بالا كۇنگى قيالىن قاناتىنا بايلاعان كەيىپكەرىمىز كوك اسپاندى باعىندىرىپ قانا قويماي، قيىن ساتتە قول ۇشىن سوزاتىن قاھارمان ماماندىق يەسى اتانۋدى ماقتان تۇتادى.
24.kz ءتىلشىسى مەرەكە قارساڭىندا ناعىز ەرلەرگە ءتان ماماندىقتى تاڭداعان نازىك جاندى ۇشقىشپەن سۇحباتتاسىپ، ونىڭ كاسىبي جولى مەن تىنىس- تىرشىلىگىنە ۇڭىلگەن ەدى.
ۇشقىش بولۋدى جەتىنشى سىنىپتان باستاپ ارماندادىم. مەكتەپتى اياقتاعان كەزدە بولاشاق ماماندىعىمدى تاڭداۋدا ەش كۇماندانعان جوقپىن. وسىلايشا، اۆياتسيا سالاسىندا ءبىلىم الىپ، ازاماتتىق اۆياتسيا اكادەمياسىن ۇزدىك ءتامامدادىم، - دەيدى ءبيبىحان داۋلەتباي قىزى. 2021 -جىلى ت ج م «قازاۆيا قۇتقارۋ» ا ق-دا ەڭبەك جولىن باستاعان جاس مامان سودان بەرى ادام ءومىرىن ساقتاۋعا باعىتتالعان جاۋاپتى قىزمەتتى ابىرويمەن اتقارىپ كەلەدى.
ونىڭ ايتۋىنشا، اۆياتسياعا كەلۋىنە بالا كۇنگى قىزىعۋشىلىعى مەن قالالاردى بيىكتەن كورۋ ارمانى تۇرتكى بولعان. العاشقى ۇشۋىنان العان اسەرى ءالى كۇنگە دەيىن جادىندا. ت ج م اۆياتسياسىنىڭ قىزمەتى تەك قانا ۇشۋمەن شەكتەلمەيدى. بۇل - توتەنشە جاعدايلاردىڭ الدىن الۋ مەن ولاردى جويۋ، ىزدەستىرۋ-قۇتقارۋ جۇمىستارىن جۇرگىزۋ جانە سانيتارلىق اۆياتسيا ارقىلى شالعايداعى ناۋقاستاردى شۇعىل تاسىمالداۋ. مۇنداي كۇردەلى مىندەتتەردى ورىنداۋ ۇشۋ ەكيپاجىنان جوعارى كاسىبيلىكتى، تەمىردەي ءتارتىپتى، ءمىنسىز دايىندىقتى جانە قاۋىپسىزدىك تالاپتارىن قاتاڭ ساقتاۋدى تالاپ ەتەدى.
ءار ۇشۋ - ءوز الدىنا ۇلكەن جاۋاپكەرشىلىك. ءار رەيستە سەن تەك ءوزىڭ ءۇشىن ەمەس، بورتتاعى جولاۋشىلار ءۇشىن دە جاۋاپ بەرەسىڭ. كەي ساتتەردە اۋا رايىنىڭ قولايسىزدىعىنا نەمەسە شۇعىل جاعدايلارعا بايلانىستى سانالى تۇردە جىلدام شەشىم قابىلداۋعا تۋرا كەلەدى. ءبىراق ونداي كەزدە ەموتسياعا بەرىلمەي، تەك ءبىلىم مەن كاسىبي دايىندىق كومەكتەسەدى، - دەپ اتاپ ءوتتى كەيىپكەرىمىز.
بۇگىندە ت ج م اۆياتسياسىندا قىزمەت ەتۋ - ءبيبىحان ءۇشىن تەك جۇمىس ەمەس، ءومىرىنىڭ ءمانى. تاڭداعان ماماندىعىنا دەگەن شەكسىز سۇيىسپەنشىلىك پەن العا قويعان اسقاق ماقساتتارى وعان قانات ءبىتىرىپ كەلەدى. ال ارتىنداعى وتباسى مەن جاقىندارىنىڭ سەنىمى - ونىڭ ەڭ باستى تىرەگى ءارى جىگەرى.
ءبيبىحان تۇرىسبەكوۆانىڭ ءومىر جولى - بالا كۇنگى ارمانعا ادالدىقتىڭ، ال ونىڭ كۇندەلىكتى قىزمەتى - ەل يگىلىگى مەن ادام ءومىرى ءۇشىن جاسالاتىن ەرلىكتىڭ جارقىن كورىنىسى. كوك جۇزىندە قيىندىققا قارسى تۇرىپ، قاۋىپتىڭ ورتاسىنا قانات قاعاتىن نازىك جاندى ۇشقىشتىڭ بۇل تاڭداۋى وسكەلەڭ ۇرپاققا ناعىز پاتريوتيزم مەن جاۋاپكەرشىلىكتىڭ ۇلگىسى بولا الادى. كاسىبي مەرەكەدە ەل تىنىشتىعى مەن قاۋىپسىزدىگى ءۇشىن ايانباي ەڭبەك ەتىپ جۇرگەن بارلىق قۇتقارۋشىلاردىڭ ەڭبەگى ءاردايىم اقتالسىن!