توقايەۆ: قازاقستان نارىققا كىرۋگە نيەتتى قىتاي كومپانيالارىنا قولايلى جاعداي جاساۋعا دايىن

استانا. KAZINFORM - قازاقستان ءوز نارىعىنا كىرۋگە نيەتتى قىتاي كومپانيالارى ءۇشىن قولايلى جاعداي جاساۋعا دايىن. بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭمەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.

«قازاقستان مەن قىتايدىڭ مىزعىماس ساياسي قاتىناستارى ءوزارا سەنىم مەن قولداۋ رۋحىندا دامىپ كەلە جاتىر. ەكى ەل اراسىندا شەشىمىن تاپپاعان ەشقانداي تۇيتكىل جوق. سوندىقتان كۇش بىرىكتىرە وتىرىپ، ساۋدا- ەكونوميكالىق، عىلىمي- تەحنيكالىق جانە مادەني- گۋمانيتارلىق ارىپتەستىكتى جانداندىرۋعا نيەتتىمىز. ءبىز ءتوراعا شي جينپيڭ ەكەۋىمىز جاڭا عانا بىرلەسكەن مالىمدەمەگە قول قويدىق. قۇجاتتا ەكى ەل قاتىناستارىنىڭ جەتىستىكتەرى جانە الداعى جوسپارلارى كەڭىنەن قامتىلعان»، - دەدى مەملەكەت باسشىسى.

قاسىم-جومارت توقايەۆ قىتاي قازاقستاننىڭ باستى ساۋدا سەرىكتەسى ەكەنىن باسا ايتتى.

«بىلتىر ەلدەرىمىز اراسىنداعى ساۋدا كولەمى 41 ميلليارد دوللار بولدى. الداعى ۋاقىتتا تاۋار اينالىمىن ەسەلەي تۇسەمىز. بۇعان الەۋەتىمىز جەتكىلىكتى. قىتاي - ءبىزدىڭ نەگىزگى شەتەلدىك ينۆەستورلارىمىزدىڭ ءبىرى. كەيىنگى 15 جىلدا بۇل ەلدەن قازاقستانعا 25 ميلليارد دوللارعا جۋىق ينۆەستيسيا تارتىلدى. بىلتىر قازاقستان ەكونوميكاسىنا قۇيىلعان قىتاي ينۆەستيتسياسىنىڭ كولەمى 16 پايىزعا ءوسىپ، 1,8 ميلليارد دوللارعا جەتتى. بۇل كورسەتكىشتى ۇلعايتۋعا ەكى تاراپ تا مۇددەلى»، - دەدى قازاقستان پرەزيدەنتى.

مەملەكەت باسشىسىنىڭ ايتۋىنشا، بۇگىندە قۇنى 14,5 ميلليارد دوللار بولاتىن 45 جوبا جۇزەگە اسىرىلىپ جاتىر. جالپى، قىتاي كاپيتالىنىڭ ۇلەسى بار كاسىپورىندار سانى 4700 دەن اسادى.

«ءبىز ءوزارا ءتيىمدى ينۆەستيسيالىق جوبالاردى ودان ارى جۇزەگە اسىرۋدىڭ ماڭىزىن اتاپ وتتىك. ناقتىراق ايتقاندا، ەنەرگەتيكا، ينفراقۇرىلىم، اۋىل شارۋاشىلىعى، ءوندىرىس، قارجى، كولىك، اەروعارىش ونەركاسىبى جانە IT سالالارىنا توقتالدىق. قازاقستان ءوز نارىعىنا كىرۋگە نيەتتى قىتاي كومپانيالارى ءۇشىن قولايلى جاعداي جاساۋعا دايىن»، - دەدى قاسىم-جومارت كەمەل ۇلى.

اۆتور
مارلان جيەمباي