تۇرسىنباي قۇلاحمەت ەكىنشى جەكپە-جەگىندە WBC تيتۋلىن يەمدەندى

نۇر-سۇلتان. قازاقپارات - قازاقستاندىق بوكسشى تۇرسىنباي قۇلاحمەت (1-0، 1 ك و) MTK Global پروموۋتەرلىك كومپانياسى ۇيىمداستىرعان وڭتۇستىك كريكبيدەگى (ۇلى بريتانيا) بوكس كەشىندە ونەر كورسەتتى، دەپ حابارلايدى قازاقپارات Sports.kz سايتىنا سىلتەمە جاساپ.

وندا قۇلاحمەت ءبىرىنشى ورتا سالماقتا WBC International چەمپيونى ۆاكانتتى بەلبەۋى ءۇشىن جەڭىلىپ كورمەگەن بريتاندىق ماكولەي ماكگوۋەنمەن (14-0-1، 3 ك و) تيتۋلدىق جەكپە-جەك وتكىزدى.

توعىز راۋندقا ەسەپتەلگەن بۇل ايقاس تورەشىلەردىڭ شەشىمىمەن (99-89، 99-89، 99-89) ءبىراۋىزدان تۇرسىنبايدىڭ جەڭىسىمەن اياقتالدى.

جەتىنشى راۋندتا بريتاندىق نوكداۋنعا تۇسسە، سەگىزىنشى راۋندتا رەفەري قازاقستاندىق بوكسشىنىڭ ەسەبىنەن ءبىر ۇپاي شەگەردى.

26 جاستاعى قازاقستاندىق ءۇشىن بۇل كاسىپقوي بوكستاعى ەكىنشى جەكپە-جەگى بولاتىن. ال قارسىلاسىنا كەلەر بولساق، ماكگوۋەن العاش رەت جەڭىلىس تاپتى.