تيك-توك جاس وسپىرىمدەردىڭ قاۋىپسىزدىگىن قامتاماسىز ەتۋ ءۇشىن جاڭا فۋنكتسيا قوسپاقشى

استانا. قازاقپارات - TikTok جاس وسپىرىمدەردىڭ قاۋىپسىزدىگى مەن ءال-اۋقاتىن قامتاماسىز ەتۋ ءۇشىن جاڭا فۋنكتسيالاردى ىسكە قوسادى. بۇل تۋرالى ق ر مادەنيەت جانە اقپارات ءمينيسترى ايدا بالايەۆا ءمالىم ەتتى.

- TikTok جاسوسپىرىمدەردىڭ قاۋىپسىزدىگى مەن اتا- انالاردىڭ باقىلاۋ جۇيەسىن ودان ءارى جاقسارتۋدا. پلاتفورما جاس وسپىرىمدەر ءۇشىن قاۋىپسىز ونلاين كەڭىستىك قۇرۋعا جانە اتا- انالارعا بالالارىنىڭ TikTok-تاعى بەلسەندىلىگىن باسقارۋعا كومەكتەسەتىن جاڭا مۇمكىندىكتەردى ىسكە قوسقانىن حابارلايدى. اتاپ ايتقاندا، TikTok «وتباسىلىق باپتاۋلار» بولىمىندە اتا-انالارعا جاس وسپىرىمدەردىڭ قوسىمشاعا قولجەتىمدىلىگىن بەلگىلى ءبىر ۋاقىت ارالىعىندا شەكتەۋگە مۇمكىندىك بەرەتىن جاڭا فۋنكتسيانى ىسكە قوسۋدى جوسپارلاپ وتىر. سونداي-اق، پلاتفورما ساعات 22.00 دەن كەيىن TikTok-تى پايدالاناتىن جاس وسپىرىمدەردىڭ نازارىن اۋدارىپ، تىنىعۋىنا كومەكتەسەتىن جاڭا مۇمكىندىكتى ىسكە قوسپاق، - دەپ جازدى ايدا بالايەۆا.

«وتباسىلىق باپتاۋلاردىڭ» قوسىمشا فۋنكتسيالارى

TikTok-تاعى اتا-انالاردىڭ باقىلاۋ جۇيەسىنىڭ ءبىر بولىگى بولىپ تابىلاتىن «وتباسىلىق باپتاۋلاردىڭ» ىسكە قوسىلعانىنا بەس جىل بولدى. وسى جىلدار ىشىندە اتا-انالاردىڭ كەرى بايلانىسى مەن ساراپشىلاردىڭ ۇسىنىستارىن ەسكەرە وتىرىپ، TikTok جاڭا فۋنكتسيالاردى بىرنەشە رەت ەنگىزىپ وتىردى.

بۇل جولى TikTok قولدانباسىنىڭ ازىرلەۋشىلەرى «دەمالىس» دەگەن جاڭا فۋنكتسيانى قوستى. ول قوسىمشانى بەلگىلى ءبىر ۋاقىتقا بۇعاتتاۋعا مۇمكىندىك بەرەدى.

ەندى اتا-انالار:

🔹بالالارىنا TikTok-قا قول جەتكىزۋدى شەكتەۋ ۋاقىتىن بەلگىلەي الادى، مىسالى، وقۋ ۋاقىتىندا نەمەسە تۇنگى ۋاقىتتا.

🔹سيفرلى دەتوكستقا قول جەتكىزۋ ءۇشىن قايتالاناتىن كەستەنى ورناتا الادى. شەكتەۋ قويىلعان ۋاقىت ارالىعىندا جاس ءوسپىرىمنىڭ TikTok-تى قولدانۋ سۇرانىسىن قابىلداي الادى.

🔹وعان قوسا «وتباسىلىق باپتاۋلاردىڭ» جاڭا فۋنكتسياسى اتا-انالارعا بالالارىنىڭ اككاۋنتتارى تۋرالى تولىق اقپارات الۋعا مۇمكىندىك بەرەدى.

🔹بالالارىنىڭ TikTok-تا كىمدەردى باقىلاپ وتىراتىنىن جانە ولاردىڭ اككاۋنتىنا كىمدەر جازىلعانىن كورە الادى. قانداي قولدانۋشىلاردىڭ اككاۋنتتارىن بۇعاتتاعانىن بىلە الادى. ءتىپتى اتا-انالاردىڭ باقىلاۋى قوسىلماعان كەزدە دە، الداعى ايلاردا TikTok جاس وسپىرىمدەرگە قاۋىمداستىق ەرەجەلەرىنە سايكەس كەلمەيتىن كونتەنت تۋرالى اتا-انالارىنا حابارلاۋ مۇمكىندىگىن قوسۋدى جوسپارلاپ وتىر.

ەسكە سالا كەتەيىك، بۇعان دەيىن وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلدايەۆا ەلىمىزدە TikTok-تىڭ بالالارعا اسەرى تۋرالى پىكىر ايتقان بولاتىن.