ۋتيلالىم سالدارىنان شارۋاشىلىقتار جاڭا تەحنيكا الۋدى قويدى - سەناتور

استانا. KAZINFORM - بۇگىن سەناتتىڭ جالپى وتىرىسىندا دەپۋتات ءالي بەكتايەۆ اۋىل شارۋاشىلىعى تەحنيكاسىنا ۋتيلالىمدى جويۋدى ۇسىندى.

ونىڭ سوزىنە قاراعاندا، ەلىمىزدەگى اۋىل ەڭبەككەرلەرى پايدالانىپ جۇرگەن اۋىل شارۋاشىلىعى تەحنيكاسىنىڭ 76 پايىزىنىڭ توزىعى جەتكەن. نورماتيۆ بويىنشا ءار مىڭ گەكتارعا 5 تراكتور مەن 3 كومبايننىڭ قاجەت ەكەنىن ەسكەرسەك، قازىرگى كەزدە ەگىس الاڭدارىنا 65 مىڭ تراكتور، 43 مىڭ كومباين جەتىسپەيدى. ال اۋىل شارۋاشىلىعى تەحنيكالارى جىل سايىن %4,5 عانا جاڭارادى. ولاي بولسا، تەك جەتىسپەيتىن تراكتورلار مەن كومباينداردىڭ ورنىن تولتىرۋ ءۇشىن 14-15 جىل كەرەك بولادى.

سەناتور ءالي بەكتايەۆ ءوزىنىڭ دەپۋتاتتىق ساۋالىندا اۋىل شارۋاشىلىعى تەحنيكاسىنىڭ توزۋى مەن تاپشىلىعى تۋرالى ايتتى.

«ەلىمىزدە اۋىل شارۋاشىلىعىنىڭ قۇرال-جابدىقتارىن وندىرەتىن 10 زاۋىت پەن وزدىگىنەن جۇرەتىن تەحنيكالار شىعاراتىن 8 كاسىپورىن بار. ول كاسىپورىندار 2023 -جىلى 5400 تراكتور، 1000 كومباين، 17000-نان استام تىركەمەلى قۇرىلعىلاردى شىعاردى. ياعني، ولار تراكتورلار مەن كومبايندارعا دەگەن جىلدىق سۇرانىستىڭ 80 پايىزىن، ال تىركەمەلى تەحنيكالاردىڭ 30 پايىزعا جۋىعىن قۇرايدى. وكىنىشكە قاراي، بىزدە شىعارىلاتىن تراكتورلار مەن كومباينداردىڭ قازاقستاندىق قامتۋ ۇلەسى B-44 عانا. نەگىزگى قوسالقى بولشەكتەر سىرتتان كەلەدى. سوندىقتان دا ولاردىڭ باعاسى وتە قىمبات. تاۋار وندىرۋشىلەر الا المايدى. اۋىل شارۋاشىلىعىنا قاجەت جەڭىل قۇرىلعىلاردىڭ، سوقالار مەن كۋلتيۆاتورلاردىڭ، ديسكىلى تىرمالاردىڭ، مال ازىعىن دايىندايتىن ماشينالار مەن مەحانيزمدەردىڭ، پىشەن جيناعىشتار مەن تۇقىم سەپكىشتەردىڭ، كوشەت وتىرعىزاتىن جابدىقتاردىڭ باسىم كوپشىلىگى شەتەلدەن اكەلىنەدى. نەگىزىنەن مەتالدان تۇراتىن قاراپايىم عانا وسى تەحنيكالاردى نەگە وزىمىزدە كوپتەپ شىعارۋعا بولمايدى؟ جالپى، قازاقستاندا وتاندىق اگرارلىق ماشينا جاساۋ سالاسىن دامىتۋدىڭ باعدارلاماسى، بولماسا كونتسەپتسياسى بار ما؟»، - دەپ سۇرادى ءا. بەكتايەۆ ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا.

سەناتور سونىمەن قاتار جاڭا اۋىل شارۋاشىلىعى تەحنيكاسىن ساتىپ الۋ ءۇشىن ۋتيلالىم قۇنى جوعارى ەكەنىن اتاپ ءوتتى. بۇل شارۋالاردىڭ جاڭا تەحنيكانى ساتىپ الا الماۋىنا جانە ەسكىرگەن تراكتورلار مەن كومباينداردى پايدالانۋىنا، سونداي- اق ۇنەمى جوندەۋگە ءماجبۇر بولۋىنا اكەلەدى.

«2024 -جىلعى جاعداي بويىنشا ۋتيلالىمىنىڭ كولەمى ءبىر تراكتور ءۇشىن 370000 نان 7380000 تەڭگە، ال ءبىر كومباين ءۇشىن 1600000 نان 8300000 تەڭگە ارالىعىن قۇرايدى. ونى تولەۋگە شاماسى كەلمەگەن ورتا جانە شاعىن شارۋاشىلىقتار جاڭا تەحنيكا الۋدى قويدى. ەسكى تەحنيكامەن ەگىس ەگەدى، ەسكى كومباينمەن استىق جينايدى. جارامسىز تەحنيكانى قوسالقى بولشەككە پايدالانادى، ال قالعان قاڭقاسىن مەتالعا وتكىزىپ كۇن كورەدى. تەحنيكانى الىپ جاتقان دا، كادەگە جاراتىپ، جويىپ جاتقان دا شارۋالاردىڭ وزدەرى. سوندا نەگىزگى وپەراتور بولىپ، قارجى جيناپ وتىرعان «جاسىل دامۋ» مەكەمەسىنىڭ ۇلەسى نەدە؟ جالپى، اۋىلشارۋاشىلى تەحنيكالارى ءۇشىن كادەگە جاراتۋ الىمىن الىپ تاستاسا مەملەكەت ۇتپاسا، ۇتىلمايدى دەپ ويلايمىز»، - دەدى دەپۋتات.

اۆتور

رۋسلان عابباسوۆ