇل - نورۆەگيانىڭ بەدەلىنە تۇسكەن، ەشقاشان ۇمىتىلمايتىن قارا داق. دەموكراتياعا قارسى شىعىپ، وركەنيەتكە جاۋ بولعان ءبىر ۋىس راديكال يدەولوگ نوبەل بەيبىتشىلىك سىيلىعىنىڭ بەدەلىن ءبىرجولا ءتۇسىردى!» - دەپ تۇيىندەدى ترامپ.
بۇعان دەيىن 2026-جىلعى نوبەل بەيبىتشىلىك سىيلىعى وڭتۇستىك افريكا رەسپۋبليكاسىنىڭ زاڭگەرى ناۆانەتحەم (ناۆي) پيللەيگە بەرىلگەنى بەلگىلى بولدى. ول اسكەري قىلمىستار، ادامزاتقا قارسى قىلمىستار مەن گەنوتسيدكە قاتىستى سوت پروتسەستەرىنە قاتىسقان.
جىل باسىندا دونالد ترامپقا نوبەل بەيبىتشىلىك سىيلىعىنىڭ مەدالى تابىستالعان بولاتىن. ونى 2025-جىلى وسى ماراپاتقا يە بولعان ۆەنەسۋەلالىق وپپوزيتسيالىق ساياساتكەر ماريا كورينا ماچادو بەرگەن. ماچادو ترامپتىڭ ۆەنەسۋەلاعا جاساعان شابۋىلى ءۇشىن نوبەل بەيبىتشىلىك سىيلىعىنا لايىق ەكەنىن ايتقان ەدى.