تىيىم سالىنعان جەردە شومىلعانى ءۇشىن قانشا ايىپپۇل سالىنادى

الماتى. KAZINFORM - وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا الماتى قالاسى توتەنشە جاعدايلار دەپارتامەنتى ازاماتتىق قورعانىس باسقارماسىنىڭ اعا وفيتسەرى ەسبول سۇلتانوۆ تىيىم سالىنعان جەرلەردە شومىلعانى ءۇشىن تۇرعىندارعا ايىپپۇل سالىناتىنىن ايتتى.

«سۋ ايدىندارىنداعى قاۋىپسىزدىك ەرەجەلەرىن بۇزعانى نەمەسە ورىنداماعانى ءۇشىن جاۋاپتى تۇلعالار مەن ازاماتتار «اكىمشىلىك قۇقىق بۇزۋشىلىق تۋرالى» ق ر كودەكسىنىڭ 412 - بابى بويىنشا 7 ا ە ك (25 مىڭ تەڭگە) ايىپپۇل تۇرىندە اكىمشىلىك جاۋاپكەرشىلىككە تارتىلاتىن بولادى»، - دەدى ول.

الماتى ت ج د قۇتقارۋشىلارى دەمالۋشىلاردى تەك شومىلۋ ءۇشىن جابدىقتالعان ورىنداردى تاڭداۋعا، سۋ ايدىندارىنداعى تىيىم سالۋ بەلگىلەرىنە بەي-جاي قاراماۋعا شاقىردى.

رەسپۋبليكالىق جەدەل- قۇتقارۋ جاساعىنىڭ سۇڭگۋىر- قۇتقارۋ بولىمشەسىنىڭ باسشىسى اندرەي بىبچەنكونىڭ سوزىنشە، ەڭ نەگىزگى ماسەلە - قاۋىپسىزدىك.

«ارەكەت الگوريتمى، ادەتتە ءارقاشان نازار اۋدارادى. ءسىز قانداي دا ءبىر سۋ ايدىنىنا كەلگەندە، اينالاڭىزعا قاراپ، وعان قۇتقارۋ قۇرالدارى، قۇتقارۋ مۇنارالارى مەن قۇتقارۋشىلاردىڭ وزدەرى، سونداي-اق مەديتسينالىق كومەك كورسەتۋ پۋنكتى بار ەكەنىنە كوز جەتكىزۋىڭىز كەرەك. بۇل قالقانداردا نەمەسە مۇنارالاردا ءاردايىم قۇتقارۋ شەڭبەرى بولادى، ونى سۋعا باتىپ جاتقان ادامعا تاستاۋعا بولادى. ەگەر ءسىز ادامنىڭ سۋعا باتىپ بارا جاتقانىن كورسەڭىز، اينالاڭىزداعى ادامدار نە بولىپ جاتقانىن كورۋى ءۇشىن بار داۋىسپەن كومەككە شاقىرۋ قاجەت. سول كەزدە بەلگىلى ءبىر ۋاقىتتا قاجەتتى قىزمەتتەر كومەككە كەلەدى»، - دەدى اندرەي بىبچەنكو.

قازىر الماتى سۋ ايدىندارىنىڭ شومىلۋعا قاۋىپتى ايماقتارىندا اقپاراتتىق ستەندتەر، باننەرلەر، سونداي-اق وسى جەردە شومىلۋعا تىيىم سالاتىن قاۋىپسىزدىك بەلگىلەرى ورناتىلىپ جاتىر.

بۇعان دەيىن الماتىدا شومىلۋعا رۇقسات ەتىلگەن ءتورت ورىن بەلگىلەنگەنى تۋرالى جازعان ەدىك.

اۆتور
الما مۇقانوۆا