ساراپشىنىڭ پىكىرىنشە، ساۋدا كولەمىن ارتتىرۋ ەنەرگەتيكا، اۋىل شارۋاشىلىعى، ونەركاسىپ، لوگيستيكا جانە ينۆەستيتسيا سالالارىنداعى كووپەراتسيامەن قاتار ءجۇرۋى كەرەك. بۇل قازاقستاننىڭ ەكسپورتتىق نارىقتارىن ءارتاراپتاندىرىپ، قازاقستاندىق ونىمدەردىڭ كاۆكاز بەن ەۋروپا نارىقتارىنا شىعۋىنا مۇمكىندىك بەرەدى. ال مويىنتى- قىزىلجار، داربازا- ماقتاارال، باقتى- اياگوز باعىتتارى مەن ارال- كاسپي ماگيسترالى ەلدىڭ ترانزيتتىك الەۋەتىن ارتتىرۋعا ىقپال ەتەدى.
سونداي-اق ءسۇيىنباي سۇيىندىكوۆ سۋ رەسۋرستارىن بىرلەسىپ باسقارۋ جونىندەگى كونۆەنتسيا مەن ب ۇ ۇ اياسىندا حالىقارالىق سۋ ۇيىمىن قۇرۋ باستامالارىنىڭ ماڭىزىن اتاپ ءوتتى.
ونىڭ ايتۋىنشا، جاساندى ينتەللەكت بويىنشا وڭىرلىك ىنتىماقتاستىق ورناتۋ دا قازاقستاننىڭ سيفرلىق كۇن تارتىبىندەگى ءرولىن كۇشەيتەدى. ال بۇرىن قابىلدانعان كەلىسىمدەردى ناقتى جوبالارعا اينالدىرۋ ورتالىق ازياداعى ىنتىماقتاستىقتى دەكلاراتسيالىق دەڭگەيدەن ناتيجەگە باعىتتالعان كەزەڭگە كوشىرەدى.