تىكۇشاق اپاتى: يران پرەزيدەنتى وقيعاعا دەيىن قايدا باردى

استانا. قازاقپارات - 19-مامىردا ازەربايجان رەسپۋبليكاسىنىڭ پرەزيدەنتى يلحام الييەۆ پەن يران يسلام رەسپۋبليكاسىنىڭ پرەزيدەنتى يبراحيم رايسيدىڭ قاتىسۋىمەن اراز وزەنىندە سالىنعان «حۋدافەرين» سۋ ەلەكتر كەشەنىن ىسكە قوسۋ جانە «گىز گالاسى» گ ە س-نىڭ اشىلۋ سالتاناتى ءوتتى. بۇل تۋرالى Trend جازدى.

مەملەكەت باسشىلارى «حۋدافەرين» جانە «گىز گالاسى» سۋ قوندىرعىلارىن ىسكە قوستى.

ازەربايجان رەسپۋبليكاسى مەن يران يسلام رەسپۋبليكاسىنىڭ مەملەكەتتىك شەكاراسىندا، اراز وزەنىندە سالىنعان «حۋدافەرين» جانە «گىز گالاسى» سۋ ەلەكتر كەشەندەرى ەلەكتر قۋاتىن ءوندىرۋ جانە سۋارۋ ماقساتىندا سالىنعان.

گيدروەلەكتر جوبالارى 1977 -جىلى قازاندا كەڭەس وداعى مەن يران اراسىندا قول قويىلعان كەلىسىم نەگىزىندە جاسالعان. 1990 -جىلداردىڭ باسىندا جوبالارى قايتا قارالعان گيدروەلەكتر كەشەندەرىنىڭ قۇرىلىسى ارمەنيانىڭ ازەربايجان اۋماعىنىڭ 20 پايىزىن باسىپ الۋى ناتيجەسىندە توقتاتىلعانىمەن، قۇرىلىس جۇمىستارىن كەيىننەن تەك يران يسلام رەسپۋبليكاسى جۇرگىزدى.

اراز وزەنىنىڭ سۋ رەسۋرستارىن ۇتىمدى پايدالانۋ ەسەبىنەن ەلەكتر ەنەرگياسىن ءوندىرۋدى جانە ەگىستىك القاپتاردى سۋمەن قامتاماسىز ەتۋدى جاقسارتۋعا مۇمكىندىك بەرەتىن «حۋدافەرين» جانە «گىز گالاسى» سۋ ەلەكتر كەشەندەرىندە بوگەتتەردى سالۋ جۇمىستارى اياقتالىپ، سۋ قويمالارىن تولتىرۋ جۇمىستارى باستالدى.

«حۋدافەرين» سۋ قويماسىنا 503 ميلليون تەكشە مەتر، ال «گىز گالاسى» سۋ قويماسىنا 42 ميلليون تەكشە مەتر سۋ جينالدى. بۇل ونىڭ جالپى كولەمىنىڭ 40 جانە 85 پايىزى.

ەسكە سالا كەتەيىك، يران پرەزيدەنتى مىنگەن تىكۇشاق ازەربايجانمەن شەكارالاس ۆەرزەگان قالاسىنا جاقىن جەرگە اپاتتى جاعدايدا قوندى. كەيىنىرەك تىكۇشاق قۇلاعان جەردەن ۆيدەو پايدا بولدى. ادامدار پرەزيدەنت رايسي مەن ونىڭ سەرىكتەرىنىڭ دەنساۋلىعى ءۇشىن دۇعا ەتىپ جاتىر.

يران ۆيتسە-پرەزيدەنتى موحسەن مانسۋري ەل پرەزيدەنتى يبراحيم رايسي مىنگەن تىكۇشاق اپاتتى جاعدايدا قونعاننان كەيىن قاسىنداعى ەكى ادام بىرنەشە رەت بايلانىسقا شىققانىن ايتتى.