اعايىندى نۇرباقىت پەن اقنيەت بايتاندار وتباسىنان جالعاسقان تىگىنشىلىك ونەردى كاسىپكە اينالدىرىپ، بۇگىندە ونىمدەرىن قازاقستاننان بولەك، ا ق ش پەن ەۋروپا ەلدەرىنە دە جونەلتىپ وتىر. El.kz ءتىلشىسى برەند نەگىزىن قالاۋشى نۇرباقىت بايتانمەن ۇلتتىق كيىم ءوندىرىسىنىڭ ەرەكشەلىكتەرى، شەتەلدىك تاپسىرىستار جانە الەۋمەتتىك جەلى ارقىلى ساۋدانى دامىتۋ جولدارى تۋرالى اڭگىمەلەستى.
برەندتىڭ تاريحى 2022 -جىلدان باستاۋ العان. ءبىراق نۇرباقىت بايتاننىڭ وتباسى ءۇشىن تىگىنشىلىك بۇرىننان تانىس كاسىپ. ونىڭ ناعاشى اتاسى التىنبەك تۇركىستان قالاسىندا ۇلتتىق باس كيىم تىگۋمەن اينالىسقان بەلگىلى شەبەر بولعان. كەيىن بۇل ونەردى قىزى، ياعني نۇرباقىتتىڭ اناسى مەڭگەرگەن. ال 2022 -جىلى نۇرباقىت قارىنداسى اقنيەتپەن بىرگە وتباسىلىق كاسىپتى جاڭا باعىتتا دامىتىپ، جەكە برەندىن قۇرعان.
بۇل كاسىپتى العاش ناعاشى اتام التىنبەك باستاعان. ول تۇركىستان قالاسىندا قازاقى ناقىشتاعى ۇلتتىق باس كيىمدەر تىككەن. كەيىن انام وسى ونەردى ۇيرەندى. ءبىز دە بالا كەزىمىزدەن تىگىنشىلىكتىڭ قىر- سىرىن كورىپ وستىك. ءسويتىپ، 2022 -جىلى قارىنداسىم ەكەۋمىز جەكە برەندىمىزدى اشتىق، - دەيدى كاسىپكەر.
قازىر شىمكەنتتەگى شەبەرحانادا بەس تىگىنشى ەڭبەك ەتەدى. كاسىپتىڭ كۇندەلىكتى جۇمىسىنا نۇرباقىتتىڭ اناسى، قارىنداسى مەن اعاسى دا اتسالىسادى. وسىلايشا، بىرنەشە ۇرپاق بويى جالعاسقان قولونەر بۇگىندە تۇتاس وتباسىنىڭ ورتاق ىسىنە اينالعان.
ۇلتتىق كيىمنىڭ باعاسى 10 مىڭ تەڭگەدەن باستالادى
كاسىپكەرلەر برەندتى قۇرعان كەزدە الدىنا ناقتى ماقسات قويعان. ول - ۇلتتىق ناقىشتاعى كيىمدەردى تەك مەرەكەلىك شارالاردا ەمەس، كۇندەلىكتى ومىردە دە كيۋگە ىڭعايلى ءارى كوپشىلىككە قولجەتىمدى ەتۋ. نۇرباقىتتىڭ ايتۋىنشا، ۇلتتىق كيىمنىڭ باعاسى قىمبات دەگەن تۇسىنىك ءالى دە كەزدەسەدى. سوندىقتان ولار ءونىم قۇنىن بارىنشا قولجەتىمدى دەڭگەيدە ۇستاۋعا تىرىسادى. قازىر برەندتىڭ ءبىر بۇيىمى 10 مىڭنان 30 مىڭ تەڭگەگە دەيىن ساتىلادى.
باستاپقى ماقساتىمىز قازاقى ناقىشتاعى كيىمدەردى كوپشىلىككە قولجەتىمدى ەتۋ بولدى. ويتكەنى ۇلتتىق كيىم قىمبات دەگەن تۇسىنىك بار. قازىر ادامدار قازاقى كيىمدەردى كۇندەلىكتى ومىردە كيىپ، سانگە اينالدىرا باستادى. ءبىز دە وسى ءۇردىستى قولداپ، باعامىزدى قولجەتىمدى دەڭگەيدە ساقتاپ وتىرمىز، - دەيدى نۇرباقىت بايتان.
كاسىپكەردىڭ سوزىنشە، ساتىپ الۋشىنى قىزىقتىرۋ ءۇشىن كيىمنىڭ سىرتقى كورىنىسى مەن باعاسى عانا جەتكىلىكسىز. ونىڭ تاريحىن، ەرەكشەلىگىن جانە ۇلتتىق ءمانىن دە تۇسىندىرە ءبىلۋ ماڭىزدى. سوندىقتان برەند الەۋمەتتىك جەلىلەردەگى بەينەروليكتەرىندە ونىمدەرىن تانىستىرۋمەن قاتار، ويۋ- ورنەكتەردىڭ ماعىناسى مەن شىعۋ تاريحىنا دا توقتالادى.
ءبىز كيىمدەرىمىزدى كرەاتيۆتى تۇردە كورسەتۋگە تىرىسامىز. ءار بۇيىمنىڭ تاريحىن ايتىپ، ويۋ-ورنەكتەردىڭ قانداي ماعىنا بەرەتىنىن تۇسىندىرەمىز. ادامداردىڭ ءبىزدىڭ ونىمدەرگە قىزىعۋشىلىق تانىتۋىنا وسى ءتاسىل دە اسەر ەتەدى دەپ ويلايمىن، - دەيدى ول.
شىمكەنتتە تىگىلگەن كيىمدەر شەتەلگە جونەلتىلەدى
بۇگىندە وتاندىق برەندتىڭ ونىمدەرىنە قازاقستاننان تىس جەرلەردەن دە تاپسىرىس تۇسەدى. اسىرەسە رەسەيدەگى ساتىپ الۋشىلار بەلسەندى. بۇدان بولەك، پولشا، گەرمانيا، ا ق ش، ەستونيا، قىرعىزستان، وزبەكستان جانە تاجىكستاننان دا تاپسىرىس بەرگەندەر بار. كاسىپكەردىڭ ايتۋىنشا، شەتەلگە جونەلتىلەتىن كيىم سانى اي سايىن وزگەرىپ وتىرادى. كەي ايلاردا ون شاقتى بۇيىم شەتەلدىك تۇتىنۋشىلارعا جەتكىزىلەدى.
بىزگە كوبىنە رەسەيدەن تاپسىرىس كەلەدى. سونىمەن قاتار پولشا، گەرمانيا، اقش، ەستونيادان دا تاپسىرىستار بولدى. قىرعىزستان، وزبەكستان، تاجىكستاننان دا الۋشىلار بار. كەي ايلاردا شەتەلگە ون شاقتى كيىم جونەلتەمىز، - دەيدى كاسىپكەر.
نۇرباقىت ءۇشىن شەتەلدىك تاپسىرىستاردىڭ ءتۇسۋى وتاندىق ونىمگە قازاقستاننان تىس جەرلەردە دە قىزىعۋشىلىق بار ەكەنىن كورسەتەدى. دەگەنمەن كاسىپكەرلەر ازىرگە ءوندىرىستى شىمكەنتتە ساقتاپ، تاپسىرىستاردى سول جەردەن جونەلتەدى.
TikTok تاپسىرىستىڭ نەگىزگى كوزىنە اينالعان
نۇرباقىت بايتاننىڭ ايتۋىنشا، بۇگىندە برەندكە تۇسەتىن تاپسىرىستاردىڭ شامامەن 65 پايىزى TikTok ارقىلى كەلەدى. قالعان بولىگى Instagram, Threads جانە شىمكەنتتەگى دۇكەن ارقىلى تۇسەدى. كاسىپكەر الەۋمەتتىك جەلىنى تەك جارناما الاڭى رەتىندە ەمەس، ساتىپ الۋشىمەن تىكەلەي بايلانىس ورناتۋدىڭ ءتيىمدى قۇرالى دەپ سانايدى. اسىرەسە ءونىمنىڭ دايىندالۋ ەرەكشەلىگىن، ۇلتتىق ناقىشىن جانە قولدانىلۋىن كورسەتەتىن بەينەروليكتەرگە ءمان بەرەدى. ءبىر قىزىعى، برەندتىڭ الەۋمەتتىك جەلىدەگى كونتەنتىن ارنايى اگەنتتىك نەمەسە سىرتتان جالدانعان ماماندار ەمەس، وتباسى مۇشەلەرىنىڭ وزدەرى دايىندايدى.
بەينەلەردىڭ ءبارىن كوبىنە ءوزىمىز تۇسىرەمىز. ويتكەنى ءوز تاۋارىڭنىڭ قۇندىلىعىن ءوزىڭ جاقسى بىلەسىڭ. سىرتتان SMM مامانىن جالداساڭ، ول ءونىمنىڭ ەرەكشەلىگىن سەن سياقتى جەتكىزە الماۋى مۇمكىن. سوندىقتان كونتەنتتى ءوزىمىز جاساپ، تىكەلەي ەفيرلەرگە دە شىعىپ ءجۇرمىز، - دەيدى ول.
كاسىپكەردىڭ ايتۋىنشا، تىكەلەي ەفيرلەر ونلاين ساۋدانىڭ ماڭىزدى بولىگىنە اينالىپ كەلەدى. مۇنداي فورماتتا ساتىپ الۋشى ءونىمدى كورىپ قانا قويماي، ونىڭ ەرەكشەلىكتەرى تۋرالى سۇراقتارىن بىردەن قويا الادى. نۇرباقىت الەۋمەتتىك جەلىدەگى تابىستى تەك قارالىم سانىمەن ولشەمەيدى. ول ءۇشىن ەڭ ماڭىزدىسى - كورەرمەننىڭ ونىمگە قىزىعۋشىلىق تانىتىپ، ناقتى تاپسىرىس بەرۋى.
«بەدەلىڭ بولماسا، بيزنەسىڭنىڭ بولاشاعى جوق»
ءونىم باعاسىن قولجەتىمدى دەڭگەيدە ساقتاۋ كاسىپكەرلەردى ساپاعا قويىلاتىن تالاپتى تومەندەتۋگە يتەرمەلەمەۋى كەرەك. نۇرباقىت بايتان بيزنەستىڭ تۇراقتى دامۋى تۇتىنۋشى سەنىمىنە تىكەلەي بايلانىستى ەكەنىن ايتادى. ونىڭ سوزىنشە، قىسقا مەرزىمدە پايدا تابۋدان گورى برەندتىڭ بەدەلىن قالىپتاستىرىپ، ساتىپ الۋشىلاردىڭ سەنىمىن ساقتاۋ ماڭىزدى.
ءبىزدىڭ ماقساتىمىز تەك قازىر تابىس تابۋ ەمەس. كاسىبىمىزدى بولاشاقتا دا دامىتقىمىز كەلەدى. ال ول ءۇشىن بەدەلىڭ بولۋى كەرەك. ەگەر بەدەلىڭ بولماسا، بيزنەسىڭنىڭ دە بولاشاعى جوق دەپ ەسەپتەيمىن. سوندىقتان ءونىم ساپاسىنا ەرەكشە كوڭىل بولەمىز، - دەيدى كاسىپكەر.