پۋتين مەن زەلەنسكي كەزدەسۋى ءتيىس - ترامپ
استانا. KAZINFORM - ا ق ش پرەزيدەنتى دونالد ترامپ رەسەي پرەزيدەنتى ۆلاديمير پۋتين مەن ۋكراينا باسشىسى ۆلاديمير زەلەنسكيدىڭ كەزدەسۋى ءوتۋى ءتيىس ەكەنىن مالىمدەدى، دەپ جازدى The Washington Post.
جۇما كۇنى جۋرناليستەرمەن اڭگىمە بارىسىندا ترامپ اتالعان كەزدەسۋدىڭ «مىندەتتى تۇردە وتەتىنىن» ايتتى.
ايتا كەتەيىك، كرەمل جاقىن بولاشاقتا ەكى ەل باسشىسىنىڭ كەلىسسوز وتكىزۋ مۇمكىندىگىن جوققا شىعارعان بولاتىن.
اق ۇيدەن شوتلاندياعا اتتانار الدىندا ترامپ ماسكەۋگە قاتىستى «ەكىنشى رەتتىك سانكسيالار» سالىنۋى مۇمكىن ەكەنىن تاعى ەسكەرتتى. بۇل شەكتەۋلەر رەسەيمەن بيزنەس جۇرگىزىپ وتىرعان ەلدەر مەن ۇيىمدارعا اسەر ەتۋى مۇمكىن.
بۇعان دەيىن ستامبۋلدا رەسەي مەن ۋكراينا دەلەگاتسيالارى اراسىندا وتكەن كەلىسسوزدەردىڭ ناتيجەلەرى تۋرالى حابارلانعان ەدى. 2 -ماۋسىمدا ەكى تاراپ ءوزارا الماستىرعان مەموراندۋمدار اياسىندا مەملەكەت باسشىلارىنىڭ ىقتيمال كەزدەسۋى دە تالقىلانعان.