ماماننىڭ سوزىنشە، مەملەكەت كەپىلدىك بەرگەن زاڭ كومەگى - ازاماتتاردىڭ بىلىكتى زاڭ كومەگىن الۋ قۇقىعىن قامتاماسىز ەتەتىن ماڭىزدى تەتىك. ول حالىقتىڭ ماتەريالدىق جاعدايىنا قاراماستان، زاڭدا كوزدەلگەن ساناتتاعى ازاماتتارعا تەگىن قۇقىقتىق قولداۋ الۋعا مۇمكىندىك بەرەدى.
سونىمەن قاتار، ق ر كونستيتۋتسياسىنا جانە «ادۆوكاتتىق قىزمەت جانە زاڭ كومەگى تۋرالى» زاڭىنا سايكەس، مەملەكەت كەپىلدىك بەرگەن زاڭ كومەگى قۇقىقتىق كونسۋلتاتسيا بەرۋ، زاڭدىق قۇجاتتاردى ازىرلەۋ، سونداي-اق ازاماتتاردىڭ سوتتار مەن مەملەكەتتىك ورگاندارداعى مۇددەلەرىن قورعاۋ جانە ءبىلدىرۋ تۇرىندە كورسەتىلەدى.
اتاپ ايتقاندا، مىنا ساناتتاعى جاندار تەگىن ادۆوكات قىزمەتىنە جۇگىنە الادى:
· اليمەنت توبىنداعى ازاماتتار؛
· زەينەتاقى جانە جاردەماقى الۋ قۇقىعىنا يە تۇلعالار؛
· كوپبالالى انالار؛
· اسىراۋشىسىنان ايىرىلعاندار؛
· ۇلى وتان سوعىسى ارداگەرلەرى مەن وعان تەڭەستىرىلگەندەر؛
· قىلمىستىق ىزگە ءتۇسۋ امالدارى ورىن العاننان باستاپ ايىپتالۋشى، جابىرلەنۋشى جانە سوتتالۋشى؛
· زورلىق-زومبىلىققا دۋشار بولعاندار.
ودان بولەك، تەرروريزمگە قاتىستى قىلمىستىق ىستەر بويىنشا مەملەكەت تاراپىنان تەگىن زاڭ كومەگىن كورسەتۋ كوزدەلگەن.
تاعى ءبىر ايتا كەتەتىن ماڭىزدى جايت - اليمەنت توبىنداعى ازاماتتار، زەينەتاقى جانە جاردەماقى الاتىن كىسىلەر، كوپبالالى انالار تەك وسى ماسەلەلەر اياسىندا تۋىنداعان داۋلار بويىنشا تەگىن ادۆوكات كومەگىن الۋعا قۇقىلى.
- مىسالى، ءبىر كوپبالالى انا ساۋدامەن اينالىسادى دەلىك. ەگەر الدەكىم مىندەتتەمەلەرىن ورىنداماي، ساۋدا سالاسىندا جاڭاعى كوپبالالى انانىڭ قۇقىعىن بۇزسا، وندا بۇل كوممەرتسيالىق داۋ سانالادى دا، تەگىن قۇقىقتىق كومەك كورسەتىلمەيدى،- دەپ ءتۇسىندىردى باقىتجان بەيسەن.
دەمەك، اتالعان ساناتتاعىلارعا تەك اليمەنت، جاردەماقى، زەينەتاقى الۋ بويىنشا داۋلاردا عانا تەگىن ادۆوكات قىزمەتى كورسەتىلەدى.
زاڭ كومەگىن كورسەتۋ ءتارتىبى
باقىتجان بەيسەن زاڭ كومەگىن ادۆوكاتتار مەن زاڭ كونسۋلتانتتارى كورسەتەتىنىن اتاپ ءوتتى. ادۆوكاتتار قىلمىستىق ىستەر بويىنشا قورعاۋدى جۇزەگە اسىرىپ، ازاماتتاردىڭ سوتتاعى مۇددەسىن قورعايدى. ال زاڭ كونسۋلتانتتارى قۇقىقتىق كەڭەس بەرىپ، ارىزدار، شاعىمدار مەن وزگە دە زاڭدىق قۇجاتتاردى ازىرلەۋگە كومەكتەسەدى.
قۇقىقتىق كونسۋلتاتسيانى ازاماتتار ماماندارعا تىكەلەي جۇگىنۋ نەمەسە «ە-زاڭ كومەگى» اقپاراتتىق جۇيەسى ارقىلى الا الادى. ەگەر كومەكتى ءوتىنىش بەرىلگەن كۇنى كورسەتۋ مۇمكىن بولماسا، ول زاڭنامادا بەلگىلەنگەن مەرزىمدە، ءتيىستى جاعدايلاردا ءۇش جۇمىس كۇنىنەن كەشىكتىرىلمەي بەرىلۋى ءتيىس.
ال زاڭ كومەگىن كورسەتكەن ماماندار اقى تولەۋگە ارنالعان ەلەكتروندىق ءوتىنىشتى ءبىرىڭعاي اقپاراتتىق جۇيە ارقىلى قالىپتاستىرادى. ادىلەت دەپارتامەنتى ۇسىنىلعان قۇجاتتاردىڭ تولىقتىعى مەن دۇرىستىعىن تەكسەرگەننەن كەيىن، قولدانىستاعى قاعيدالارعا سايكەس تولەمدى راسىمدەيدى.
زاڭ كومەگىنىڭ قولجەتىمدىلىگىن ارتتىرۋ شارالارى
استانا قالاسىندا ادىلەت دەپارتامەنتى مەملەكەت كەپىلدىك بەرگەن زاڭ كومەگىن كورسەتۋ بويىنشا 158 ادۆوكاتپەن جانە 13 زاڭ كونسۋلتانتىمەن كەلىسىم جاساسقان. 2026 -جىلدىڭ 10 ايىندا وسى جۇيە اياسىندا 11284 ازاماتقا قۇقىقتىق كومەك كورسەتىلدى. كورسەتىلگەن قىزمەتتەر ءۇشىن بيۋدجەت قاراجاتى ەسەبىنەن 247 ميلليون 347 مىڭ تەڭگە ءبولىندى.
ايتا كەتەيىك، قازىر زاڭ كومەگىن كورسەتۋ جانە وعان اقى تولەۋ پروتسەستەرىنىڭ باسىم بولىگى «ە-زاڭ كومەگى» اقپاراتتىق جۇيەسى ارقىلى جۇزەگە اسىرىلادى. سيفرلىق پلاتفورما وتىنىشتەردى راسىمدەۋدى، قۇجاتتاردى جولداۋدى جانە كورسەتىلگەن قىزمەتتەردى ەسەپكە الۋدى جەڭىلدەتەدى.
- استانا قالاسىنىڭ ادىلەت دەپارتامەنتى مەملەكەت كەپىلدىك بەرگەن زاڭ كومەگىنىڭ قولجەتىمدىلىگى مەن ساپاسىن ارتتىرۋ، مامانداردىڭ ەڭبەگىنە اقى تولەۋدىڭ ۋاقتىلى جۇرگىزىلۋىن قامتاماسىز ەتۋ باعىتىنداعى جۇمىستاردى جالعاستىرىپ جاتىر،- دەدى باقىتجان بەيسەن.
ەسكە سالايىق، بۇعان دەيىن قازاقستاندا ادۆوكاتتار مەن نوتاريۋستار ءۇشىن تالاپتار جاڭارتىلعانىن جازعانبىز.