پۋتين مەن اليەۆ باكۋدە پرەزيدەنتتەردىڭ بىرلەسكەن دەكلاراتسياسىنا قول قويدى
استانا. قازاقپارات- 19 - تامىزدا باكۋدە ۆلاديمير پۋتين مەن ازەربايجان رەسپۋبليكاسىنىڭ پرەزيدەنتى يلحام اليەۆتىڭ كەلىسسوزدەرى ءوتىپ، ونىڭ قورىتىندىسى بويىنشا كوشباسشىلار ءبىرقاتار مەملەكەتارالىق قۇجاتتارعا قول قويدى.
ازەربايجان ب ا ق حابارلاۋىنشا، پرەزيدەنتتەردىڭ قاتىسۋىمەن قول قويىلعان ۇكىمەتارالىق جانە باسقا دا قۇجاتتار الماسىلدى. قول قويىلعان التى قۇجاتتىڭ ىشىندە ءۇش كەلىسىم مەن ءۇش مەموراندۋم، سونداي-اق بىرلەسكەن مالىمدەمە بار.
«بۇگىن قابىلدانعان قۇجاتتار، سونىڭ ىشىندە، ەڭ الدىمەن، پرەزيدەنتتەردىڭ بىرلەسكەن دەكلاراتسياسى ءبىزدىڭ قارىم-قاتىناستارىمىزدىڭ دوستىق جانە وداقتاستىق سيپاتىن تاعى ءبىر رەت راستايدى. 2022 -جىلدىڭ اقپانىندا قول قويىلعان وداقتاستىق ىنتىماقتاستىق تۋرالى دەكلاراتسيانىڭ ەرەجەلەرى ءساتتى جۇزەگە اسىرىلىپ وتىر. ءبىزدىڭ ەلدەر وداقتاس، دوس، جاقىن سەرىكتەس جانە كورشى رەتىندە ارەكەت ەتۋدە»، - دەدى ازەربايجان پرەزيدەنتى يلحام اليەۆ رەسەيلىك ارىپتەسى ۆلاديمير پۋتينمەن كەلىسسوزدەر قورىتىندىسى بويىنشا باسپا سوزگە بەرگەن بىرلەسكەن مالىمدەمەسىندە.
بىرلەسكەن مالىمدەمەدەن بولەك ازىق-تۇلىك قاۋىپسىزدىگى سالاسىنداعى ىنتىماقتاستىق، كارانتين جانە وسىمدىكتەردى قورعاۋ سالاسىنداعى ىنتىماقتاستىق، دەنساۋلىق ساقتاۋ، مەديتسينالىق ءبىلىم جانە عىلىم سالاسىنداعى ىنتىماقتاستىق تۋرالى ۇكىمەتارالىق كەلىسىمدەرگە قول قويىلدى.
سونداي-اق ەڭبەك ينسپەكتسياسى ماسەلەلەرى، كليماتتىڭ وزگەرۋى ماسەلەلەرى، سونداي-اق رەسەيدىڭ تىكەلەي ينۆەستيتسيالار قورى مەن ازەربايجاننىڭ ەكسپورت پەن ينۆەستيتسيالاردى ىنتالاندىرۋ اگەنتتىگى اراسىندا ءوزارا تۇسىنىستىك تۋرالى مەموراندۋمدارعا قول قويىلدى.
قول قويۋ ءراسىمى ازەربايجان پرەزيدەنتىنىڭ زاگۋلبا رەزيدەنسياسىندا ءوتتى.
اۆتور
زارينا تۋعانبايەۆا