- بۇگىندە تىزە اۋرۋلارى جاستار اراسىندا جيىلەپ بارادى. بۇعان نە سەبەپ؟
- قازىر كوپتەگەن اۋرۋلار، سونىڭ ىشىندە تىرەك-قيمىل اپپاراتىنىڭ پاتولوگيالارى جاسارىپ كەلەدى. بۇرىن كوبىنە ەگدە جاستاعى ادامدارعا ءتان بولعان اۋرۋلار بۇگىندە جاستار اراسىندا كەزدەسەدى. باستى سەبەپتەرى - بۇرىن العان جاراقاتتار، اسىرەسە سپورتپەن اينالىسۋ كەزىندە بولاتىن زاقىمدار. ەكىنشى سەبەپ - ارتىق دەنە سالماعى. ول ءوز كەزەگىندە قيمىل- قوزعالىستىڭ ازدىعىمەن جانە دۇرىس تاماقتانباۋمەن تىكەلەي بايلانىستى.
- تىزە بۋىنىندا اقاۋ بار ەكەنىن كورسەتەتىن العاشقى بەلگىلەر قانداي؟ قانداي جاعدايدا دارىگەرگە قارالۋ قاجەت؟
- ەگەر اۋىرسىنۋ ۇزاق ۋاقىت باسىلماي، تۇراقتى تۇردە مازالاسا، بۇل دارىگەرگە قارالۋعا جەتكىلىكتى سەبەپ. جالپى، تىزە تۇسىندا قانداي دا ءبىر جايسىزدىق سەزىلسە، ونى ەلەمەي جۇرە بەرمەگەن ءجون. ەمدى ۋاقىتىندا باستاپ، دارىگەردىڭ ۇسىنىمدارىن ورىنداۋ تولىق ساۋىعۋعا مۇمكىندىك بەرەدى.
- ال جۇرگەندە، وتىرىپ-تۇرعاندا نەمەسە باسپالداقپەن كوتەرىلگەندە تىزە سىقىرلاسا، الاڭداۋ كەرەك پە؟
- سىقىر پاتولوگيانىڭ بەلگىسى ەمەس. كوپ جاعدايدا بۇل قالىپتى قۇبىلىس. الايدا سىقىرلاۋمەن قاتار اۋىرسىنۋ نەمەسە بۋىن قوزعالىسىنىڭ شەكتەلۋى بايقالسا، دارىگەرگە قارالۋ قاجەت.
- جاستار سپورتقا اۋەس. الايدا شامادان تىس جاتتىعۋ تىزەگە زيان كەلتىرۋى مۇمكىن بە؟
- شۆەيتساريالىق دارىگەر ءارى فيلوسوف پاراتسەلستىڭ «ءبارى دە - ۋ، ءبارى دە - ءدارى. ەڭ باستىسى - مولشەرىن ءبىلۋ» دەگەن ءسوزى بار. دۇرىس تاڭدالعان فيزيكالىق جۇكتەمە تىزە بۋىندارىنا عانا ەمەس، جالپى اعزا ساۋلىعىنا وڭ اسەر ەتەدى. ال جاتتىعۋلاردى دۇرىس ورىنداماۋ، جۇكتەمە مەن دەمالىس ۋاقىتىن الماستىرماۋ كەرىسىنشە زيان كەلتىرۋى مۇمكىن.
اسىرەسە اياقتىڭ ءوز ءوسى بويىمەن نەمەسە وعان قارسى بۇرالۋى جانە ءبىر مەزگىلدە وستىك جۇكتەمەنىڭ ءتۇسۋى جاراقات قاۋپىن ارتتىرادى. مۇنداي قوزعالىستار فۋتبول، ۆولەيبول جانە باسكەتبول ويىندارىندا ءجيى كەزدەسەدى.
- بۋىن ساۋلىعىنا تاماقتانۋ دا اسەر ەتەدى. ەنەرگەتيكالىق سۋسىندار مەن قانتتى تاعامداردى ءجيى تۇتىنۋ شەمىرشەككە زيان با؟
- كالورياسى تومەن ءارى اقۋىز مولشەرى جەتكىلىكسىز ديەتا جالپى اعزاعا، سونىڭ ىشىندە تىزە بۋىندارىنا كەرى اسەر ەتەدى. ەنەرگەتيكالىق سۋسىنداردىڭ قۇرامىنداعى كوفەين مەن تاعامداعى قانتتىڭ شامادان تىس كوپ بولۋى دا بۋىن شەمىرشەگىنىڭ قۇرىلىمى مەن ساپاسىنا تەرىس ىقپال ەتەدى.
- ەگەر شەمىرشەك زاقىمدانسا، ونى تولىق قالپىنا كەلتىرۋگە بولا ما؟
- وكىنىشكە قاراي زاقىمدالعان شەمىرشەكتى تولىق قالپىنا كەلتىرۋ مۇمكىن ەمەس. بۋىن شەمىرشەگى قان تامىرلارى ارقىلى ەمەس، سينوۆيالدى سۇيىقتىق، ياعني بۋىن ىشىندەگى سۇيىقتىق ارقىلى قورەكتەنەدى. قالىپتى ءجۇرۋ مەن قالىپتى فيزيكالىق بەلسەندىلىك وسى ۇدەرىسكە ىقپال ەتەدى. سوندىقتان تۇراقتى ءارى شامادان تىس ەمەس دەنە بەلسەندىلىگى شەمىرشەكتىڭ بۇزىلۋىن باياۋلاتۋدىڭ نەگىزگى جولدارىنىڭ ءبىرى سانالادى.
- تىزە اۋرۋى كوبىنە وتاعا اكەلە مە؟ قانداي جاعدايدا وتاسىز ەمدەلۋگە بولادى؟
- اۋىرسىنۋدىڭ ءوزى حيرۋرگيالىق ارالاسۋعا نەگىزگى كورسەتكىش بولا المايدى. تىزە بۋىنى پاتولوگيالارىن ەمدەۋدە الدىمەن كونسەرۆاتيۆتى تەراپيا، ياعني وتاسىز ەمدەۋ ادىستەرى قولدانىلادى.
ەمدەۋ، ادەتتە، ءومىر سالتىن وزگەرتۋدەن، ەمدىك دەنە شىنىقتىرۋدان، تاماقتانۋ راتسيونىن تۇزەتۋدەن جانە ءدارى-دارمەك قابىلداۋدان باستالادى. بۇدان بولەك، بۋىن ىشىنە ينەكتسيا جاساۋ، PRP- تەراپيا (پلازمالىق تەراپيا)، سينوۆيالدى سۇيىقتىقتىڭ ورنىن الماستىراتىن پرەپاراتتار مەن فيزيوتەراپيا قولدانىلادى. كوپ جاعدايدا مۇنداي ەم بەلگىلەردى جويۋعا مۇمكىندىك بەرەدى، ال اۋرۋ اسقىنعان جاعدايدا حيرۋرگيالىق ارالاسۋدى كەيىنگە شەگەرۋگە كومەكتەسەدى.
- ارتروز كوبىنە ەگدە جاستاعى ادامداردا كەزدەسەدى. دەگەنمەن 19-20 جاستاعى جاستاردا دا بۇل دياگنوز انىقتالۋى مۇمكىن بە؟
- ءيا، مۇمكىن. جاستاردا ارتروز كوبىنە ديسپلازيالىق وزگەرىستەرگە، ياعني بۋىننىڭ تۋا بىتكەن دامۋ ەرەكشەلىكتەرىنە نەمەسە بۇرىن العان اۋىر جاراقاتتاردىڭ سالدارىنا بايلانىستى پايدا بولادى.
- كۇنى بويى كومپيۋتەر الدىندا وتىراتىن نەمەسە از قيمىلدايتىن ادامدار نەنى ەسكەرۋى كەرەك؟
- ءبىز جۇمىستا ۇزاق وتىرامىز، باسپالداقتىڭ ورنىنا ليفتىنى پايدالانامىز، جاياۋ ءجۇرۋدىڭ ورنىنا كولىكپەن قاتىنايمىز. سوندىقتان كۇندەلىكتى سەرۋەندەۋ جانە اپتاسىنا ءۇش رەت قالىپتى جاتتىعۋ جاساۋ تىزە بۋىندارىنا قاتىستى كوپتەگەن ماسەلەنىڭ الدىن الۋعا كومەكتەسەدى.
- سوڭعى ۋاقىتتا بۋىن اۋرۋلارىنا قارسى حوندروپروتەكتورلار مەن شەمىرشەك ءتىنىن قالپىنا كەلتىرۋگە ارنالعان پرەپاراتتار ءجيى ۇسىنىلادى. ولاردىڭ تيىمدىلىگى عىلىمي تۇرعىدان دالەلدەنگەن بە؟
- وعان قاتىستى قاتىستى كوپتەگەن عىلىمي زەرتتەۋ جۇرگىزىلگەنىمەن، تيىمدىلىگىن راستايتىن سەنىمدى دالەلدەر جوق. كوبىنە پرەپاراتتاردى قولدانعاننان كەيىنگى وڭ اسەر پلاتسەبومەن بايلانىستى بولۋى مۇمكىن، ياعني ناۋقاس ءدارىنىڭ كومەكتەسەتىنىنە ءوزى سەنەدى.
سونداي-اق مۇنداي پرەپاراتتاردىڭ تيىمدىلىگىنە ارنالعان زەرتتەۋلەردى كوبىنە ولاردى وندىرەتىن فارماتسيەۆتيكالىق كومپانيالار قارجىلاندىرادى. سوندىقتان زەرتتەۋ ناتيجەلەرىنىڭ وبەكتيۆتىلىگىنە قاتىستى سۇراق كوپ.
- سۇحباتىڭىزعا راحمەت!
اۆتور
ءمولدىر سنادين