تىكۇشاق اپاتىنىڭ الدىن الا سەبەبى ايتىلدى
استانا. KAZINFORM - قورعانىس مينيسترلىگى اقتوبە وبلىسىندا تىكۇشاق اپاتىنا قاتىستى رەسمي حابارلاما جاسادى، دەپ حابارلايدى ۆەدومستۆونىڭ باسپا ءسوز قىزمەتى.
بيىلعى جىلعى 9 -قاراشادا اقتوبە وبلىسى سارىجار اۋىلىنىڭ ماڭىندا اۋە قورعانىسى كۇشتەرى اسكەري ينستيتۋتىنىڭ مي-8 تىكۇشاعى وقۋ- جاتتىعۋ ۇشۋلارىن ورىنداۋ كەزىندە اپاتتى جاعدايدا قوندى. بورتتا بولعان 3 ەكيپاج مۇشەسىنىڭ 2-ەۋى اۋرۋحاناعا جەتكىزىلدى. ولارعا قاجەتتى مەديتسينالىق كومەك كورسەتىلدى.
- ەكيپاج مۇشەلەرىنىڭ ءبىرى قازا تاپتى. اۆياتسيالىق وقيعانىڭ الدىن- الا سەبەبى - تەحنيكالىق اقاۋلىق. وقيعانىڭ ءمان-جايى انىقتالۋدا. جەرگىلىكتى جەردە ۆەدومستۆوارالىق جەدەل توپ جۇمىس ىستەۋدە. قارۋلى كۇشتەردىڭ باسشىلىعى مەن اۋە قورعانىسى كۇشتەرىنىڭ قولباسشىلىعى قازا تاپقان اسكەري قىزمەتشىنىڭ تۋىستارى مەن جاقىندارىنا كوڭىل ايتادى، - دەلىنگەن مينيسترلىك حابارلاماسىندا.
ۆەدومستۆو اتاپ وتكەندەي، ونىڭ تۋىستارىنا، سونداي- اق زارداپ شەككەندەرگە بارلىق قاجەتتى كومەك كورسەتىلەدى.
اقتوبەدە تىكۇشاق اپاتىنا بايلانىستى قىلمىستىق ءىس قوزعالدى. قازىر تەرگەۋ ءجۇرىپ جاتىر.
- اقتوبە وبلىسىنداعى اەرودروم اۋماعىندا وقۋ-جاتتىعۋ ۇشۋلارىن ورىنداۋ كەزىندە مي-8 تىكۇشاعى قاتتى قونىپ، ارتىنشا وتىن باكتارى ورتەنگەن. وسى فاكتى بويىنشا قىلمىستىق ءىس قوزعالدى. وقيعا ورنىندا تەرگەۋ ورگاندارى جۇمىس ىستەپ جاتىر، - دەپ حابارلادى ق ر ءى ءى م ءا ت د باتىس وڭىرلىك اسكەري- تەرگەۋ باسقارماسى.