كەلىسسوز بارىسىندا مەملەكەت باسشىسى ومان سۇلتانىنا ءىلتيپات تانىتىپ، ونىڭ سۇلتان رەتىندە ورتالىق ازياعا العاش رەت ساپارمەن كەلگەنىن اتاپ ءوتتى.
- وماندى قازاقستاننىڭ اراب الەمىندەگى ۋاقىت تەزىنەن وتكەن ءارى سەنىمدى سەرىكتەسى سانايمىز. كەلەسى جىلى ايتۋلى داتا - قازاقستان مەن ومان اراسىنداعى ديپلوماتيالىق قارىم- قاتىناستىڭ ورناعانىنا 35 جىل تولۋىن زور ماقتانىشپەن اتاپ وتەمىز. وسى ۋاقىت ىشىندە تاتۋ دوستىققا، ءوزارا قۇرمەت پەن قولداۋعا نەگىزدەلگەن سەرىكتەستىكتىڭ جاڭا كەزەڭى ءۇشىن بەرىك ىرگەتاس قالاندى. جاقىندا ومان پرەمەر- ءمينيسترىنىڭ ەكونوميكالىق ماسەلەلەر جونىندەگى ورىنباسارى زيازين بەن حايسام ءال سايد باستاعان جوعارى دەڭگەيدەگى دەلەگاتسيانىڭ استاناعا جاساعان جەمىستى ساپارى مەملەكەتتەر اراسىنداعى قارىم-قاتىناستىڭ جاندانا تۇسكەنىن ايقىن كورسەتەدى،-دەدى قازاقستان پرەزيدەنتى.
مەملەكەت باسشىسى قول جەتكىزگەن ۋاعدالاستىقتار باۋىرلاس حالىقتارعا ايتارلىقتاي پايدا اكەلىپ، ستراتەگيالىق سەرىكتەستىكتى جاڭا دەڭگەيگە كوتەرۋگە ىقپال ەتەتىنىنە سەنىم ءبىلدىردى.
- كەلىسسوزدەر قورىتىندىسى بويىنشا ەكونوميكالىق ىنتىماقتاستىقتىڭ ءتۇرلى باعىتتارىن، سونىڭ ىشىندە ەنەرگەتيكا، كولىك-لوگيستيكا، اۋىل شارۋاشىلىعى، اقپاراتتىق تەحنولوگيالار، سيفرلاندىرۋ، دەنساۋلىق ساقتاۋ جانە باسقا دا سالالاردى قامتيتىن ەكىجاقتى كەلىسىمدەرگە قول قويامىز. بۇدان بولەك، سەرىكتەستىگىمىزدىڭ باسىم باعىتتارىن بەلگىلەيتىن بىرلەسكەن مالىمدەمە قابىلدايمىز،-دەدى قاسىم-جومارت توقايەۆ.
پرەزيدەنت ورتاق جوبالاردىڭ ىسكە اسىرىلۋىن وڭ باعالادى. ولاردىڭ قاتارىندا «دوڭعا» مۇناي كەن ورنىن يگەرۋ، Solidcore Resources كومپانياسىنىڭ پاۆلودار جانە سولتۇستىك قازاقستان وبلىستارىنداعى كاسىپورىندارى، Oman Investment Authority بىرلەسكەن ينۆەستيتسيالىق قورى، سونداي-اق قوناق ءۇي جانە شيپاجاي ينفراقۇرىلىمىن دامىتۋ جوبالارى بار.