بۇل تۋرالى اقوردانىڭ باسپا ءسوز قىزمەتى حابارلادى.
قاسىم-جومارت توقايەۆ قازاقستان مەن گەرمانيانىڭ ءبىلىم سالاسىنداعى تابىستى ىنتىماقتاستىعىنا توقتالدى.
ونىڭ ايتۋىنشا، بۇل جەتىستىكتەرگە پرەزيدەنت فرانك-ۆالتەر شتاينمايەردىڭ 2023 -جىلى ماۋسىم ايىنداعى ساپارىنان باستاۋ العان ساياسي ديالوگتىڭ نىعايۋى سەپتىگىن تيگىزدى.
- بۇگىندە قازاقستاننىڭ 45 ۋنيۆەرسيتەتى گەرمانياداعى 100 گە جۋىق سەرىكتەسپەن ىنتىماقتاستىق ورناتقان. ەكى مىڭعا جۋىق قازاقستاندىق ستۋدەنت گەرمانيادا ءبىلىم الادى. قازىرگى كەزدە ەلىمىزدە شەتەلدىك ۋنيۆەرسيتەتتەردىڭ 30 دان استام فيليالى مەن سەرىكتەس وكىلدىگى بار. بۇل كورسەتكىشتەر كوپ نارسەنى اڭعارتادى. دەگەنمەن ولار ىنتىماقتاستىعىمىزدىڭ قانشالىقتى تەرەڭ ەكەنىن تولىق كورسەتپەيدى. ەڭ باستىسى، قولعا العان ءىسىمىز وتە ماڭىزدى. ىقپالداستىعىمىزدىڭ مازمۇنى تۇبەگەيلى وزگەردى،-دەدى پرەزيدەنت.
مەملەكەت باسشىسى ەلىمىزدى ەۋرازيا مەن ودان تىسقارى جەرلەردەگى جەتەكشى اكادەميالىق جانە عىلىمي-زەرتتەۋ ورتالىعى رەتىندە قالىپتاستىرۋ ستراتەگيالىق باسىمدىق رەتىندە ايقىندالعانىن ايتتى.
- ءبىز ءداستۇرلى قالىپتى وزگەرتىپ جاتىرمىز. جاستاردى شەتەلگە ءبىلىم الۋعا جىبەرۋدىڭ ورنىنا قازاقستانعا وزىق حالىقارالىق جوعارى وقۋ ورىندارىنىڭ ستاندارتتارى مەن باعىتتارىن اكەلۋگە كىرىستىك. ەلىمىزدە كارديفف ۋنيۆەرسيتەتىنىڭ، KAIST جانە كولورادو تاۋ-كەن مەكتەبىنىڭ وكىلدىكتەرى جۇمىس ىستەيدى. قازىر ەلىمىزدە 40 مىڭنان استام شەتەلدىك ستۋدەنت ءبىلىم الادى. 2029-جىلعا قاراي ولاردىڭ سانىن 100 مىڭعا دەيىن ارتتىرۋدى جوسپارلاپ وتىرمىز. قازاقستان بولون پروتسەسىنە مۇشە ەل رەتىندە ءبىلىم بەرۋ ساپاسى مەن عىلىمي دارەجەلەردىڭ سايكەستىگىن قامتاماسىز ەتەتىن ەۋروپالىق ستاندارتتاردى قولدانادى،- دەدى قاسىم-جومارت توقايەۆ.