پۋتينمەن تەلەفون ارقىلى سويلەسۋ ەش ناتيجە بەرمەدى - ترامپ
استانا. KAZINFORM - ا ق ش پرەزيدەنتى دونالد ترامپ رەسەي پرەزيدەنتى ۆلاديمير پۋتينمەن تەلەفون ارقىلى سويلەسكەننەن كەيىن رەسەي-ۋكراينا قاقتىعىسىنداعى اتىستى توقتاتۋ بويىنشا «ەشقانداي ىلگەرىلەۋشىلىككە قول جەتكىزبەگەنىن» ايتتى، دەپ حابارلايدى NBC News.
- جوق، بۇگىنگى سويلەسۋدە ەشقانداي ىلگەرىلەۋ بولعان جوق، - دەدى دونالد ترامپ.
ا ق ش پرەزيدەنتى اڭگىمە ناتيجەسىنە كوڭىلى تولمايتىنىن اتاپ ءوتتى.
- ءبىز تەلەفون ارقىلى سويلەستىك. بۇل وتە ۇزاق اڭگىمە بولدى. ءبىز كوپ نارسە ايتتىق، سونىڭ ىشىندە يران تۋرالى، ۋكراينامەن سوعىس تۋرالى دا سويلەستىك. ءبىراق ناتيجەسىنە كوڭىلىم تولمادى، - دەدى ا ق ش پرەزيدەنتى.
پۋتيننىڭ كومەكشىسى يۋري ۋشاكوۆ ەكى ەل باسشىلارىنىڭ «اشىق جانە مازمۇندى» سويلەسكەنىن جانە ترامپ رەسەي- ۋكراينا قاقتىعىسىندا تەز ارادا اتىستى توقتاتۋ مۇمكىندىگىن كوتەرگەنىن، ءبىراق پۋتين كەلىسپەيتىنىن حابارلادى.
پۋتين رەسەي قاقتىعىستاعى «وزىنە قويىلعان ماقساتتارعا قول جەتكىزەتىنىن» جانە قاقتىعىستى كەلىسسوزدەر ارقىلى ساياسي جولمەن شەشۋگە ۇمتىلۋدى جالعاستىراتىنىن ايتتى.
بۇعان دەيىن ىستانبۇلدا رەسەي مەن ۋكراينا كەلىسسوز جۇرگىزىپ جاتقانىن حابارلاعان ەدىك.