تەڭىز ۆاحتا قالاشىعىنا 2,5 مىڭعا جۋىق قۇلسارىلىق ەۆاكۋاتسيالانىپ جاتىر

اتىراۋ. KAZINFORM - اتىراۋ وبلىسىنداعى قۇلسارى قالاسىنان تۇرعىنداردى تەڭىز كەن ورنىنداعى ۆاحتا كەنتىنە ەۆاكۋاتسيالاپ جاتىر. ۆاحتا قالاشىعىندا 2,5 مىڭعا جۋىق توسەك-ورىن دايىندالعان.

اتىراۋ وبلىستىق جەدەل شتابىنىڭ مالىمەتىنشە، قۇلسارى قالاسىنىڭ تۇرعىندارى تەڭىز ۆاحتا كەنتىنە ءىشىنارا ەۆاكۋاتسيالانادى.

تاسقىن سۋعا بايلانىستى وسىنداي شەشىم قابىلدادى.

«جىلىوي اۋدانىندا سۋ تاسقىنىنىڭ قاۋپىنە ءتونىم، توتەنشە جاعداي جاريالاندى. كەشە دابىل جۇيەسى قوسىلدى. وسىعان وراي تەڭىز ۆاحتا كەنتىندە 2,5 مىڭعا جۋىق توسەك- ورىن دايىندالدى. تۇرعىندار 35 اۆتوبۋسپەن ءقاۋىپسىز جەرگە كوشىرىلىپ جاتىر»، - دەپ حابارلادى وبلىستىق جەدەل شتابتان.

بۇگىن، 6-ءساۋىر ساعات 00.30-داعى جاعداي بويىنشا قۇلسارى قالاسىندا شامامەن 2480 تۇرعىن ءۇي مەن اكىمشىلىك عيماراتتى سۋ باسقان.

ونىڭ 630 ى - تۇرعىن ءۇي. الايدا، سالىنىپ تۇرعان 100 ۇيگە تۇرعىندار قونىستانباعان.

«اۋدانداعى 14 قابىلداۋ پۋنكتىنە 9484 ادام ەۆاكۋاتسيالانادى. مەكتەپتەرگە كوشىرىلەتىن تۇرعىنداردىڭ اراسىندا 4644 بالا بار. مايكومگەن اۋىل وكرۋگىنىڭ مادەنيەت ءۇيى مەن مەكتەپتەرىنە 415 ادام ەۆاكۋاتسيالاندى»، - دەپ ءمالىم ەتتى جەدەل شتابتان.

قازىر جىلىوي اۋدانىندا تاسقىن سۋدان قورعاۋ بوگەت سالۋ، بەكىتۋ جۇمىستارى جالعاسىپ جاتىر.

ەسكە سالا كەتەلىك، بۇعان دەيىن تاسقىن سۋ اتىراۋ وبلىسىنداعى قۇلسارى قالاسىنا كىرە باستاعانىن جازعان ەدىك.

قۇلسارى قالاسىندا 2500 ءۇيدى تاسقىن سۋ باسىپ، 4000 ادام، ونىڭ ىشىندە 1 مىڭنان استام بالا كوشىرىلدى.

قۇلسارىدا اكىمدىك، الەۋمەتتىك نىساندار مەن ورتالىق ستاديون سۋ استىندا قالدى.

سونداي-اق، قۇلسارىدا ومىرگە كەلگەن ەگىز ۇل جانە اۋرۋحانادا جاتقان 77 ناۋقاس ماڭعىستاۋ وبلىسى بەينەۋ اۋدانىنىڭ اۋرۋحاناسىنا ەۆاكۋاتسيالانىپ جاتىر.