فۋتبولدان UEFA ۇلتتار ليگاسىندا قازاقستان سلوۆاكيانى جەڭدى
بۇعان دەيىن قازاقستاندىقتار ءوز توبىندا 7 ۇپايمەن كوش باستاپ كەلە جاتقانىمەن، ەكىنشى ورىنداعى سلوۆاكيالىقتار نەگىزگى فاۆوريت ەدى. ءوز الاڭىندا قازاقستانعا 0:1 ەسەبىمەن ەسە جىبەرگەن سلوۆاكيا ەلورداعا قالايدا قارىمتا قايتارۋ ءۇشىن كەلگەن ەدى.
بۇل ويىندا قۇراماعا ورالعان اسحات تاعىبەرگەن كاپيتاندىق تىزگىندى قايتا قولعا الدى.
ال يسلامبەك قۋات ەكى رەت ەسكەرتۋ العاندىقتان، ماتچتان تىس قالدى. ءبىرىنشى تايمدا 18-مينۋتتا وڭ قاپتالداعى ميحايل گابىشيەۆتان پاس العان يان ۆوروگوۆسكي ەسەپ اشتى.
31-مينۋتتا يا. ۆوروگوۆسكيدىڭ تاعى ءبىر گول سوعاتىن مۇمكىندىگى بولدى. ەسەسىنە 39-مينۋتتا تاعى دا وڭ قاپتالدان ا. تاعىبەرگەن بەرگەن دوپتى ەلحان استانوۆ باسپەن تورعا ءدال ءتۇسىردى.
بۇل ە. استانوۆتىڭ ۇلتتىق قۇراماداعى العاشقى گولى ەدى. ەكىنشى تايمنىڭ 51-مينۋتىندا سلوۆاكيالىق ماتۋش بەرونىڭ ايىپ الاڭىنا كىرمەستەن تەپكەن دوبى گولعا اينالدى - 1:2.
بۇدان كەيىن يگور شاتسكي ەكى مارتە ءوز قاقپاسىن امان الىپ قالدى. 87-مينۋتتا دورەكى ويناعان سلوۆاكيالىق وندرەي دۋدا الاڭنان قۋىلدى.
وسىلايشا، قارسىلاسىن 2:1 ەسەبىمەن تىزە بۇكتىرگەن قازاقستان قۇراماسى ۇپاي سانىن 10 عا جەتكىزدى.
رەسەيلىك مامان ماگومەد اديەۆ جاتتىقتىرعاننان بەرى قازاقستاندىقتار ءتورت كەزدەسۋىندە ۇشەۋىندە جەڭىسكە جەتتى. بۇل - تاماشا ناتيجە. قازاقستان قۇراماسى قالعان ويىندارىن قىركۇيەك ايىندا وتكىزەدى.
22 - قىركۇيەكتە بەلارۋستى قابىلداسا، ءۇش كۇننەن كەيىن سىرت الاڭدا ازەربايجانمەن كەزدەسەدى.
ەسكە سالا كەتەيىك، بۇدان بۇرىن فۋتبولدان ۇلتتار ليگاسىندا سلوۆاكيا كومانداسى ازەربايجاندى ۇتقانىن جازعان بولاتىنبىز. سونداي-اق قازاقستان - سلوۆاكيا كەزدەسۋىنە تورەشىلەر بەلگىلەندى.