قازاقستاندىق ەكى بوكسشى WBC جانە WBO بەلبەۋىن جەڭىپ الدى
11:55, 19 - جەلتوقسان 2020
الماتى. قازاقپارات - الماتىدا قازاقستاندىق بوكسشىلار تانىمال MTK Global پروموۋتەر كومپانياسىنىڭ التىن كەلىسىمشارتىن جەڭىپ الۋ ءۇشىن ءوزارا باق سىناستى، دەپ حابارلايدى قازاقپارات Sports.kz رەسۋرسىنا سىلتەمە جاساپ.
تۋرنيردە العاشقى جەڭىستى تورعىنبەك ءامىروۆ (3-0، 0 ك و) قانجىعاسىنا بايلادى. ول تورەشىلەر شەشىمىمەن ءالىمجان تۇرسىنوۆتان باسىم ءتۇستى.
ال «التىن كەلىسىمشارتتىڭ» ەكىنشى يەسى - نۇربول سۇلتانباي (4-0، 1 ك و). ول فينالدا ميراس ەرتانوۆتى ۇتتى.
ءامىروۆ پەن سۇلتانباي كەلىسىمشارتتان بولەك، ەكى چەمپيون بەلبەۋىن جەڭىپ الدى.
ولار - WBC (ABC Silver) جانە WBO Asia Pacific. تورعىنبەك ءامىروۆ ەكىنشى جارتىلاي جەڭىل سالماقتا ەكى تيتۋلدى بىرىكتىرسە، نۇربول سۇلتانباي ءبىرىنشى ورتا سالماقتا قوس تيتۋلعا يە بولدى.