اۋستراليالىق Hoofbeats جۋرنالىنىڭ مۇقابىندا قىلاڭبوز اقجاندى جەمدەپ تۇرعان ءساتى بەينەلەنگەن. Shimmering Aqzhan, ياعنم «جارقىراعان اقجان» دەپ اتالاتىن ماقالادا پرەزيدەنتتىڭ جىلقىعا دەگەن قىزىعۋشىلىعى، قازاقستاننىڭ ۇلتتىق مۇراسى مەن زاماناۋي ەلورداسىنىڭ نىشانىنا اينالعانى ءسوز بولادى.
— پرەزيدەنت قاسىم-جومارت توقايەۆ اقجانعا ەرەكشە ىقىلاس تانىتىپ وتىر. ەرەكشە جاراتىلعان جاس جىلقىنىڭ قورا سىرتىندا دا كۇتىمى مۇقيات ۇيىمداستىرىلىپ، ءوزى بارعان سايىن تانىمال بولا تۇسكەنى قىزىق كورىنەدى، — دەپ جازادى باسىلىم.
اقجان 2025 -جىلعى 30-ناۋرىزدا استانادا تۋعان. ول پرەزيدەنت ءىس باسقارماسىنىڭ ات قوراسىنداعى جەتى احالتەكە جىلقىسىنىڭ ءبىرى. تۇلپاردىڭ ءجۇنى سيرەك كەزدەسەتىن يزابەللا ءتۇستى. مۇنداي رەڭك اقالتەكە تۇقىمدى جىلقىلاردىڭ شامامەن 3 پايىزىندا عانا كەزدەسەدى. اقجاننىڭ كۇندەلىكتى كۇتىمى مەن دامۋىن ارنايى باپكەرلەر، اتبەگىلەر جانە ۆەتەرينارلار توبى قاداعالايدى.
باسىلىم جاس جىلقىنىڭ تاعدىرىن قازاقستاننىڭ دامۋىمەن ساباقتاستىرادى. اۆتورلاردىڭ ايتۋىنشا، اقجان ەلدىڭ اتبەگىلىك ءداستۇرىنىڭ قازىرگى كەلبەتىن بەينەلەپ تۇرعانداي.
— اقجان وسى بايلانىستىڭ ايرىقشا ادەمى كورىنىسىن تانىتادى. ول — زاماناۋي شاھاردا ءومىر ءسۇرىپ جاتقان كونە تۇقىمنىڭ وكىلى. دالا كەلبەتىن ءزاۋلىم عيماراتتارى بوي كوتەرگەن قالاعا الىپ كەلگەن. ونىڭ بولمىسى ءداستۇرلى جىلقى ءوسىرۋ تاجىريبەسىنىڭ جەمىسى بولعانىمەن، بەينەسى زاماناۋي اقپارات قۇرالدارى ارقىلى بۇكىل الەمگە تارادى، — دەلىنگەن ماقالادا.
اۋستراليالىق باسىلىم ماقالاسىن اقجاننىڭ قازاقستاننىڭ وتكەنىن ساقتاي وتىرىپ، بولاشاققا قادام باسقان ەل ەكەنىن تانىتاتىنى تۋرالى تۇجىرىممەن اياقتايدى.
— بالكىم اقشىل ءتۇستى، ەرەكشە جارقىراعان اقالتەكە كوپشىلىكتىڭ نازارىن اۋدارۋى دا سوندىقتان شىعار. اقجان وتكەن مەن بولاشاقتىڭ ءبىرىن تاڭداۋعا ءماجبۇر بولعان قازاقستاندى ەمەس، ەكەۋىن دە قاتار الىپ كەلە جاتقان قازاقستاندى بەينەلەيدى، — دەپ جازادى جۋرنال.
Hoofbeats — جىلقى ءوسىرۋ، باپتاۋ جانە كۇتىپ-باپتاۋ ماسەلەلەرىن جازاتىن اۋستراليالىق باسىلىم. اقجان تۋرالى ماقالا جۋرنالدىڭ 48-تومىنىڭ 3-سانىندا جاريالانعان.