UFC الاڭىنداعى تۇڭعىش قازاقستاندىق قىزدىڭ كەلەسى قارسىلاسى بەلگىلى بولدى
16:32, 06 - مامىر 2022
نۇر- سۇلتان. قازاقپارات - UFC- دە ونەر كورسەتەتىن قازاقستاندىق سپورتشى قىز ماريا اگاپوۆا امەريكالىق پروموۋشندەگى كەلەسى قارسىلاسىنىڭ كىم ەكەنىن ءبىلدى، دەپ حابارلايدى قازاقپارات Sports.kz رەسۋرسىنا سىلتەمە جاساپ.
پاۆلودار تۋماسى كەلەسى جەكپە- جەگىن 30-شىلدەدە وڭتۇستىك كورەيا وكىلى ەن دجين كيمگە (9-5-2) قارسى وتكىزەدى. 32 جاستاعى كورەيالىق UFC- دە 2017 -جىلدان بەرى ونەر كورسەتەدى. ول سەگىز ايقاس وتكىزىپ، ونىڭ ىشىندە ۇشەۋىندە جەڭىسكە جەتكەن.
ايتا كەتەيىك، ماريا اگاپوۆا امەريكالىق ليگادا ءتورت رەت ايقاس وتكىزىپ، ەكەۋىندە جەڭىسكە جەتتى جانە ەكەۋىندە جەڭىلىس تاپتى. اگاپوۆا سوڭعى جەكپە- جەگىندە ۋكراينالىق مارينا موروزعا ەكىنشى راۋندتا ەسە جىبەرگەن بولاتىن!
اۆتور: اقبوپە ءابدراسۋل