پۋتين قازاقستان پرەزيدەنتىن رەسەيدەگى ءىرى حالىقارالىق شارالارعا شاقىردى
استانا. KAZINFORM - رەسەي فەدەراتسياسىنىڭ پرەزيدەنتى ۆلاديمير پۋتين قازاقستانداعى كەزەكتى مەملەكەتتىك ساپارى بارىسىندا قازاقستان باسشىسى قاسىم-جومارت توقايەۆتى رەسەيدەگى ءىرى حالىقارالىق شارالارعا شاقىردى.
«ەڭ الدىمەن، وسىنداي سالتاناتتى كەزدەسۋ ءۇشىن پرەزيدەنتكە العىس ايتقىم كەلەدى. قاسىم-جومارت كەمەل ۇلى، ءبىز سىزبەن ۇنەمى كەزدەسىپ ءجۇرمىز جانە وسىنداي جۇمىس جاعدايىنا ۇيرەنىپ تە قالدىق. وسىنشالىق سالتاناتتى راۋىشتە قارسى الىپ جاتىرسىزدار. سىزگە كوپ راحمەت. دوستىعىمىز ءبىر توبە، ىسكەرلىك قارىم-قاتىناستى دا ءوز دەڭگەيىندە ۇستاپ كەلەمىز. ءبارى شىنىمەن دە ەڭ سەرپىندى، ەڭ جاقسى ۇلگىدە دامىپ جاتىر. ءبىز ۇنەمى بايلانىستامىز»، - دەدى رەسەي پرەزيدەنتى.
سونداي-اق، ول قاسىم- جومارت توقايەۆتى جەڭىستىڭ 80 جىلدىعىنا ارنالعان مەرەيتوي شاراسىنا شاقىردى.
«مەن ءسىزدى ادەتتەگىدەي جاڭا جىل قارساڭىندا ت م د اياسىندا وتەتىن سانكت-پەتەربۋرگتەگى بەيرەسمي كەزدەسۋدە كورەمىز دەپ ۇمىتتەنەمىن. البەتتە، ءسىزدى ۇلى وتان سوعىسىنداعى جەڭىستىڭ 80 جىلدىعىنا ارنالعان مەرەيتويدا كۇتەمىن. بۇل ءبىزدىڭ ورتاق جەڭىسىمىز»، - دەدى ۆلاديمير پۋتين.
مەملەكەت باسشىسى قاسىم-جومارت توقايەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەڭەيتىلگەن قۇرامداعى كەلىسسوزدە ەكى ەلدىڭ ۇكىمەتتەرىنە ءبىرقاتار تاپسىرمالار بەرىلگەنىن ءمالىم ەتتى.
«مەملەكەتتىك ساپارمەن كەلۋ تۋرالى شەشىم قابىلداعانىڭىز ءۇشىن تاعى دا ريزاشىلىعىمدى بىلدىرەمىن. بۇعان دەيىن ايتقانىمداي، بۇل ساپار ءبىزدىڭ ستراتەگيالىق ارىپتەستىگىمىزدى كەڭەيتىپ، تەرەڭدەتۋ تۇرعىسىنان وتە ماڭىزدى. جاڭا عانا شاعىن قۇرامداعى كەلىسسوزدە ءبىز كۇن تارتىبىندەگى ماسەلەلەردى ىسكەرلىك احۋالدا، وتە تىڭعىلىقتى تالقىلادىق»، - دەدى پرەزيدەنت.
مەملەكەت باسشىسى ەكى ەل ىنتىماقتاستىعىنىڭ كۇن ءتارتىبى كەڭ اۋقىمدى ەكەنىن اتاپ ءوتتى.
«ورتاق ماملەگە كەلىپ، ۇكىمەتكە ءتيىستى تاپسىرمالار بەردىك دەپ ويلايمىن. الدىمىزدا وتە ۇلكەن جۇمىس كۇتىپ تۇر. مەن پرەزيدەنت رەتىندە، بۇل جۇمىستىڭ ءبارىن باقىلاۋدا ۇستايمىن. ويتكەنى ءبىز رەسەي فەدەراتسياسىمەن ىنتىماقتاستىقتى دامىتۋعا باسىمدىق بەرەمىز. ءبىزدىڭ مەملەكەتتەرىمىزدىڭ اراسىندا ەشقانداي كۇردەلى پروبلەما جوق. باسقا ماسەلەلەردە دە سونداي. ىنتىماقتاستىق تىعىز دامىپ جاتقاندىقتان ارينە، مەملەكەت باسشىلارى مەن ۇكىمەت باسشىلارىنىڭ نازارىن قاجەت ەتەتىن ماسەلەلەر تۋىنداپ جاتادى. ول ءۇشىن بارلىق ماسەلەلەردى شەشۋگە باعىتتالعان وسىنداي ءىس-شارالار ىسكە اسىرىلادى»، - دەدى قاسىم-جومارت توقايەۆ.