مەملەكەت باسشىسىنىڭ ايتۋىنشا، مەتاللۋرگيا كومبيناتىنىڭ جەتىستىكتەرى ەلىمىزدەگى اۋقىمدى وزگەرىستەرمەن تىعىز بايلانىستى. قازاقستان دامۋدىڭ جاڭا تاريحي كەزەڭىنە قادام باستى. الايدا قول جەتكىزگەن تابىسقا توقمەيىلسۋگە بولمايدى. الدىمىزدا اتقاراتىن شارۋا كوپ.
- ەلىمىزدىڭ ساياسي جۇيەسىنىڭ بەرىك قۇرىلىمى قالىپتاستى. بۇل رەفورمالار، ەڭ الدىمەن، مەملەكەت ىرگەسىن نىعايتۋ ماقساتىندا جاسالىپ جاتىر. الەمدىك ساياسات پەن ەكونوميكادا مۇلدەم جاڭا، ءالى كەڭىرەك زەردەلەنىپ ۇلگەرمەگەن جاعداياتتار پايدا بولعان كەزەڭدە مۇنىڭ ماڭىزى وتە زور. قازاقستان پايداسىمەن قوسا كەمشىلىگى، ءتىپتى تىرشىلىككە قاتەر دە توندىرەتىن جاساندى ينتەللەكت ۇستەمدىك قۇراتىن جاڭا الەمگە ويداعىداي بەيىمدەلۋ ءۇشىن تىڭعىلىقتى دايىندالۋعا ءتيىس، - دەدى قاسىم-جومارت توقايەۆ.
پرەزيدەنت ەلىمىز تاريحىمىزدا بۇرىن-سوڭدى بولماعان قارقىندى قۇرىلىسقا كىرىسىپ، بۇكىل ازاماتتىق ينفراقۇرىلىم جاڭعىراتىنىن جەتكىزدى.
- كەلەسى جىلدى «جالپىحالىقتىق اۋقىمدى قۇرىلىس جىلى» دەپ جاريالادىم. وسى وراسان جۇمىسقا «حالىقتىق قۇرىلىس» دەگەن اتاۋ بەرىلدى. جولداۋدا اتاپ وتكەنىمدەي، اتالعان عالامات جوباعا شامامەن 6,5 تريلليون تەڭگە بولىنەدى. بۇل - ورىندى شەشىم. ويتكەنى «حالىقتىق قۇرىلىس» اياسىندا ەل-جۇرتىمىز بارىنشا مۇقتاج بوپ وتىرعان جوبالار ىسكە اسىرىلادى. ەڭ ماڭىزدىسى، «حالىقتىق قۇرىلىس» تۇتاس ەلدى، بارلىق قالا مەن اۋداندى قامتيدى. شىن مانىندە، ءبىز باياندى بولاشاقتىڭ سەنىمدى ىرگەتاسىن قالاپ جاتىرمىز. ويتكەنى جاڭا ءارى جوندەلگەن جولداردى، اۋەجايلاردى، ۆوكزالداردى، ەلەكتر ستانتسيالارىن، اۋرۋحانالاردى، ەمحانالاردى، مەكتەپتەردى، ەرەكشە بالالاردى وڭالتۋ ورتالىقتارىن، بالالار مەن جاسوسپىرىمدەرگە ارنالعان شىعارماشىلىق ۇيلەرىن، سپورت نىساندارىن، ءبىر سوزبەن ايتقاندا، بارلىق ازاماتتىق ينفراقۇرىلىمدى بىرنەشە بۋىن پايدالانىپ، يگىلىگىن كورەدى. جالپى، «حالىقتىق قۇرىلىستىڭ» بۇكىل ءمان-ماعىناسىن «قۇرىلىس جانە تاعى دا قۇرىلىس» دەگەن ءبىر اۋىز سوزبەن تۇسىندىرۋگە بولادى. تۇپتەپ كەلگەندە، بۇگىنگى جانە كەلەشەك ۇرپاققا باعدارلامالار مەن تۇجىرىمداردى ەمەس (ءبىراق، بۇل دا وتە ماڭىزدى)، ءبىز ولارعا ماتەريالدىق قۇندىلىقتاردى، ەڭ الدىمەن، الەۋمەتتىك ينفراقۇرىلىم نىساندارىن امانات ەتىپ قالدىرۋىمىز كەرەك. حالقىمىزدىڭ الدەقايدا جايلى ءومىر سۇرۋگە، قازىرگى وركەنيەتتى زاماننىڭ بارلىق يگىلىگىن كورۋگە حاقى بار. ادىلەتتى قازاقستاندى قۇرۋ ستراتەگياسىنىڭ باستى ماقساتى دا - وسى، - دەدى مەملەكەت باسشىسى.
ەسكە سالايىق، بۇعان دەيىن قازاقستاندا «جالپىحالىقتىق اۋقىمدى قۇرىلىس» باعدارلاماسىن جۇزەگە اسىرۋ ءۇشىن 2029 -جىلدىڭ سوڭىنا دەيىن ۇلتتىق قوردان 6,5 تريلليون تەڭگە ءبولۋ جوسپارلانىپ وتىرعانىن حابارلاعان ەدىك.