توقسان جاستاعى قاريا الەمدەگى ەڭ قارت جۇك كولىگىنىڭ جۇرگىزۋشىسى اتاندى

استانا. KAZINFORM - ا ق ش- تىڭ 90 جاستاعى تۇرعىنى دويل ارچەر گيننەستىڭ رەكوردتار كىتابىنا ەنىپ، الەمدەگى ەڭ قارت جۇك كولىگىنىڭ جۇرگىزۋشىسى اتاندى.

UPI مالىمەتىنشە، كانزاس شتاتىنىڭ قارت تۇرعىنى 60 جىلدان استام ۋاقىت بويى جۇك كولىگىن تىزگىندەيدى ەكەن. ا ق ش بارلىق شتاتىن ارالاپ، ميلليونداعان شاقىرىمدى ءجۇرىپ وتكەن.

جۇك كولىگىنىڭ جۇرگىزۋشىسى ءوز ەسىمىنىڭ تاريحتا قالعانىنا قۋانىپ، «زەينەتكە شىعۋ» دەگەن تىركەس سوزدىك قورىندا مۇلدەم جوق ەكەنىن ازىلمەن جەتكىزدى.

«مەن جاقىن ارادا زەينەتكە شىعۋدى جوسپارلامايمىن. دەنساۋلىعىم سىر بەرمەسە، كولىك جۇرگىزۋدى جالعاستىرامىن»، - دەيدى 90 جاستاعى قاريا.

ارچەر ەڭبەك جولىندا تاسىمالداۋعا بولاتىن جۇكتەردىڭ بارلىق ءتۇرىن دىتتەگەن جەرگە اپارعانىن ايتادى. ونىڭ تۋىستارى ارچەردىڭ جۇمىسىنا دەگەن ادالدىعى جاستارعا جىگەر بەرەتىنىنە سەنىمدى.

اۆتور

ورالحان قوجانوۆ